Read Yupik 1 Chronicles 16 Bible Online

1 Chronicles 16 - Yupik bible

1 Chronicles 16

¹Itrutaat-llu Akqutem Yaassiiga elliluku-llu iluanun pelatekam nautellran David-aam tauna pitekluku. Elliigut-llu ekuagiluteng ilakuyutem-llu elliitiinek Agayutmun.

²David-aaq-llu qaqiucami elliillerminek ekuagiluteng, atawaqercetai yuut atrakun ATANREM.

³Aruqait-llu tamalkuita neqnek. Cikirai angutet arnat-llu Israel-aami ataucimek kelipamek, ilaluku kemgem iliinek kelipimalriim, issuumanek-llu.

⁴David-aaq nakmikiuq ilaitnek Levite-at ciuliqagcesqelluku agayullrat ATANERMUN, Agayutiit Israel-aat, ciuqerrani Akqutem Yaassiigan, atullermegteggun nanrallermegteggun-llu.

⁵Asaph-aaq cucukumauq ciuliqagten͞guluni, tungliqluku-llu Zachariah, Jeiel-aankut-llu, Shemiramoth-aaq, Jehiel-aaq, Maatithiah, Eliab-aaq, Benaiah, Obededom-aaq, Jeiel-aaq-llu, aturcetaararkauluteng tengtengaatgun; Asaph-aam-llu qasiarcetarkaulukek qantarngalnguuk,

⁶malruk-llu agayulirtek, Benaiah-nkuk Jahaziel-aaq-llu, cup'arkauluki cupu'uryarat akultutaciqegglutek, ciuqerrani Yaassiigan Akqutem.

⁷Tua-llu tuani David-aaq ciuqlirmek cucuklirtuq quyatmek atuusqelluku ATANERMUN Asaph-aaq ilai-llu.

⁸Quyavikiciu ATANEQ, ucurnarqucia aperturluku; nunarpiit yuitnun qanrutkiciki caliari.

⁹Aturci elliinun ATANERMUN, aturci nanrautnek elliinun, qanrutkiciki elliin assilriit caliari!

¹⁰Angnirci elliin pikngakut; tamarmeng elliinun agayulriit angnirpaglit!

¹¹Ikayuusqelluci ATANERMUN ullauci, elliinun-llu agayuci taqsuunaci.

¹²Neq'akiciki assilriit irr'inarqellriit-llu caliaqellri, cuqcillra-llu yugnek.

¹³Yuini Abraham-aam pistaini elliin, qetunraini Jacob-aam, elliin cucukek'ngaini!

¹⁴Ellii ATANRUUQ Agayutvut; pisqutai ellarpagmun tamalkuan piugut.

¹⁵Nalluyagusngaitaa akqutni akwarpak, qaneryaraq alerquutekellni, tiissitsaanun (1,000) kinguveqellrianun.

¹⁶Akqun taqellni pillgutekluku Abraham-aaq, elliin naaqicimalria akqutni Isaac-aamun.

¹⁷Ilumuurtellni piciryaraurrluku Jacob-aamun, iquklicuilnguurrluku akqun Israel-aamun.

¹⁸Qanerluni, “Elpecen̄un cikiutekciqaqa nunii Canaan-aam, ilakluku paitaqevkarluku.”

¹⁹Agayutem yui amllerivailgata allanruluteng nuniini Canaan-aam.

²⁰Calligtaarluteng nunalinqigtaarluteng, atanruvilinqigtaarluteng.

²¹Tau͡gaam allanun Agayutem caknaavkarceteksaitellrui; camun pivkaasqumavkenaki; atanret aarcirtulallrui:

²²“Akngircaqunaciki cucukek'nganka; prophet-aanka agturyaqunaciki!”

²³Aturli ATANERMUN, tamarmi nuna! Qanrutkiciu anirturilaucia erenret tamalkuita.

²⁴Qanrutkiciu ucurnarqucia kinguveqellrianun, irr'inarqellriit caliari tamalkuitni yugni!

²⁵Tua-i angengan ATANEQ, cakneq nanrarnaqluni, takaqumanruarkauguq agayutni tamalkuitni.

²⁶Tua-i tamarmeng agayutait yuut agayutnguaruameng; tau͡gaam ATANREM piliaqellrua qilak.

²⁷Takarnaq, ucurnaq ciuqerrantuq; piniq angniq nuniintuq.

²⁸Nanrarciu ATANEQ yugni tamarpeci nunami, nanrarciu ucurnaa piniucia-llu.

²⁹Nanrarciu ATANREM ucurnarqellria atra; tailluci elliitmek, tailuci-llu Agayuvigpiinun. Ciktaarluci ciuqerranun Tanqilriim alaiqan;

³⁰uulegten ciuqerrani, tamarpet nunami! Ellarpak ellinqegcaumauq nek'amini pekcecimangaunani-llu.

³¹Quya, nunarpaak qilaak-llu! Qanruski angayuqauvillgutkellriit ATANEQ atanirturilriaruniluku.

³²Ellerrarten, imarpiik, tamarmeng-llu unguvalriit elpeni, quyaci, naucirivigni, tamarmeng-llu elpenelnguut!

³³Napat napalilriani qayagpaglit angnimek ATANEQ, taikan ataniuryarturluku nunarpak.

³⁴Quyavikiu ATANEQ assiucia pitekluku; kenkii nangyuilnguuguq.

³⁵Qanerluci elliinun, “Anirturkut, Agayun Anirturtemten̄i; quyureskut tamamta; anirturkut angyuqauvillgutkellrianek, quyavikniarput nanrarluku-llu tanqilria atren.”

³⁶Nanraumali ATANEQ, Agayutii Israel-aam! Nanrarciu watua akwarpak-llu! Nutaan-llu yuut qanertut, “Amen,” nanraraat-llu ATANEQ.

³⁷Tua-i David-aam unitaa Asaph-aaq anelgutai-llu ciuqerranun Akqutem Yaassiigan ATANREM kevgiurturaasqelluki taqeksaunaki ciuqerrani Akqutem Yaassiigem erenret atauciuqaqluteng piyunartaciicetun.

³⁸Obededom-aaq-llu ilakluki yuinaat pingayun pingayunlegnek cipluku anelgutai; Obededom-aaq qetunraa Jeduthun-aam, Hosh-aaq-llu iteryarat tarikestekarkaulekek.

³⁹Unismiluku-llu Zadok-aq agayulirta anelgutai-llu agayulirtet ciuqerranun agayuvian ATANREM Gebeon-aami.

⁴⁰Elliilararkauluteng ekuagiluteng ATANERMUN ekuaviitni ekualuki elliitet taqeksaunateng unuakuni atakuni-llu, maliggluki tamalkuita igausngalriit alerquutaini ATANREM alerquallermini Israel-aat.

⁴¹Pillguciragket Heman-aankuk Jeduthan-aaq-llu, allat-llu cucukumaluteng pillret aterpagcimaluteng-llu quyaaqluteng piarkaullret ATANERMUN pitekluku caqtaanrilnguq kenkii piugarkaq qangvarpak.

⁴²Heman-aaq Jeduthun-aaq-llu cupu'uryarangqertuk qantarngalngungqerrlutek-llu allanek-llu aturcetaarlutek atu'urkamegnek yuarutet qigcignarqellriit atuumakata.

⁴³Tua-llu tamarmeng yuut utertut kingunermeggnun, David-aaq-llu uterrluni ilani nayuumaqernaluki.