Read Yupik 1 Chronicles 17 Bible Online

1 Chronicles 17 - Yupik bible

1 Chronicles 17

¹Angayuqaq David-aaq uitallermini enemini, qanertuq Nathan-aamun prophet-aamun, “Tangerrluku, uitaunga enemi murakegtaarmi, tau͡gaam ATANREM Akqutiin Yaassiiga iluantuq pelatekam.”

²Nathan-aaq-llu qanertuq David-aamun, “Caliaqiki tamalkuita ircaqurpenelnguut, tua-i Agayutem nayuaten.”

³Tau͡gaam taumi atakumi Agayun qanertuq Nathan-aamun,

⁴“Ayagluten qanrusgu pisteka David-aaq, Waten qanernilua, ‘Elpengunrituq naucestekaa agayuvigpiim uitavigkama.

⁵Wani-wa uitaksaitua enemi ayagnirlua ernermek ciuliqagqaanemnek Israel-aat una erneq engelkarrluku, tau͡gaam pelatekametaurlua, nugtaqtaarturlua-llu uitavignun.

⁶Tamalkuitnun ayagvik'lallemnun Israel-aam yui pillgutekluki ciuliqagtait aptellrunritanka ciin nauciksailuciatnek agayuvigpagkamnek murakegtaarmek?’

⁷Watua taumek qanruciu pisteka David-aaq, Wiinga-gguq, ATANERMI Artuqailngurmi, qanertua elliinun, ‘Wiinga tegullruamken maramek qaunqellerpenek qusngit, ataniurten͞gurrluten-llu yumnun Israel-aanun.

⁸Pillguciumallruamken-llu natmun ayallren tamalkuan, cirlak'lallruanka-llu tamalkuita ingluten ciunerpenek. Ucurnariciqamken angtuatun ciuliqagtetun nunarpagmi.

⁹Nakmiciqua-llu nunakaatnek yum'a Israel-aat, nunalgaurceciiqanka, uitaniartut nakmiin nunameggni, uitacurlagcecimangairulluteng, yuut-llu nangcitalriit tuqurqen͞gaunaki, ciunganicetun.

¹⁰Cucukirraanemnek cuqcisten̄ek yumnun Israel-aanun; wiinga cirlakciqanka tamalkuita ingluten. Cali-llu nallunrircetamken ATANREM eneliciqaten elpet.

¹¹Qaku-llu qaqiskata erneten ayagluten-llu pillguciryarturluki aataten, wiinga nangerciiqanka yut'en kinguvni, iliit qetunrarpet nakmiin, piurciiqaqa angayuqauvia.

¹²Elliin eneliarkaugaanga, piurciiqaqa-llu atanruvia qangvarpak.

¹³Atakeciqaanga, wiinga-llu qetunraqciqaqa; wiinga au͡g'arngaitaqa caqtaanrilnguq kenkeka elliinek, tegullrucimtun ciuvni piullermek.

¹⁴Tau͡gaam caqtaarpek'naku piuvkarciqaqa enemni angayuqauvimni-llu qangvarpak atanruvia-llu piugarkauguq akwarpak.’”

¹⁵Maliggluku makut qaneryaraat, maliggluku-llu man'a tangrrualleq, Nathan-aaq qallatuq David-aamun.

¹⁶Nutaan David-aaq iterluni aqumuq ciuqerranun ATANREM, qanerluni-llu, “Kituusia wii, ATANEQ Agayun, caugat-llu ilanka, elpet taiskevnga man'a tekilluku?

¹⁷Man'a mikluni elpet iigpeni, Agayun; elpet-llu qalarutkeken pistevet eniin uitaarkaucia ak'anun tekitarkami, nasvillua-llu kinguverkanek tekitarkanek, ATANEQ Agayun!

¹⁸Qaillun-llu cali qaneryugngaa David-aaq elpenun takaqutnguluki pisten̄un? Tua-i elpet nallunrilavgu pista.

¹⁹Pisten-llu pitekluku ATANEQ, maliggluku-llu elpet ircaqun, caliaqaten tamalkuita angelriit, nallunrircetelten makut cat.

²⁰Allamek elpetun ayuqellriartaituq, ATANEQ, allamek-llu Agayucetaunani avatevni, aturluku tamalkuan wangkuta niitellerput ciutemteggun.

²¹Canek allanek kinguvellgutkellriartangqerta avatiitni elpet yugpet Israel-aat, Agayutem ullallrukai anirturyarturluki elliin yuknaluki, atengluten elpet angelriamek assilriatgun angelriatgun-llu caliarpeggun, anutnerpeni taungullgutkellriit ciuqerratgun yugpet elpet anirtullerpet Egypt-aamek.

²²Israel-aaq yuksagutellruan elpet yuk'arkauluku qangvarpak; elpet-llu ATANEQ, ellaita Agayuteksagutellruatgen.

²³“Watua-llu ATANEQ, qaneryaraq qalarutkellren pitekluku pisten enii-llu piuresgu qangvarpak, aturluku qanellrucirpetun.

²⁴Elpet-llu atren piurcimaarkauguq misturiluni qangvarpak, qanrumaluni ATANRAT quyungqarugalriit, Agayutiit-llu Israel-aat, Israel-aat Agayutkaat, enii-llu pistevvet David-aam piurcimaarkauguq ciuqerpeni.

²⁵Tua-i elpet Agayutmaa, alaillruavet pistevnun elpet eneliarkauluku ellii; taumek pisten piyuumirluni piicagtuq ciuqerpeni.

²⁶Waniwa-llu ATANEQ, elpet Agayutnguuten, akqutekluku-llu man'a assilria pistevnun.

²⁷Watua taumek angnirnaqli elpenun atawaqercetlerkaa enii pistevvet, ciumurrnaurtuq qangvarpak ciuqerpeni; ca elpet ATANEQ atawaqercetellren atawauciquq qangvarpak.”