Read Yupik 1 Chronicles 18 Bible Online

1 Chronicles 18 - Yupik bible

1 Chronicles 18

¹Mat'um kinguakun David-aam kingupiartellrui Philistine-at cirlakluki-llu, teguluki-llu Gath-aq nunacuarautai-llu unataitnek Philistine-at.

²Kingupiarrluku-llu Moab-aq tamakurmiut-llu teguarurtellruut David-aamun tailluteng-llu cikiutnek.

³David-aam-llu cirlakmia Hadadezer-aaq atanra Zobah-m, tungiinun Hamath-aam, ayainanermini nunalgarcarturluku umyuaqutkani Kuigmun Euphrates-aamun.

⁴David-aaq-llu tegutuq elliinek tiissitsaanek (1,000) pekcessuutnek, tiissitsaanek-llu malrunlegnek (7,000) horse-alegnek, yuinarnek-llu tiissitsaanek (20,000) piyualuteng pitulinek anguyagten̄ek; David-aam-llu kingulirnerita yualuit kepai tamalkuita pekcessuutet horse-ait, uitaciiluni tau͡gaam yuinarnun tallimanun (100) atuuyugngalrianek.

⁵Syrian-aat-llu Damascus-aamek tailuteng ikayuryartullrani Hadadezer-aaq atanra Zobah-m, David-aaq tuquciuq yuinarnek tiissitsaanek (20,000) angutnek Syria-rmiunek.

⁶Tua-llu David-aaq nunalgarciuq anguyagten̄ek Syria-mun Damascus-aami; Syria-rmiut-llu pisten͞gurtut David-aamun, tailluteng-llu cikiutnek. ATANREM-llu cikiumaa David-aaq cirlakinermek natmun ayallra tamalkuan.

⁷David-aam-llu tegui suulutaat capkutat tegumiallrit pistain Hadadezer-aam, ut'rulluki-llu Jerusalem-aamun.

⁸Tibhath-amek Cun-amek-llu, nunarpiigkenek Hadadezer-aam, David-aaq tegutuq amllermek punernermek; tamatumek aturluni Solomon-aaq erurivilillruuq naparyanek-llu assigtanek-llu punernernek.

⁹Tuani Tou-aq atanra Hamath-aam niicami David-aamun cirlakniluki tamalkuita anguyagtai Hadadezer-aam, atanran Zobah-m.

¹⁰Ayagcetaa qetunrani David-aamun, aryuqutmek pisqelluku, piyuumiutmek-llu pisqelluku tua-i-wa elliin calluaku inglulirluku Hadadezer-aaq cirlakluku-llu; tua-i Hadadezer-aam pulengtaq anguyalaaku Tou-aq. Tuyurluku-llu canek ayuqenrilngurnek suulutaanek akinek, punernernek-llu.

¹¹Makut-llu angayuqam David-aam tunellrui ATANERMUN, pillgutekluki akinun suulutaanun-llu ayautellmi kinguveqellrianek, Edom-aamek, Moab-amek, Ammonite-at-llu, Philistine-aanek-llu, Amalek-aamek.

¹²Abishai-aq-llu, qetunraa Zeruiah-m, tuquciuq akimiaq pingayunek tiissitsaanek cipluku (18,000) Edomite-anek Kuignayuani Salt-am.

¹³Nunalgarciuq-llu anguyagten̄ek Edom-aamun; Edom-aarmiut-llu tamarmeng pisten͞gurtut David-aamun. ATANREM-llu cikiumaa David-aaq cirlakinermek ayallra tamalkuan.

¹⁴Tua-i David-aaq ataniurtuq tamalkuitni Israel-aani; aulukluki-llu elluarrluki ayuqluki yun'i.

¹⁵Joab-aq-llu qetunraa Zeruiah-m qulliuluni anguyagten̄i; Jehoshaphat-aaq-llu qetunraa Ahilud-aam igaucisten͞guluni.

¹⁶Zadok-aaq-llu qetunraa Ahitub-aam Ahimelech-aaq-llu qetunraa Abiathar-am agayulirten͞gulutek; Shavsha-llu igarten͞guluni;

¹⁷Benaiah-llu qetunraa Jehoiad-aam ciuqliuluni Cherethite-anun Pelethite-anun-llu; David-aam-llu qetunrai ciulirneruluteng kevgiurtainun angayuqam.