Read Yupik 1 Chronicles 22 Bible Online

1 Chronicles 22 - Yupik bible

1 Chronicles 22

¹Tua-llu David-aaq qanertuq, “Wantarkauguq enii ATANREM Agayutem, wani-llu ekuagivik ekualuki elliivik Israel-aanun.”

²David-aaq alerquiguq quyurcesqelluki tekitaat tamaanelnguut nuniitni Israel-aat, elgarciuq-llu teggalqunek kepuristen̄ek tangnircaumalrianek, teggalqunek atuugarkanek eniinun Agayutem.

³David-aam-llu pikirmii angelrianek quyurtarnek cavignek ussukcarkaitnek amiiget iteryarat qes'utarkauluteng-llu, ayuqluku-llu punernernek amlleriluki uspellerkaat caperrnariluku.

⁴Murakegtaarnek-llu naaqumavkenaki; Sidon-iarmiut Tyri-armiut-llu taitellruat amlleriluki murakegtaarnek David-aaq.

⁵Tua-i David-aaq qanertuq, “Solomon-aaq qetunraqa ayagyuartuq elisngavkenani-llu, ena-llu piliaqumaarkaq ATANREM cakneq tangnirqeciqluni, tangrruarnaqluni ucuqumaluni-llu tamalkuitni nunani.” Tua-i David-aam quyurcitaa cakneq amlleriluki tuquvailegmi.

⁶Nutaan-llu qayagaurluku Solomon-aaq qetunrani, ellimerrluku-llu enelisqelluku ATANEQ Agayutiit Israel-aat.

⁷David-aaq qanertuq Solomon-aamun, “Qetunraaq, ircaqumnet'lallruuq caliaqnaluku, ena atranun ATANREM Agayutma.

⁸Tau͡gaam qaneryaraa ATANREM taiguq wangnun, qanerluni, Elpet amllermek aunrarcecillruuten callullruluten-llu angelriani anguyaulluten; enelingaituten wiinga atemnun, tua-i-wa aunrarcecillruavet amllermek ciuqamni qaingani nunam.

⁹Tangerrluku, qetunraq yuurciiquq elpenun; tauna yuugarkauguq nepailngurkun. Wiinga cikirarkaugaqa nepaitmek tamalkuitnek ingluinek kassutmun; tua-i ellii atengqerrarkauguq Solomon-aamek, cikirarkauluki-llu uitanqegcitmek nepaitmek-llu Israel-aat elliin erenrini.

¹⁰Ellii eneliciquq atemnun. Ellii wii qetunraqciqaqa, wiinga-llu elliin atakeciqaanga, piurciiqaqa-llu takarnarqellria aqumllera Israel-aani qangvarpak.”

¹¹Watua qetunraaq, ATANREM nayurliten, ciutmurrniartuten caliaqellerkaanun eniin ATANREM Agayutvet.

¹²Kiimi, ataki ATANREM allakaumaliten taringumavkarluten-llu, pinarikan elliin elkareskaten tarikesqelluki Israel-aat aturniaran alerquutii ATANREM Agayutvet.

¹³Nutaan elpet piluaqaraciquten mulngakluten atuquvki picirkiutet maligtarkat ATANREM alerquutekellri Moses-aamun Israel-aanun-llu. Pinirluten tengruluten-llu. Alingevkenak; qacuvallaksaunak.

¹⁴Angelrianek nangtequtengqerrlua quyurcillruunga nekaanun ATANREM mallegluku tiissitsaanek akimiaq ataucimek cipluku (100,000) uspernek suulutaamek, malleggluku-llu tiissitsaanek akimiaq ataucimek cipluku (1,000,000) uspernek qerrirlimek, punernernek cavignek-llu usperumallerkaat caperrnarqellrianek, tua-i tamakut amllessiyaagan; muragnek teggalqumek-llu cali quyurtellruunga. Makut elpet ilanarqaten.

¹⁵Amllernek calistengqertuten: teggalqunek kepuristen̄ek, qikuliurten̄ek, enelisten̄ek, tamalkuitnek-llu ayuqenrilngurnek calitulinek naaqumavkenateng, elisngaluteng calituluteng.

¹⁶Suulutaamek, qerrirlinek, punernernek, cavignek-llu. Nangerrluten caliluten! ATANREM nayurliten!

¹⁷David-aam-llu alerqurmii tamalkuita ciuliqagtait Israel-aat ikayuusqelluku qetunrani Solomon-aaq.

¹⁸Qanerluni, “ATANREM-qaa Agayutevci nayunritaaci? Cikinritaaci-llu-qaa uitanqegcitmek avatevcen̄ek tamalkuan? Elliin taitellruaki yirtuumastai nunam unatemnun; nuna-llu tegumallruluni ciuqerrani ATANREM yuut-llu.

¹⁹Watua atauciurrluku umyuan ircaqun-llu yuallerkaanun ATANREM Agayutvet, tauna Yaassiiga Akqutiin ATANREM tanqilriit-llu assigtai Agayutem itrucunaqnaurtut enemun piliaqumalriamun atranun ATANREM.”