Read Yupik 1 Chronicles 23 Bible Online

1 Chronicles 23 - Yupik bible

1 Chronicles 23

¹David-aaq-llu cakneq ak'allaurcami, qetunrani Solomon-aaq angayuqrurtuq tamalkuitnun Israel-aanun.

²David-aam quyurtai tamalkuita ciuliqagtait Israel-aat agayulirtet Levite-at-llu.

³Levite-at yuinaq qulmek cipluku (30) allrakungelriit qulmun, naaqumaut-llu, amllertaut-llu yuinaq akimiaq pingayunek tiissitsaat (38,000) angutet.

⁴Yuinaq cetamanek cipluku tiissitsaanek (24,000) makut ilait atanirturilriaruciqut calilrianun eniini ATANREM, tiissitsaat-llu arvinlegen (6,000) atanerruaruluteng cuqcisten͞guluteng-llu,

⁵tiissitsaat-llu cetaman (4,000) iteryarat qaunqestekluki, cetaman-llu tiissitsaat (4,000) nanrarcuutekauluki.

⁶David-aam-llu allakarai avegturluki maliggluku qetunraquciat Levi-amun: Gershom, Kohath, Merari-llu.

⁷Qetunraak Gershom-aam ukuuguk: Ladan-aaq, Shimei-llu.

⁸Qetunrai-llu Ladan-aam: Jehiel, ciulirneq, Zetham, Joel-aaq-llu pingayuluteng.

⁹Qetunrai-llu Shimei-am: Shelomoth, Haziel, Haran-aaq-llu, pingayun.

¹⁰Qetunrai-llu Shimei-am: Jahath, Zina, Jeush, Beriah-llu. Ukut cetaman qetunrai Shimei-am.

¹¹Jahath-aq ciulirneruluni, Zizah-llu tungliuluni; Jeush, Beriah-m-llu kinguvri amllenritut, taumek atameng eniini allakaqaumaluteng quyurrarmeng uitavkaumaut.

¹²Qetunrai Kohath-am: Amram, Izhar, Hebron, Uzziel-aaq-llu, cetaumauluteng.

¹³Qetunrai Amram-aam: Aaron-aaq Moses-aaq-llu. Aaron-aaq allakaumaluni kenciknaristen͞guluni canek tanqinrulrianek, ellii qetunrani-llu qangvarpak aruviaralararkaugut ciuqerrani ATANREM, kevgiurluteng-llu elliinun, atawaqerceciaqluteng atrakun akwarpak.

¹⁴Tau͡gaam qetunrai Moses-aam, yuan Agayutem, aterpagcimaut ilakluki yui Levi-am.

¹⁵Qetunrai Moses-aam: Gershom, Eliezer-aaq-llu.

¹⁶Qetunrai Gershom-aam: Shebuel ciulirneq.

¹⁷Qetunrai Eliezer-aam: Rehabiah ciulirneq; Eliezer-aaq allamek qetunraituq, tau͡gaam qetunrai Rehabiah-m cakneq amllertut.

¹⁸Qetunrai Izhar-am: Shelomith ciulirneq.

¹⁹Qetunrai Hebron-aam: Jeriah ciulirneq, Amariah tunglia, Jahaziel pingayuak, Jekameam cetamiit.

²⁰Qetunrai Uzziel-aam: Micah ciulirneq, Isshiah tunglia.

²¹Qetunrai Merari-m: Mahli, Mushi-llu. Qetunrai Mahli-m: Eleazer-aaq Kish-aaq-llu.

²²Eleazer-aaq tuqullruuq qetunraunani, tau͡gaam paningqerrluni; ellaita tungelqurrita, qetunrain Kish-am, nuliqsagutelarait.

²³Qetunrai Mushi-m: Mahli, Eder, Jeremoth-aaq-llu pingayuluteng.

²⁴Makut qetunraqai Levi-am atameng eniitgun, ciuqliuluteng atameng eniini igausngallerteng aturluku naaqumaluteng atrit atauciuqaqluteng yuinarnek (20) ayagluteng qulmun caliyugngaluteng

²⁵Tua-i David-aaq qanertuq, “ATANEQ Agayutiita Israel-aat, cikillrui yuut nepaitnamek; uitaluni-llu Jerusalem-aami akwarpak.

²⁶Tua-llu tua-i Levite-at ayagaciarkaunrirtut agayuvigmek wall'u camek aturyukmeggnek agayuaqameng.”

²⁷Tua-i nangnerteggun qanellrikun David-aam makut Levite-at yuinarmek (20) allrakungelrianek qulmun,

²⁸tau͡gaam ellait caliangqerciqut ikayualuki qetunrai Aaron-aam agayullratni eniini ATANREM, caliaqluki quyurrviit, enet-llu, carrirturluki-llu tamalkuita tanqilriit allat-llu caliaqnarqellriit agayuyaraini eniin Agayutem.

²⁹Ikayuagaqluki-llu tangrrutetgun kelipatgun, mukaamek-llu kinertellriaruluku elliitekaatgun, kelipayagarnek-llu quuleciryarailngurnek, uuciluki-llu elliitnek, elliitnek-llu uqumek avukumalrianek cuqtaarnarqellritgun-llu amllertacilegnek angtaciatgun-llu.

³⁰Nangerngalararkauluteng-llu unuakullra tamalkuan quyavikluku nanrarluku-llu ATANEQ, ayuqluku-llu atakuni.

³¹Nani-llu ekuagiaqata elliiluteng ATANERMUN agayunerni, iralinqigtaqan-llu pirpakumalriani-llu ernerni, amllertaciicetun tamakut taqeksaunateng ciuqerrani ATANREM.

³²Wani-wa murilkarkauluku ellaita pelatekaq quyurrvik agayuvik-llu, murilkarkauluki-llu qetunrai Aaron-aam, anelgutmeng calillerkaatnun eniini ATANREM.