Read Yupik 1 Chronicles 27 Bible Online

1 Chronicles 27 - Yupik bible

1 Chronicles 27

¹Man'a igausngalqaat Israel-aat, ciuqliit atameng enaitni, alerquastait tiissitsaanek yuinaat-llu talliman (1,000s cali 100s), atanerruateng-llu tamakut kevgiulaqiit tamalkuitgun avverqumatacimegteggun tailriit kiturluteng-llu unuaquaqan erenret tamalkuita allrakuq iquklitaarluku, atauciin allakaumalriit naaqutengqerrluteng yuinaq cetamanek cipluku tiissitsaanek (24,000).

²Jashobeam-aaq qetunraa Zabsiel-aam qaunqesten͞gullruuq ciuqlirnun allakaumalrianun ciuqlirmi iralumi; allakaumallgutni-llu tiissitsaaruut yuinaq cetamanek cipluku (24,000).

³Ellii kinguveqaa Perez-aam, ciuqliqellruat tamarmeng atanerruarita anguyagtet ciuqlirmi iralumi.

⁴Dodai-aq Ahohite-aq qaunqesten͞gullruuq allakaumalrianun tungliani iralum; allakaumallgutni-llu amllertaut yuinaq cetamanek cipluku tiissitsaat (24,000).

⁵Pingayuat alerquastet pingayuatni iralut uunguuq Benaiah-q, qetunraa Jehoiada-m agayulirta, ciuqliuluni avvnernun yuinaq cetamanek cipluku tiissitsaat (24,000).

⁶Una Benaiah-uguq pinilriaruluni angun yuinaq qulmek alerquastekluku-llu yuinaq qulnek cipluku tiissitsaanek (24,000); Ammizabad-aaq qetunraa qaunqesten͞guuq allakaumalrianun.

⁷Asahel-aaq anelgutii Joab-am cetamakaat, iralut cetamiitnun, qetunraa-llu Zebadiah-q tungekluku; avvingallgutai-llu amllertaut yuinaq cetamanek cipluku tiissitsaat (24,000).

⁸Tallimiit alerquasta tallimiitnun iralut, uunguuq Shamhuth-aaq, Izrahite-aq; avenrullgutni-llu amllertaut yuinaq cetamanek cipluku tiissitsaat (24,000).

⁹Arvinelgat arvinelgatnun iralut, uunguuq Ir-aq, qetunraa Ikkesh-aam Tekoite-am; allakaumallgutni-llu amllertaut tiissitsaat yuinaq cetamanek (24,000).

¹⁰Malrunelgat malrunelgatnun iralut, uunguuq Helez-aaq Pelonite-aq, qetunrainek Ephraim-aam; allakaumallgutni-llu amllertaut yuinaq cetamanek cipluku tiissitsaat (24,000).

¹¹Pingayunelgat pingayunelgatnun iralut uunguuq Sibbecai-aq, Hushathite-aq, Zerahite-anek; avvingallgutni-llu amllertaut yuinaq cetamanek tiissitsaat (24,000).

¹²Qulngunritariit qulngunritariitnun iralut, uunguuq Abiezer-aaq Anathothite-aq, Benjaminite-auluni; allakaumallgutni-llu amllertaut yuinaq cetamanek tiissitsaanek (24,000).

¹³Qulngurutiit, qulngurutiitnun iralut uunguuq Maharaia-q Netophahite-aq, Zerahite-anek; allakaumalriarini yuinaq cetamanek cipluku tiissitsaaruut (24,000).

¹⁴Qula ataucimek (11) cipnerat, iralut qula ataucimek cipneratnun uunguuq, Benaiah-q Pirathonite-aq, qetunrainek Ephraim-aam; allakaumalriarini amllertaut tiissitsaat yuinaq cetamanek (24,000).

¹⁵Qula malrugnek cipnerat (12), qula malrugnek cipneratnun iralumun, uunguuq, Heldai-aq Netophathite-aq. Othniel-aamek; allakaumallgutai amllertaut yuinaq cetamanek cipluku tiissitsaat (24,000).

¹⁶Qaqilluki kinguveqellgutkellriartai Israel-aat, Reubenite-anun Eliezer-aaq qetunraa Zichri-m ciuqliqluku atanerruat; Simeonite-anun Shephatiah-q qetunraa Maacah-m;

¹⁷Levi-amun, Hashabiah-q qetunraa Kemuel-aam; Aaron-aamek, Zadok-aq;

¹⁸Judah-mun, Elihu-q, iliit David-aam anelgutain; Issachar-amun, Omri-q qetunraa Michael-aam;

¹⁹Zebulun-aamun, Ishmaiah-q, qetunraa Obadiah-m; Naphtali-mun, Jeremoth-aaq qetunraa Azriel-aam;

²⁰Ephraimite-anun, Hoshea-q qetunraa Azaziah-q; avmegteggun kinguveqellgutkellriartai Manasseh-m Gilead-aami, Joel-aaq qetunraa Pedaiah-m;

²¹avmegteggun kinguveqellgutkellriartainun Manasseh-m Gilead-aami. Iddo-q qetunraa Zachariah-m; Benjamin-aamun, Jaasiel-aaq qetunraa Abner-aam;

²²Dan-amun, Azarel-aaq, qetunraa Jeroham-aam. Makut ciuliqagtekait kinguveqellgutkellriartaita Israel-aat.

²³David-aam naaqutkellrunritai imkut yuinaam (20) aciani allrakulget, tua-i-wa ATANREM akqellruaki Israel-aat amllertarivkarciqniluki agyaitun qiliim.

²⁴Joab-am ayagnirluki naaqellruyaaqai tau͡gaam qaqitellrunritai; tua-i eq'uqertii Agayutem tut'ellruuq Israel-aanun man'a pitekluku, naaqumallrat-llu ekumallruvkenani igausngaviatnun angayuqam David-aam.

²⁵Tamalkuita angayuqam akiviinun aulukillret ukuugut Azmaveth-aaq qetunraa Adiel-aam; tamalkuitnun-llu akivignun nunami nunarpagni-llu, nunarrarni nacessngavigni-llu, Jonathan-aaq qetunraa Uzziah-m;

²⁶tamalkuitnun-llu calilrianun marami itumciluteng nunamek uunguuq Ezri-q qetunraa Chelub-aam;

²⁷wine-anek-llu naucetaarvigni uunguuq Shimei-aq Ramathite-aq;

²⁸tamalkuitnun-llu olive-aanun napanun-llu paatakalegnun Shephelah-mi uunguuq Baalhanan-aaq Gederite-aq; uqut-llu qemangqaviitni Joash-aq;

²⁹tamalkuitnun-llu ungungssinun nerlalrianun Sharon-aami uunguuq Shitrai-aq Sharonite-aq; tamalkuitnun-llu ungungssinun kuignayugni uunguuq Shaphat-aaq qetunraa Adlai-am.

³⁰Ungungssinun-llu qulugtellrianun Obil-aaq Ishmaelite-aq; arnacalunun-llu ciulvagnun Jehdeiah Meronothite-aq. Katngagnun-llu Jaziz-aaq Hagrite-aq.

³¹Tamarmeng makut qaunqestekait Angayuqam David-aam akluin.

³²Jonathan-aaq, David-aam angii, ayuqucirtuasten͞guuq, angun taringketarluni igatuluni-llu; ellii Jehiel-aaq-llu qetunraa Hachmoni-m ilagarakek angayuqam qetunrai.

³³Ahithophel-aaq angayuqam ayuqucirtuastekaa, Hushai-aq Archite-aq angayuqam yugnikek'ngaqaa.

³⁴Ahithophel-aaq enaillrua Jehoiada-m qetunraan Benaiah-m Abiathar-aaq-llu. Joab-aq-llu alerquastekluku angayuqam anguyagtain.