Read Yupik 1 Chronicles 28 Bible Online

1 Chronicles 28 - Yupik bible

1 Chronicles 28

¹David-aam quyurtai tamalkuita atanerruarit Israel-aat, atanerruarit kinguveqellgutkellriit, atanerruarit-llu avverqumallermegteggun kevgiulriit angayuqamun, alerquastait-llu tiissitsaat (1,000), alerquastait-llu yuinaat talliman (100), qaunqestait-llu tamarmeng akluita kuluvain angayuqam qetunrain-llu, ilakluki atanruviim atanerruari, pinilriit angutet, tamarmeng-llu pinarqaqameng anguyautetulit.

²Nutaan-llu angayuqaq David-aaq nangertuq qanerluni-llu, “Niicia, anelgutmaa, yumaa-llu. Ircaqumnetaurtuq pilinalua nekiurlukek uitavigkaagnek Yaassiigegken Akqutiin ATANREM, tuss'aragken-llu Agayutemta; uptellrulua-llu enekamun.

³Tau͡gaam Agayun qanertuq wangnun, ‘Piliarkaunrituten atemnun, elpet anguyautetuliungavet aunrarceciaqluten-llu.’

⁴Pingraan ATANREM Agayutiita Israel-aanun qangvarpak tua-i cucukellrua Judah ciuliqagten͞gusqelluku, eniini-llu Judah-m atama eniini, ilakluki-llu atama qetunrai elliin tegullruanga angniuteklua-llu angayuqrurrnalua tamalkuitnun Israel-aanun.

⁵Tamalkuitnek-llu qetunramnek (tua-i ATANREM cikillruanga amllernek qetunraanek) cucukellrua Solomon-aaq qetunraqa aqumesqelluku aqumllertaanun angayuqauvian ATANREM tamalkuitnun Israel-aanun.

⁶“Ellii qanertuq wangnun, ‘Taunguuq Solomon-aaq qetunraan piliarkaq enekamnek qanercetaarvigkamnek-llu, wiinga cucukellruaqa qetunraqnaluku, wiinga-llu elliin atakeciqaanga.

⁷Wiinga piurciiqaqa angayuqauvika qangvarpak taqeksaunani picirkiuraq aturtuarqaku alerquutenka picirkiutenka-llu unuamek ayuqucimitun.’

⁸“Taumek watua tangvallratni tamarmeng Israel-aat, quyungqaviani-llu ATANREM, niicugngakiini-llu Agayutem, murilkelluki yuarluki tamalkuita alerquutai ATANREM Agayutvet; elpet piknauran man'a assilria nuna, unitniaran-llu paitaqevkarluku irniarpenun kinguvni qangvarpak iquklicuilngurmek.”

⁹“Elpet-llu, Solomon-aaq, qetunramaa, nalluvkenaku Agayutii atavet, kevgiurluku tauna tamalkirrluten ircaqurpegun piyuumirluten-llu umyuarpegun; tua-i ATANREM yualaaki ircaqut, taringumaluki-llu tamalkuita picirkiurat umyuat-llu. Yuaquvgu ellii, nataqumaciquq elpeggun; tau͡gaam elpet uniskuvgu, elliin egciiqaaten iquilngurmun.

¹⁰Murilki watua, ATANREM cucukngaten piliaqesqelluku ena agayuvigkaq; pinirluten caliaqniaran.”

¹¹Nutaan-llu David-aam cikiraa Solomon-aaq qetunrani ayuqucirkaanek uaqlirkaan agayuviim, enetarkain-llu, akivigkat-llu, qullirkain-llu, iluqlirkain-llu, aqumllertain-llu naklekutem nekaanek;

¹²ayuqucirkaitnek-llu tamalkuita umyuangutmi elatiini-llu carr'ilnguut ayuqucirkait ATANREM, akivigkain-llu eniin Agayutem, akivigkaita-llu naaqicimalriit cikiutet;

¹³avverqumallratnun-llu agayulirtet, Levite-at-llu, tamalkuita-llu caliat agayullratni eniini ATANREM; tamalkuita-llu assigtat agayussuutet eniini ATANREM.

¹⁴Uqamait-llu suulutaat assigtat ataucimi agayullermi, uqamait-llu qerrirlit assigtat ataucimun agayullermun.

¹⁵Uqamait-llu suulutaat kenurrarviit kenurraita-llu, aturluku atuumalallrat ataucim kenurrarviim ataucimi agayullermi.

¹⁶Uqamaltacia ataucim suulutaam stuuluata tangrresqutet kelipat, qerrirlit-llu stuulut tuaten.

¹⁷Camek-llu avuilnguut suulutaat nerrsuutet, ermigcuutet, saskat-llu; suulutaat-llu qantat uqamait-llu atauciuqaqluteng,

¹⁸ekuavigmun-llu aruviarmek piliaqumalriamun carriumalriamek suulutaamek, uqamaltacia-llu; cali-llu uptellni suulutaak pekcessuutek yaqulegnek yaquteng nengingaluki patulukek Yaassiigek Akqutiin ATANREM.

¹⁹Tamalkuan man'a elliinun taringnaria igaumalriatgun unataikun ATANREM pitekluku tauna, tamalkuan caliaqumaarkaq maliggluku picirkiuraq.

²⁰Tua-llu David-aaq qanertuq Solomon-aamun, qetunrarminun, “Pinirluten tengruluten-llu caliaqniaran. Alingevkenak, qacuvallagyaqunak; tua-i ATANREM Agayutem, wiinga-llu Agayutma nayuaten. Elliin pinricen̄arcessngaitaaten unisngaunak-llu, tamalkuan caliaq caliaqumaarkaq eniinun ATANREM qaqitnatkaanun.

²¹Tangerrluku-llu avverqumallrat agayulirtet Levite-at-llu tamalkuan caliaqumallerkaanun eniin Agayutem; pillguciutarkat-llu elpenun nallunrilngurnek ayuqenrilngurnun caliarkanun; cali-llu pitangqerciquq atanerruanek tamarmeng-llu yuut tunumaciqut elpet alerquutevnun.”