Read Yupik 1 Chronicles 29 Bible Online

1 Chronicles 29 - Yupik bible

1 Chronicles 29

¹David-aaq-llu angayuqaq qanertuq quyungqalrianun, “Solomon-aaq wii qetunraqa, kiingan Agayutem cucukellra, ayagyuartuq elisngavkenani-llu, caliarkaq-llu angluni; atanruvik yugmun pimangaituq tau͡gaam ATANERMUN Agayutmun.

²Tua-i pikangqercetellruaqa nekaa wii Agayutma, tuaten piyugngaqallemni, suulutaamek piurcugngalriit suulutaamek pililuki, punernermek piurcugngalriit punernerkun pililuki, cavigmek, piurcugngalriit cavigmek pililuki, muragnek piurcugngalriit muragnek pililuki, avatiikun amlleriluki tungulrianek qaralilegnek teggalqunek-llu qaralirkanek, cavigngalngurnek-llu, qaraliqegcilrianek-llu teggalqunek ayuqenrilngurnek.

³Man'a-llu cipluku, ilaluki-llu pikaurtellrenka tanqilriamun enemun, qemagtaangqertua nakmiin wii pimnek suulutaamek, qerrirlimek, kenkitaciqa pitekluku eniinek Agayutma wii cikiutekaqa eniinun wii Agayutma.

⁴Yuinaak malruk arvinlegnek tiissitsaanek (3,000) uspernek camek avuilngurmek qerrirlimek qallirkaanek qacarneran enem.

⁵Tua-llu caliyugngalrianun tamalkuitnun caliaqnarqellrianun calitulitgun, suulutaat suulutaatgun, qerrirlit qerrirlitgun. Kina tua-llu piugteqluni tengruluni tunumaluni ellminek unuamek ATANERMUN piciqa?”

⁶Tua-llu ciuliqagtait aatat enaita piugteqluteng elliiteteng quyurtait, ciuliqagtaita-llu kinguvellgutkellriit, alerquastaita-llu tiissitsaat yuinaat-llu talliman (100), atanerruarulriit-llu angayuqam caliarinun.

⁷Cikiqengut-llu tungiinun caliaqumallerkaan eniin Agayutem yuinaat pingayun akimiaq ataucimek cipluku tiissitsaanek suulutaamek (76,000) qerrirlimek (152,000), yuinaat-llu qula pingayunek qulmek-llu tiissitsaat usperet punernermek (270,000). Miilicessaaq atauciq tiissitsaam-llu avga tiissitsaat usperet cavigmek (1,500,000).

⁸Kinkut-llu pingqellriit teggalquqegtaarnek cikiutekait akivianun eniin ATANREM, aulukestekaatgun Jehiel-aamun Gershonite-amun.

⁹Nutaan-llu yuut angnirpagtut tua-i-wa makut cikiutekngatki piyuumirluteng ircaqumegteggun-llu tamalkirrluteng elliitekellruitki akiinaki ATANERMUN; David-aaq-llu angayuqaq angnirpagmiuq cakneq.

¹⁰Taumek David-aam nanraraa ATANEQ ciuqerratni tamarmeng quyungqalriit qanerluni, “ATANEQ Agayutiit Israel-aat atamta, nanraumalaqina akwarpak tayima!

¹¹“Elpet ATANEQ angelriaruneq pikngavgu, piniq-llu, ucurnaq-llu, qakvaun-llu, taunguciq-llu; tamalkuan-llu qilagmelnguq, nunamelnguq-llu elpet pikan; pikluku-llu angayuqauvik, ATANEQ, naluumauten-llu tamalkuitnun qamiqurruluten quliitni.

¹²Tamarmek tukuun takarnarqun-llu taiguk elpenek, elucilirtuumaaten-llu tamalkuita. Unatevni-llu uitauk piniq artuqailucin-llu uitauk; unatevni-llu uitaluni anglivkariyugngaciq pinirivkariyugngaciq-llu tamalkuitnek.

¹³Watua-llu quyavikamteggen, Agayutemtaa, nanrarluku-llu ucurnarqellria atren.

¹⁴“Tau͡gaam kituusia wii, caugat-llu yuunka, wangkuta piugngaluta elliigarkauluta tengruluta? Tua-i cat tamarmeng taingata elpenek, elpet-llu pivnek wangkuta cikilaramteggen.

¹⁵Tua-i wangkuta allanruamta ciuqerpeni, pektauluta-llu, tamarmeng ciuliaput pillruciicetun; ernerput nunametlemten̄i talinertun ayuqut, uitavigkartaunani-llu.

¹⁶ATANEQ Agayutemtaa, ukut amlleqapigtellriit pikaqevkaqput piliarkamun enekarpenun tanqilriamun aterpenun taigut elpet unatevnek tamalkuita elpet pikaten.

¹⁷Nallunritaqa, Agayutmaa, elpet naspaalaraten ircaqut, angniutekluki-llu canganarqutailnguut; canganarqutaitellrakun-llu ircaquma wiinga nagutaunii elliigua tamalkuitnek makunek, watua-llu maanelnguut-llu yuunka tangrranka nagutaunateng elliilriit angnirluteng elpenun.

¹⁸ATANEQ Agayutiit Abraham-aam, Isaac-aam, Israel-aat-llu atamta, aturlitki qangvarpak makut picirkat umyuaqegtaarait-llu ircaqruita yuut, caulluki-llu ircaqruit tungevnun elpet.

¹⁹Piuresgu Solomon-aamun qetunramnun tamalkirrluni ircaqumikun aturniarai alerquuteten, apervikuateten-llu, picirkiuteten-llu maligqurluki tamalkuita, piliaqniaraa-llu atanruvik aklukilqa.”

²⁰Nutaan David-aaq qanertuq tamalkuitnun quyungqalrianun, “Nanraumali ATANEQ Agayun elpeci.” Tamarmeng-llu quyungqalriit atawaqaasqaat Agayun atiit atameng, pull'uki-llu qamiquteng, piicagvikluku-llu ATANEQ qigcikutmek-llu piluteng angayuqamun.

²¹Ellait-llu ekuagiut ATANERMUN, unuaquan-llu elliigut ekuagiluteng ATANERMUN, tiissitsaanek (1,000) angucalunek, tiissitsaanek (1,000) qusngit angucaluitnek, tiissitsaanek (1,000) qusngiyagarnek, elliiluteng-llu mell'ermeggnun, ekuagiluteng-llu amllernek tamalkuitnun Israel-aanun.

²²Ner'ut-llu merluteng-llu ciuqerrani ATANREM taumi ernermi cakneq angnirluteng. Ellaita-llu Solomon-aaq atanrurtaat qetunraa David-aam aipiriluku, mingugaat takarnarqucirluku ATANERMUN, Zadok-aaq-llu agayulirten͞guluki.

²³Tua-llu Solomon-aaq aqumuq aqumllertaanun ATANREM, angayuqruluni pivkenani David-aaq atii; piqayuluni-llu, tamarmeng-llu Israel-aat niisngaluku.

²⁴Tamarmeng-llu ciuliqagtet pinilriit-llu angutet, tamarmeng-llu qetunrai angayuqam David-aam, akqiut niisngallerkameggnek angayuqaq Solomon-aaq.

²⁵ATANREM-llu cikiraa Solomon-aaq angelriamek takarnarqutmek takuatni tamarmeng Israel-aat, elkarcivikluku-llu takarnarqutmek tuaten pitaksailngurmek ciungani angayuqrulallernun Israel-aani.

²⁶Wani-wa David-aaq qetunraa Jesse-m atanrullruuq tamalkuitni Israel-aani.

²⁷Pitacia atanrullran Israel-aani yuinaagni malrugni (40) allrakuni; atanrullruuq malrunlegni allrakuni Hebron-aami, Yuinaq-llu qula pingayunek (33) allrakuni Jerusalem-aami.

²⁸Tuquluni-llu ak'allaurrluni, ernelirluni, tukuuluni, takarnaqluni; Solomon-aam-llu enairluku ataniurluni.

²⁹Wani-wa caurallri angayuqam David-aam, ayagnirluteng ciuqlirmek nangnermun, igausngaut pingayun prophet-aat igallritni, Samuel-aam, Nathan-aam, Gad-am-llu.

³⁰Igausngaut qaillun ataniuqengellra, pinirtacia, cat-llu tamalkurmeng tut'ellret elliinun, Israel-aamun, avatiinelngurnun-llu angayuqauvignun.