Read Yupik 2 Chronicles 10 Bible Online

2 Chronicles 10 - Yupik bible

2 Chronicles 10

¹Rehoboam-aaq ayagtuq Shechem-aamun, tuavet yui negeqliim Israel-aam quyurtellruluteng angayuqrurcarturluku.

²Jeroboam-aam-llu qetunraan Nebat-aam, niicamiu man'a (Egypt-aamun qimallruamiu Angayuqaq Solomon-aaq) utertuq Egypt-aamek.

³Taukut-llu ayagceciluteng taisqaat; Jeroboam-aaq-llu, tamarmeng-llu Israel-aat taigut qanerluteng-llu Rehoboam-aamun,

⁴“Atavet atmagcuuteput uqamairillrui. Watua uqeglicarki caknernarqellra kevgiullemta atavnun uqamailnguq-llu atmagcuutii atuqengarput, wangkuta-llu kevgiurciqamteggen.”

⁵Rehoboam-aam kiuluki qanertuq, “Ataam taikici erenret pingayun kinguatni.” Tua-i yuut ayagtut.

⁶Angayuqam Rehoboam-aam qanellgutkai arenqiirtullgutekluki ciulirneret ataminun Solomon-aamun, kevgiullret elliinun ayuqucirtuasten͞guluteng. Aptai-llu, “Qaillun picirkircecia kiusqelluki ukut yuut?”

⁷Taukut-llu kiugaat, “Naklekluki ukut yuut pikuvki ilukegcivkarluki, assirluki-llu qalaruskuvki, piciuluteng kevgiurrlainarciqaatgen.”

⁸Tau͡gaam cakaarluku ayuqucirtuutiit ciulirneret, arenqiirtullgutkai ayagyuat anglillgutellni watua-llu ayuqucirtuasten̄i.

⁹Aptai-llu, “Qaillun picirkircecia kiusqelluki ukut yuut wangnun qanellret, ‘Uqeglicarki atmaput atavet ellillri wangkutnun’?”

¹⁰Ayagyuat-llu anglillgutellrin kiugaat, “Waten qanrarkauguten yugnun qanllernun elpenun, ‘Atavet atmagcuuteput uqamairii, tau͡gaam elpet uqeglicarki’; waten qanqina ellaitnun, ‘Iqelquqa iqtunruuq atama naqugnerani.’

¹¹Nauwa atama uqamairillrui atmagcuuceci, wiinga-llu ilaciqanka. Anucimirqecetaalallruaci qenutatgun, wiinga tau͡gaam anucimirqecetaarciqamci piqertuarcuutetgun.”

¹²Tua-i-llu Jeroboam-aaq, tamarmeng-llu yuut, taigut Rehoboam-aamun pingayuatni erenret, angayuqam qanellratun, “Ataam tainiartuci wangnun erenret pingayuatni.”

¹³Angayuqam-llu kiucurlagai, cakaarluku alerquutellrat ciulirneret.

¹⁴Qanerluni, “Atama uqamairillrui atmaci, tau͡gaam wiinga ilaciqanka; anucimirqecetaalallruaci qenutatgun, tau͡gaam wiinga anucimirqecetaarciqamci piqertuarcuutetgun.”

¹⁵Tua-i angayuqam niicugninritai yuut; tamana pisqutkellrua ATANREM Agayutem, piciurrnaluku qanrutkellni Ahijah-kun Shilonite-akun Jeroboam-aamun qetunraanun Nebat-aam.

¹⁶Tua-llu tamarmeng Israel-aat tangrramegteggu niitenrilucirteng angayuqamun, kiugaat angayuqaq, “Qaillun pitalriamek pikangqerceta David-aami? Paitarkaitukut qetunraani Jesse-m. Israel-aam yuini, tamarpeci uterci kingunerpecen̄un! Rehoboam-aaq ellminek aulukekili.” Tua-i tamaaggun Israel-aam yui inglulitut,

¹⁷unilluku Rehoboam-aaq angayuqruluku kiingitnun Judah-m nuniinelngurnun yugnun.

¹⁸Tua-llu Angayuqam Rehoboam-aam Israel-aanun ayagcetaa Hadoram-aaq, ataniurten͞gulria umyuarteng aturpek'naku calivkaumalrianun, tau͡gaam Israel-aat tuqutaat teggalqunek miluquluku. Waten piata, Angayuqaq Rehoboam-aaq cukangnaqluni akalrialegmun pekcessuutminun ekluni qimagtuq Jerusalem-aamun.

¹⁹Tua-i Israel-aat inglulisngalartut David-aam kinguvrinun angayuqrulrianun una erneq engelkarrluku.