Read Yupik 2 Chronicles 11 Bible Online

2 Chronicles 11 - Yupik bible

2 Chronicles 11

¹Rehoboam-aaq tekicami Jerusalem-aamun, quyurcetai yuullgutkelriari Judah-m Benjamin-aam-llu, yuinaat qulngunritaraat tiissitsaat (180,000) pivakumalriit anguyautetulit, anguyagnaluki Israel-aat angayuqaullni yuullgutkelriarinun Benjamin-aam Judah-m-llu ataam ciunganitun piurcetengnaqluku.

²Tau͡gaam ATANREM prophet-aaq Shemaiah qanrutaa:

³“Qanrusgu Rehoboam-aaq, Solomon-aam qetunraa angayuqra Judah-m, Israel-aat-llu tamalkuita yuullgutkelriari Judah-m, Benjamin-aami-llu:

⁴‘Waten qanertuq ATANEQ, Anguyagyaqunaki nakmiin tungayaten. Uterceski tamalkuita yuut kingunratnun, man'a waten pilria wiinga pisqucimtun piuq.’” Tua-i maliggluku ATANREM pisqutii utertut anguyagyarturpek'naku Jeroboam-aaq.

⁵Rehoboam-aaq uitaurtuq Jerusalem-aami ukuni-llu nunarpagni Judah-mi Benjamin-aami-llu asvairqumalrianek pilivkariuq.

⁶Bethelehem, Etam, Tekoa,

⁷Bethzur, Soco, Adullum,

⁸Gath, Mareshah, Ziph,

⁹Adoraim, Lachish, Azekah,

¹⁰Zorah, Aijalon, Hebron-aaq-llu, cayailkutalget nunarpiit Judah-melnguut Benjamin-aami-llu.

¹¹Asvairulluki cayailkutkaitnek pilivkarillruuq atauciuqaqluki-llu ciuliqagtekaitnek nakmiluni, qemagciluni neqnek, uqumek, wine-anek-llu tamalkuitnun,

¹²cali-llu anguyagmi capkutanek narulkautnek-llu. Waten pillermikun Judah, Benjamin-aaq-llu ataniumallruak.

¹³Tamiin-llu Israel-aami uitalriit agayulirtet Levite-at-llu quyurtut Judah-mun.

¹⁴Tua-i Levite-at unitait marat katngaat nervik'laqait allat-llu nunauteteng tailuteng-llu Judah-mun Jerusalem-aamun-llu, tua-i-wa Israel-aam Angayuqran Jeroboam-aam, kingumikun-llu angayuqruarkat, ancaceteng kevgiullratnek agayulirten͞guluteng ATANERMUN.

¹⁵Nakmikiluni-llu nakmiin agayulirtekaminek agayutnguanun agayularvigni, agayulaasqelluki-llu satyr-aanun, agayutnguanun-llu kuluvaguanun angucaluruanun piliallminun.

¹⁶Imkut-llu ircaqumegteggun piciuluteng agayuyulriit ATANERMUN, Israel-aam Agayutiinun, maligtait Levite-at Jerusalem-aamun, ekuaginaluteng ATANERMUN, Agayutiitnun ciuliameng.

¹⁷Mat'um pillrata pinircaraa angayuqauvia Judah-m, allrakuni-llu pingayuni umyuallguciraat Rehoboam-aaq qetunraa Solomon-aam, yuuluteng-llu pillrucimegcetun maliggluku piciryaraak Angayuqam David-aam Angayuqam-llu Solomon.

¹⁸Rehoboam-aam nuliqsagutellrua Mahalath-aaq Jerimoth-aam pania David-aam qetunraan, aanangqellruluni Abihail-amek, Eliab-aam panikluku Jesse-m-llu tutgaqluku.

¹⁹Qetunranglutek-llu pingayunek: Jeush, Shemaiah, Zaham-aamek-llu.

²⁰Tamatum-llu kinguakun nuliqsagutaa Maacah, Absalom-aam pania, qetunranglutek-llu cetamanek: Abijah, Attai, Ziza, Shelomith-aaq-llu.

²¹Rehoboam-aam kenkaa Maacah, Absalom-aam pania, pinruluku tamalkuitni allani nuliamini nuliaruami-llu (akimiaq pingayunek (18) nuliangqellruuq, yuinarnek-llu pingayunek (60) nuliaruarluni, yuinarnek-llu pingayunlegnek (28) qetunrarluni yuinarnek-llu pingayunek (60) paningqerrluni);

²²Rehoboam-aam-llu nakmikaa Abijah Maacah-m qetunraa ciuqliurrluku anelgutainun, nakmikluku angayuqrurrnaluku kingumikun.

²³Umyuangqerrluni caliarkitai qetunrani elkarrluki-llu tamiini Judah-mi Benjamin-aami-llu asvairquciumalrianun nunarpagnun. Pikirluki-llu ikgetenrilngurnek cali nulirkaitnek piluki.