Read Yupik 2 Chronicles 13 Bible Online

2 Chronicles 13 - Yupik bible

2 Chronicles 13

¹Allrakut akimiaq pingayunek cipluku (18) Angayuqam Jeroboam-aam ataniullran Israel-aami, Abijah ayagnirtuq ataniungluni Judah-mi.

²Ataniullruuq-llu pingayuni allrakuni Jerusalem-aami. Aanii atengqellruuq Micaiah-mek, panikluku Uriel-aam kingunelgem nunarpiinek Gibeah-m. Anguyautuk-llu Abijah-nkuk Jeroboam-aaq-llu

³Abijah anguyagyarturtuq anguyagtengqerrluni alinguraranrilngurnek avuranek angutnek, amllertalrianek yuinaat yuinaat tiissitsaat (400,000); Jeroboam-aam-llu ingluliraa anguyagtengqerrluni tiissitsaam avga yuinarnek-llu akimiarnek tiissitsaanek (800,000) avuranek pinilrianek anguyagten̄ek.

⁴Anguyagtet-llu kassuutut qemililriami Ephraim-aam nuniini. Angayuqaq Abijah mayurtuq Mount Zemaraim-aamun qayagaurauq-llu Jeroboam-aamun Israelite-anun-llu, “Niicugninga, Jeroboam-aaq, Israel-aani-llu tamarpeci!

⁵Nallunritarci-qaa ATANEQ Israel-aam Agayutii, navgumasciigalngurmek akqut'lillruuq David-aaq pillgutekluku, cikirluku kinguvri-llu angayuqaucimek Israel-aanun qangvarpak?

⁶Tau͡gaam Jeroboam-aaq Nebat-aam qetunraa, inglulitellruuq Solomon-aamun angayuqaminun.

⁷Atatakuani-llu cautngunrilnguut angutet quyurtai ellminun, inglukluku Rehoboam-aaq Solomon-aam qetunraa, tauna ayagyuartuq elisngavkenaku-llu qaillun ingluliullerkait.

⁸Waniwa-llu umyuartequten inglulirnaluku angayuqaucim piyunarqucia ATANREM David-aam kinguvrinun cikiutekellra. Anguyagceci amlleqapigtut, malikaci-llu suulutaat angucaluruat kuluviit Jeroboam-aam piliallri elpecen̄un agayutkesqelluki.

⁹Antellruaci ATANREM agayulirtai, kinguvri Aaron-aam, antellruaci-llu Levite-at. Cimirluki-llu taqulluci agayulirten̄ek pilauciicetun allat nunat yuita. Kina tailria angucalumek kuluvagmek tailluni wall'u malrunlegnek angucalunek qusnginek atawaqercecesqelluni ellminek agayulirten͞gurrluni tamakunun ap'laq'ngavcen̄un agayutevcen̄un.

¹⁰“Tau͡gaam wangkuta cali kevgiurarput ATANEQ Agayutvut cakaaqsaunaku-llu. Agayulirtengqertukut kevgiulrianek ATANERMUN Aaron-aam kinguvrinek, Levite-atanek-llu ikayurtaitnek.

¹¹Elliilartut unuakut tamalkuita atakut-llu tamalkuita, ekuagiluteng-llu elliitnek, aruviarluteng-llu narnirqellrianek naunrarnek, elliaqluku kelipaq tangrrumaarkaq estuulumun suulutaarrlainarmun, aulukluku-llu suulutaaq kenurram ellimauvia kenurraa kumasqelluku atakut tamalkuita; tua-i-wa maligcamteggu pisqutii ATANREM, elpeci tau͡gaam cakaallruarci.

¹²Agayutem elliinguluni nayuraakut ciuliqaggluta, agayulirtai-llu cupu'uryarangqerrluteng, upingaluteng cupu'uryaraq cuplerkaanun qayagaarkauluta anguyaasqelluta elpecen̄un. Israel-aam yuini, callunrici ATANEQ inglulirluku, Agayutiit ciuliarpeci; piluaqerngailavci.”

¹³Jeroboam-aaq ayagcecillruuq alangiilluki kingunratgun Judah-m anguyagtain callugtekaitnek, ilait-llu uitaluteng Judah-m anguyagtain ciuqerratni caumaluki.

¹⁴Judean-aat-llu kiarcameng tangrrait ingluteng ciunermeggni kingunermeggni-llu uitaciit. Qayagaut-llu ATANERMUN ikayuusqelluteng, agayulirtet-llu cupu'uryarat cupait.

¹⁵Tua-llu Judean-aat qastuluteng qayagpagtut anguyiim qayagaurutketukiinek, ciuliqagterluteng-llu Abijah-mek curugtut; Agayutem cirlakaa Jeroboam-aaq Israelite-at-llu anguyagtet.

¹⁶Israelite-at-llu qimagait Judean-aat, Agayutem-llu Judean-aanun cirlakevkarai.

¹⁷Abijah-m anguyagtain-llu Israelite-at tuqurqait amlleqapigtellriit; tua-i miilicaam avgi (500,000) Israel-aam nakmikumalriit anguyagtai tuqucimaut.

¹⁸Tuaten tua-i Israel-aam anguyagtai nepairtait taum nalliini, Judah-m-llu anguyagtai cirlakiut, tua-i-wa ATANEQ cacetuqutekngamegteggu, Agayutiit ciuliameng.

¹⁹Abijah-m-llu maligtaa Jeroboam-aaq, teguluki-llu nunarpautain ilait: Bethel-aaq, Jeshanah, Ephron-aaq-llu, nunarraat-llu uitalriit malleggluki ukut nunarpiit.

²⁰Jeroboam-aam pinini ataam tegunqigtenritaa Abijah-m angayuqaullran nalliini. ATANREM-llu iqutaa, tuquuq-llu.

²¹Tau͡gaam Abijah piniriinartuq. Nuliangluni-llu akimiarunrita'arnek, qetunrangluni-llu yuinaq malrugnek cipluku (22), paningluni-llu akimiaq ataucimek cipluku (16).

²²Allat Abijah-m pillri, piciryarai qanellri-llu, igausngaut ukuni: Prophet-aam Iddo-m Qanemcia.