Read Yupik 2 Chronicles 15 Bible Online

2 Chronicles 15 - Yupik bible

2 Chronicles 15

¹Anernera Agayutem tut'uq Azariah-mun Oded-am qetunraanun,

²an'uq-llu pairrsaagluku Asa, qanrulluku-llu, “Niicugnicia, Asa, tamarpeci-llu Judah-m Benjamin-aam-llu yuini: ATANREM nayurciqaaci elliinetaurquvci. Yuaquvciu, nataqevkarciquq, tau͡gaam cakaaquvcen̄i, elliin cakaarciqaaci.

³Ak'anun Israel-aaq yuullruuq piciulriamek Agayutaunani, agayulirtaunani elitnauristekaminek, alerquutaunani-llu.

⁴Tau͡gaam arenqiallugtellermeggni tuigtellruut ATANERMUN, Agayutiinun Israel-aam. Yuallruat nalaqluku-llu.

⁵Tamakuni ernerni kina natmun ullautesciiganani, aarniurpek'nani-llu natmun ayagciiganani, tua-i arenqiallugnaq uitacurlagnaq-llu nunami tamiini uitiin.

⁶Navguumallruut itumcimaluteng, atanruviit inglukluki allat atanruviit, nunarpiit inglukluki allat nunarpiit, tua-i-wa Agayun taican arenqiallugutmek uitacurlagmek-llu ellaitnun.

⁷Tau͡gaam elpeci pinirluci pinarqaaci qacuiqsaunaci-llu. Caliarci nunuliumaarkaungan.”

⁸Asa-m makut tekitarkat qaneryarat niicamiki Azariah-m, Oded-am qetunraan, qanrutkellri caceturiuq, au͡g'arluki-llu pellernarqellriit agayutnguat Judah-m Benjamin-aam-llu nuniignek, tamalkuita-llu agayutnguat nunarpagni tegullminek pengulilriami Ephraim-aam nuniini, kituggluku-llu ekuavia ATANREM ciuqerranelnguq Agayuvigpiim iteryaraan.

⁹Amlleret yuut ingluallruut Asa-mun Ephraim-aamek, Manasseh-mek, Simeon-aamek-llu, uitaluteng-llu elliin angayuqauviani, tangllermegteggu-wa ATANERMUN nayuucia. Asa-m-llu taisqai yuut tamalkuita Judah-nkuk-llu Benjamin-aaq-llu yuk'ek.

¹⁰Quyurtellruut Jerusalem-aami pingayuatni iralut allrakut Asa-m ataniullran akimiaratni.

¹¹Tuani ernermi elliillruut ATANERMUN, ut'rutlermeggnek uayaaqenganek: tiissitsaam avga yuinarnek qulnek cipluku (700) kuluvagnek, tiissitsaam-llu avga yuinarnek qulnek cipluku (700) qusnginek.

¹²Akqiut-llu agayulararkauluteng ATANERMUN, Agayutiitnun ciuliameng, ircaquteng yuuciteng-llu tamalkirrluki.

¹³Kina-llu ayagyuaq wall'u ak'allaurtellria, angun wall'u arnaq, elliinun agayunrilnguq tuqucimaarkauluni.

¹⁴Qastuluteng-llu akqiut ATANREM atrakun akqun aturarkauluku, qayagpagtut-llu, cupu'uryarat-llu qalrialuki.

¹⁵Tamarmeng-llu Judah-m yuin angniutekaat akqut'lillerteng; akqillruameng-wa tamalkirrluki ircaquteng. Angniutekaat-llu agayullerteng ATANERMUN, elliin-llu ciuniurai uitanqegcitmek-llu cikirluki naken tamiinek.

¹⁶Angayuqam Asa-m au͡g'allrua maurluni Maacah, aqumlleranek queen-mother-aarullranek, tangniilngurmek agayutngualillruan qingarcecitulimek Asherah-mek. Asa-m iqutaa agayutnguaq, eqiurluku-llu, ekualuku-llu Kidron Valley-mi.

¹⁷Asa-m-llu piunrirtellrunrilngermiki tamalkuita agayutnguanun agayularviit tamaani nunami, ellii piciullruuq ATANERMUN unguvallmi taktaciatun.

¹⁸Elliluki-llu Agayuvigpagmun cat tamalkuita atami, Abijah-m, urenkutmek cikiutellri Agayutmun, cat-llu suulutaamek qerrirlimek-llu piliaqumalriit elliin cikiutellni.

¹⁹Anguyanqigtellrunritut-llu Asa-m ataniullra allrakut yuinaq akimiarmek cipluku (35) tekilluku.