Read Yupik 2 Chronicles 16 Bible Online

2 Chronicles 16 - Yupik bible

2 Chronicles 16

¹Allrakut yuinaq akimiaq pingayunlegnek cipneratni (36) Asa-m ataniullran, Israel-aam Angayuqra Baasham-aaq itertuq Judah-mun asvairqucirluku-llu Ramah umgutnaluki itellriit anelriit-llu Judah-mek.

²Tua-llu Asa-m tegui qerrirlit suulutaat-llu qemangqaari Agayuvigpiim angayuqam-llu eniin, tuyuqluki-llu Syria-m Angayuqranun Benhadad-amun, mat'umek qanerkamek tapirluki:

³“Iliksagulluk, atapuk pillruciagtun. Una qerrirliq suulutaaq-llu cikiutnguuq elpenun. Watua ililiutellren Israel-aam Angayuqranun Baasha-mun kepiu pinritevkenani anguyagten̄i anutnaurai nunamnek.”

⁴Benhadad-aaq-llu umyuallguciutuq Asa-m piyuutiinun, ayagcelluki-llu anguyagtem̄i atanirturtait anguyagtait-llu anguyagyarturluki nunarpai Israel-aam. Teguat-llu Ijon-aq, Dan-aq, Abel Beth Maacah-llu, tamalkuita-llu Naphtali-m nunarpai aklut qemangqaviit.

⁵Baasha-m niicamiki makut, arulairtuq asvairqellerminek Ramah, unilluku-llu caliani.

⁶Angayuqam-llu Asa-m quyurtai angutet tamiinek Judah-mek ayautelluki-llu teggalqut muriit-llu Baasha-m atullri Ramah-mi, tamakut-llu aturluki asvairqait nunarpai Geba Mizpah-m-llu.

⁷Taum nalliini prophet-aam Hanani-m ullagaa Angayuqaq Asa-mun qanerluni-llu, “Cacetuqutekellruavgu angayuqra Syria-m cacetuqutekevkenaku ATANEQ Agayuten, angayuqran Syria-m anguyagtain qimallruatgen.

⁸Ethiopian-aat-qaa Libyan-aat-llu amlleqapiaralrianek anguyagtengqellrunritut, amllernek-llu akalrialegnek pekcessuuterluteng, horse-aalegnek-llu anguyagterluteng? Tau͡gaam cacetuqutekellruavgu ATANEQ, elpenun cirlakevkallrui.

⁹ATANREM murilkelaraa ellarpak tamalkuan, pinilirnaluki ircaqumegteggun ellminun piciulriit. Umyugaunak mat'umek piuten, taumek wak'nirnek ayagluten anguyagglainarciquten.”

¹⁰Asa-m-llu qenrutaa prophet-aaq, kalivnelirluku-llu itercivigmun ellivkaraa, tua-i cakneq qenrucamiu man'a pitekluku. Taum-llu nalliini Asa-m takumcukevkenaki yuut ilait pingai.

¹¹Tamarmeng pillret Asa-m ataniullrani ciuqlirmek nangnermun igausngaut ukuni: Ayuqucillrat Angayuqrin Judah-m Israel-aam-llu.

¹²Allrakut yuinaak malruunrita'arlukek Asa angayuqaullmini piyuasciigaliuq assiitellriim nangtequtem it'gai piluki; tau͡gken tuatnange'rmi caullrunrituq ATANERMUN ikayuusqelluni, yungcaristen̄un tau͡gaam.

¹³Allrakuk-llu malruk kinguagni tuquuq ataniullmi yuinaak malruk ataucimek ciplukek (41) allrakuani

¹⁴tungmagtaat-llu teggalqumun qungumun elliin elallranun Nunarpiini David-aam. Elkartaat tungmagcimaqatalriit uitaviatnun imalegmun ayuqenrilngurnek tepkegcilrianek uptellrinek tepkegcautnek pilitulim; angelriamek-llu ekurpalriamek kumarciut angniilutekluku tuqullra.