Read Yupik 2 Chronicles 17 Bible Online

2 Chronicles 17 - Yupik bible

2 Chronicles 17

¹Jehoshaphat-aaq ataniurtuq atami kinguakun, ingluliurutni-llu Israel-aam tungiinun pinircarai.

²Anguyagten̄ek elkarciluni tamalkuitnun asvairqumalrianun nunarpainun Judah-m, anguyagtet-llu enaitnek nuniini Judah-m, nunarpaini-llu Ephraim-aam Asa-m atami tegullrini.

³ATANREM nayullrua Jehoshaphat-aaq, tua-i-wa maligcaku atami ayagniqarraallermini ayuqucillra, agayuksaunani-llu Baal-anun.

⁴Kevgiullrua atami Agayutii, maligtaquluki Agayutem alerquutai, Israel-aat-llu angayuqrita piciryaraicetun pivkenani.

⁵Taumek ATANREM cikiumakii caqtaanrilngurmek ataniullranek Judah-m angayuqauvian, tamarmeng-llu yui cikiutnek taitelaraat, tua-i tukuurtuq angelriamek-llu qigcikumaluni.

⁶Elliin-llu angniutek'laraa kevgiullni ATANERMUN piunrirrluki-llu agayutnguanun agayularviit, nallunairutai-llu arnam agayutnguam Asherim-aam Judah-melnguut.

⁷Pingayuatni allrakut ataniullmi ayagcetai ukut atanerruani: Benhail-aq, Obadiah, Zechariah, Nethanel, Micaiah-q-llu elitnaurisqelluki nunarpaini Judah-m.

⁸Malingqellruut-llu qulngunrita'arnek Levite-anek malrugnek-llu agayulirtegnek. Levite-at ukuugut: Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, Tobadonijah-llu; agayulirtek-llu Elishama Jehoram-aaq-llu.

⁹Malikluki Kalikaat Alerquutiinek ATANREM ayagaut tamalkuitnun nunarpainun Judah-m elitnaurutekluki yugnun.

¹⁰ATANREM-llu tamalkuita nunam angayuqauvii, avatiinelnguut Judah-m, alingevkarai anguyallerkaatnek Angayuqaq Jehoshaphat-aaq inglukluku.

¹¹Ilaita Philistine-at taitaat Jehoshaphat-aaq amllermek qerrirlimek, allanek-llu cikiutnek akiliutekluki elliinun ikayuumasqelluni inglukestem̄i pikatni, Arab-at-llu taismiat malrunlegnek tiissitsaanek tiissitsaam-llu avga cipluku yuinarnek qulnek (7,700) angucalunek qusnginek, cali tiissitsaanek tiissitsaam-llu avga cipluku yuinarnek qulnek (7,700) angucalunek qusngirngalngurnek.

¹²Jehoshaphat-aaq-llu piniriinartuq angliriurtuq. Judah-mi-llu nauciuq asvairquciumalrianek nunarpagnek-llu,

¹³tamakuni-llu amlleqapigtellriit aklut qemangqalartut. Jerusalem-aamun-llu elkarciluni anguyagten̄ek, angutnek pinilrianek alinguraranrilngurnek,

¹⁴tungayakutellrat maliggluki. Adnah atanirturtekellruat anguyagtet yuullgutkellriarinek Judah-m, anguyagtengqellruuq pinilrianek alinguraranrilngurnek yuinaat akimiarnek cipluku tiissitsaanek (300,000).

¹⁵Tungiini-llu Jehohanan-aaq, anguyagterluni akimiarunrita'arnek tiissitsaanek (280,000),

¹⁶pingayuat-llu Amasiah Zichri-m qetunraa, anguyagterluni pinilrianek alinguraranrilngurnek yuinarnek qulnek tiissitsaanek (200,000). (Ellminek piyugluni kevgiulria ATANERMUN.)

¹⁷Atanirturtiit anguyagtet Benjamin-aam yuullgutkelriarinek Eliada, pinilria angun alinguraranrilnguq, anguyagterluni yuinarnek qulnek tiissitsaanek (200,000) urluvernek capkutanek-llu caskulegnek.

¹⁸Tungiikun-llu Jehozabad-aaq anguyagterluni yuinarnek qulngunrita'arnek tiissitsaanek (180,000), anguyagmun pitalqellrianek caskulegnek.

¹⁹Ukut kevgiulriaruut angayuqamun Jerusalem-aami, avatiitgun-llu elkarcillruuq allanek asvairquciumalrianun nunarpainun Judah-m.