Read Yupik 2 Chronicles 18 Bible Online

2 Chronicles 18 - Yupik bible

2 Chronicles 18

¹Judah-m Angayuqra Jehoshaphat-aaq tukuurcami niitnaurrluni-llu, ilami iliita kassuutellerkaa arenqigtellrua iliitnun ilakellriarin Israel-aam Angayuqran Ahab-am.

²Qavcin allrakut kinguatgun Jehoshaphat-aaq ayagtuq Samaria-mun Ahab-aq sen̄irrluku. Ciuniurluku Jehoshaphat-aaq malii-llu Ahab-aq tuqucivkariuq amllernek qusnginek kuluvagnek-llu nererpautekaminek. Eguaqungnaqsaaqaa-llu Jehoshaphat-aaq pillguciisqelluni anguyallerminiu Ramoth-aaq Gilead-aamelnguq.

³Aptuq, “Maligciiqerpenga-qaa Ramoth-aamun Gilead-aamelngurmun?” Jehoshaphat-aam kiugaa, “Upingaunga upingakuvet, anguyagtenka-llu upingaut. Pillgucirciqamteggen anguyakuvet.”

⁴Qanellni-llu ilaluku, “Ciumek tau͡gaam apqaarnaurpuk ATANEQ.”

⁵Tua-llu Ahab-am taisqai prophet-aat, tayima yuinarnek yuinarnek (400) amllertaut, apluki-llu, “Ayaglua-qaa anguyaglaku Ramoth-aaq, wall'u-qaa uitallaku?” Taukut-llu kiugut, “Anguyaggu, Agayutem cirlakivkarciqaaten.”

⁶Tau͡gaam Jehoshaphat-aaq aptuq, “Allamek-qaa prophet-aamek pitaituq tumekluku ATANEQ apcugngakemten̄ek?”

⁷Ahab-am-llu kiugaa, “Ataucimek pitangqertuq, Micaiah-mek Imla-m qetunraanek. Wiinga tau͡gaam cakneq uumikaqa, tekitarkamnek wangnun assilriamek qanyuilan; assiiterrlainalriamek tau͡gaam qanlaan.” Jehoshaphat-aam-llu kiugaa, “Tuaten qanyunaitaaten!”

⁸Tua-i Angayuqaq Ahab-aq taisqiuq atanerruamek qanrulluku-llu, “Wanirpak Micaiah Imla-m qetunraa aqvau.”

⁹Tuani ukuk malruk angayuqak, aturarlutek angayuqertarnek aqumgauk aqumllitamegni mukaarkanek carririvigmi, elatiitni ikirtuqat iteryaraan Samaria-m; ciuqerragni-wa tamarmeng prophet-aat tekitarkanek qalartellriit.

¹⁰Iliit, Zedekiah Chenaanah-m qetunraa, cirunregnek caviignek piliuq qanerluni-llu Ahab-amun, “Waten ATANEQ qanertuq, ‘Ukugnek caskirluten callugciqaten Syrian-aat cirlakqapiggluki-llu.’”

¹¹Tamarmeng-llu prophet-aat tuaten qanertut. Qanerluteng, “Ayii inglulirluku Ramoth-aaq cirlakciqan. ATANREM cikirciqaaten qakvautmek.”

¹²Tua-llu imna atanerruaq Micaiah-m aqvastellra qanertuq elliinun, “Tamarmeng allat prophet-aat qanertut angayuqaq piluaqerciqniluku, elpet-llu tuaten ayuqellriamek qanqina.”

¹³Micaiah tau͡gaam kiuguq, “ATANEQ unguvaciatun, Agayutma qanresqellranek qanerciqua!”

¹⁴Tua-i-llu Micaiah nangercan Angayuqam Ahab-am ciuqerranun, angayuqam aptaa, “Micaiah, Jehoshaphat-aaq-llu-qaa ayayunarqaakuk anguyagyarturluku Ramoth-aaq, wall'u-qaa anguyagyartunrillauk?” “Anguyagyarturtegu!” Micaiah-m kiugaa. “Pinritevkenatek cirlakiciqutek. ATANREM qakvautmek cikirciqaatek.”

¹⁵Tau͡gaam Ahab-aq kiuguq, “Qalarutaqavnga ATANREM atrakun, piciulriamek qanrarkauguten! Qavcirqunek tamatumek qanrutqatalarciken?”

¹⁶Micaiah kiuguq, “Tangrranka Israel-aam anguyagtai sekavngaluki qemit qaingitni qusngitun qusngiliurtailngurtun. ATANEQ-llu qanertuq, ‘Ukut angutet ciuliqagtaitut; utertevkarciki uitanqegcitkun.’”

¹⁷Ahab-aq qanertuq, Jehoshaphat-aamun, “Qanrutellrunritamken-qaa tekitarkamek wii piteklua qanraqami assilriamek watqapik qanyuitniluku; assiitellriarurrlainarluki tau͡gaam!”

¹⁸Micaiah cali qanertuq, “Kitak niicugniu ATANREM qanellra! Tangrraqa ATANEQ aqumgaluni aqumllitamini qilagmi, tamarmeng-llu an'gilai nangerngaluteng caniani.

¹⁹ATANEQ-llu aptuq, ‘Kia iqluurciqau Ahab-aq, Israel-aam angayuqra, ayaasqelluku tuqutauyarturluku Ramoth-aami?’ Ilait an'gilat camek qanertut, ilait-llu cali allamek qanerluteng,

²⁰tua-i-llu anerneq ciuvarluni ullagaa ATANEQ, qanerluni-llu, ‘Wiinga iqluurciqaqa.’ ATANEQ aptuq, ‘Qaillun piluku?’

²¹Anerneq kiuguq, ‘Ayaglua tamalkuita Ahab-am prophet-aari iqluqutnek qalarceciiqanka.’ ATANEQ-llu qanertuq, ‘Ayagluten iqluuryarturru. Ukveqciqaaten.’”

²²Micaiah-llu nangnermek qanertuq, “Waten pillruuq. ATANREM ukunun prophet-aarpenun iqluurcetellruaten. Tau͡gaam ellii picirkirillruuq tekitarkaurtelluten picurlagmun!”

²³Prophet-aam Zedekiah-m ullagluku Micaiah qacartaa kegginaakun, apluku-llu, “Qangvaq ATANREM anerneran unitellruanga elpet-llu qalarulluten?”

²⁴Micaiah kiuguq, “Nallunrirciqan itquvet natmun enem iluqlianun iiryarturluten.”

²⁵Tua-i-llu Angayuqam Ahab-am alerquraa iliit atanerruami, “Teguluku Micaiah ayausgu Amon-aamun, nunarpiim atanranun, angayuqam-llu qetunraanun Joash-amun.

²⁶Qanrutniagken itercivigmun itertesqelluku kiingan kelipamek nerevkaraqluku mercetaqluku-llu cavkenii uterrnatkamnun.”

²⁷Micaiah-llu qanlertuq, “Cavkenak Ut'reskuvet ATANEQ qalartellrungaituq tumeklua!” Cali qanerluni, “Niiciu, tamarpeci, qanelqa!”

²⁸Tua-i Israel-aam Angayuqra Ahab-aq Judah-m-llu Angayuqra Jehoshaphat-aaq ayagtuk Ramoth-aamun Gilead-aamelngurmun anguyagyarturluku.

²⁹Ahab-aq-llu qanertuq Jehoshaphat-aamun, “Anguyalrianun pikumegnuk, aturaqenrilkemnek aturlua piciqua allaunguarlua, elpet angayuqertarnek aturarpenek aturluten pikina.” Tua-i Israel-aat angayuqrat anguyalrianun ullautuq aturaqenrilkem̄inek aturluni allaunguarluni.

³⁰Syria-m angayuqran picirkillrukai ayagassuutelget akalrialegnek atanerruarat allat pivkenaki kiingan Israel-aam angayuqra calluusqelluku.

³¹Tua-i tangllermeggni Angayuqaq Jehoshaphat-aaq, tamarmeng umyuartequt Israel-aamun angayuqaqsukluku, tuigtut-llu anguyakatarluku. Tau͡gaam Jehoshaphat-aaq qayagpagtuq, ATANREM-llu Agayutem aviutaa curukallrat-llu tuiggluku elliinek.

³²Akalrialegnek-llu ayagassuutelget atanirturtaita elpekaat Israel-aamun angayuqaqenrilucia, malirqallermeggnek-llu taqluku.

³³Tau͡gaam pitsaqa'artevkenaku Syrian-aam anguyagtem pitgaraa Angayuqaq Ahab-aq capkutaan arivneran akuliikun. Qayagpagtuq-llu ayagassuutmi alulartiinun, “Kingutmun cauluten ani anguyagmek!”

³⁴Tua-i callullrat tukniriuq tuani ernermi, Israel-aat-llu angayuqrat akicirluni aqumgallruuq akalrialgegni ayagassuutmini, Syrian-aat caumaluki. Akertem-llu tevillrani tuquuq.