Read Yupik 2 Chronicles 2 Bible Online

2 Chronicles 2 - Yupik bible

2 Chronicles 2

¹Angayuqaq Solomon-aaq piarkaurtuq agayuvigpagmek pilinaluni ATANERMUN agayularvigkamek, angayuqam-llu eniinek pikaminek.

²Angutet-llu tiissitsaat yuinaat pingayun qulmek cipluku (70,000) amllertalriit calivkarai ayagacisten͞guluki caliarkanek, yuinarnek-llu cetamanek tiissitsaanek (80,000) teggalqut kepurtekaitnek qemililriami nunami, pingayun-llu tiissitsaat tiissitsaam-llu avga yuinarnek tallimanek cipingalriit (3,600) ayuqucirtuasten͞gusqelluki caliamun.

³Solomon-aaq-llu ayagceciuq qanermek Hiram-aamun angayuqranun Tyre-am: “Calillgutkia ataka, Angayuqaq David-aaq, pillrucirpetun tun'ivikellerpeni cedar-aanek muraganek eniinun piliaqellrani atu'urkainek.

⁴Piliqatartua agayuvigpagmek ATANREM Agayutem pikaanek. Tanqilriaruciquq, tuani wiinga yuunka-llu agayularciqukut elliinun aruviarallemteggun tepkegcilrianek, cali kesianek elliivik'larciqaput tanqilriamek kelipamek, elliilarciqukut-llu ekualuki unuakumi, atakumi, Sabbath-aani, New Moon Festival-aani, allani-llu tanqilriani ernerni ATANERMUN Agayutemten̄un. Elliin Israel-aaq alerqullrua waten piuralaasqelluku akwarpak.

⁵Umyuangqertua naucinalua angelriamek agayuvigpagmek, tua-i wangkuta Agayutvut angenruan allani agayutni.

⁶Kina tau͡gken tua-i piliyugngavkenani agayuvigpagmek Agayutem pikaanek, tua-i-wa qilak-llu pivigtuqapigteng'e'rmi elliinun engelqerrunrilan. Qaillun-mi tua-i wiinga piliciqsia agayuvigpagmek Agayutmun aruviarnek ekuagivikelallerkaan angenqekiinek?

⁷Taumek watua taivkari angutmek elisngalriamek caliaqsaraanek suulutaam, qerrirlim, punernerem, caviim, piliyaramek-llu 'lumarrarnek qiuglinek, qesurlinek, kavirlinek-llu, igaryaramek-llu elitnaurumalriamek. Calillgutkeciqai elisngalriit calistet Judah-mi Jerusalem-aami-llu uitalriit David-aam atama nakmikellri.

⁸Tuyurlua-llu cedar-aanek, cypress-aanek, juniper-aanek-llu muragnek Lebanon-aamek, nallunrilamku pistevvet elisngait kepurillerkarteng napanek Lebanon-aami. Upingaunga ayagcetnaluki pistenka ikayuryarturluki pisteten

⁹upcillratni napanek amlleriluki, tua-i agayuvigpak piliarkaqa angelriaruciqngan ucurnarqelriaruluni-llu.

¹⁰Neqkaitnek napaliurtet pisteten taivkariciqua cuqnek yuinarnek tallimanek tiissitsaanek (100,000) mukaarkanek, tiissitsaanek-llu yuinarnek tallimanek (100,000) cuqnek mukaarkanek barley-mek, yuinaat-llu talliman qulmek cipluku tiissitsaanek (110,000) gallon-aanek wine-amek, yuinaat-llu talliman qulmek cipluku tiissitsaanek (110,000) gallon-aanek olive-aat uquitnek.”

¹¹Angayuqam Hiram-aam Solomon-aaq kiugaa igakun, “ATANREM kenekngamiki yun'i angayuqrurtellruaten ellaitnun.

¹²Nanraumali ATANEQ, Agayutii Israel-aam, Piliaqestii qiliim nunam-llu! Cikillrukii Angayuqaq David-aaq umyuartulriamek qetunramek, murilkelluni mulngakelriamek taringumaluni-llu, maa-i-llu picirkiurluni agayuvigpagmek piliarkamek ATANREM pikaanek, angayuqam-llu eniinek pikaminek.

¹³Tuyuramken elisngalriamek angutmek, taringketalriaruluni at'legmek Huram-aamek.

¹⁴Aanii ilakellruat Dan-am yuullgutkelriartain, atii-llu nutem Tyre-armiunguluni. Elitnaurumauq caliyaramek suulutaanek, qerrirlinek, punernernek, cavignek, teggalqunek, muragnek, 'lumarrarnek qesurlinek, qiuglinek, kavirlinek-llu, 'lumarraqegtaarnek-llu. Caliyugngaluni ayuqenrilngurnek igaryaranek, qaralimek-llu qaillun ayuqelriamek pilisqumallni maliggluku piliyugngaluni. Calillgutkevkarki elisngalriit calisteten, atavet-llu Angayuqam David-aam calistekellri.

¹⁵Taumek watua taivkari mukaarkanek, barley-nek, wine-amek, olive-aat-llu uquitnek akqutkellerpenek.

¹⁶Kepuriciqukut cedar-aanek napanek Lebanon-aam ingriinek nurutarkauvkarpek'nak, taiciiqaput quyurrluki qillrulluki angyarrluliluki imarpigkun Joppa-mun. Tuaken ayautniaten Jerusalem-aamun.”

¹⁷Angayuqam Solomon-aam naaqai yuut tekitaat Israel-aam nuniini uitalriit, atami David-aam naaqevkaumallruciitun; maaten piit yuinaat malrunelgen qula pingayunek tiissitsaat tiissitsaam-llu avga yuinarnek tallimanek cipluku (153,600) tekitaat amllertaluteng.

¹⁸Ilait-llu yuinaat pingayun qulmek tiissitsaat (70,000) amllertalriit calivkarai ayagacesten͞guluki caliarkanek, yuinaat-llu cetaman (80,000) teggalqunek elucilirten͞gurtai ingrini, tiissitsaat-llu pingayun tiissitsaam-llu avga yuinarnek tallimanek cipingalriit (3,600) ayuqucirtuasten͞gurrluki caliam assirluni taqlerkaanun.