Read Yupik 2 Chronicles 20 Bible Online

2 Chronicles 20 - Yupik bible

2 Chronicles 20

¹Mat'um kinguani anguyagtait Moab-at Ammon-aat-llu, ilimeggnek Meunite-anek maligluteng itraat Judah.

²Qaneryartulriit-llu kevgat tekitut qanerluteng-llu Jehoshaphat-aamun: “Anguyagtet amllellriit taigut Edom-aamek Dead Sea-m akilirneranek anguyagyarturluten. Ak'a-llu tegullruluku Hazazon Tamar-aq.” (Una cali atqaa Engedi-am.)

³Tua-i Jehoshaphat-aaq alinguq, ATANEQ-llu piicagvikaa ciuliqagtesqelluni. Tamiini-llu Judah-mi alerqurai iyaagesqelluki.

⁴Judah-m-llu tamalkuitnek nunarpainek yuut cukangnaqluteng taigut Jerusalem-aamun ATANEQ piicagviksarturluku ciuliqagtesqelluteng,

⁵yuut-llu taukut, Jerusalem-aam-llu yui, quyurtut nutaramun carr'ilngurmun Agayuvigpiim ciuqerranelngurmun. Angayuqaq-llu Jehoshaphat-aaq nangertuq ciuqerratnun

⁶qastuluni-llu piicagluni, “ATANEQ, Agayutiita ciuliamta, qilagmek ataniularaten tamalkuita angayuqauviit ellarpagmi. Elpet pinilriaruuten caperrsuyuunak-llu, kia-llu inglulirciiganak.

⁷Elpet wangkuta Agayutkamteggen. Yut'en Israel-aat taillratni maavet nunamun, antellruaten yuut tamalkuita maani uitalriit, cikiutekluku-llu nuna Abraham-aam kinguvrinun, yugnikek'ngarpet, ellaitnun pikesqelluku akwanun.

⁸Ellaita-llu uitavikellruat, agayuvigpaliluteng elpenun, qanerluteng,

⁹‘Assiitellriim tekiskakut, nuussirpiim, qanercetaarutem, cangerliim, wall'u piitnam, nangerciiqukut uum enem ciuqerranun, elpet-llu ciuqerpenun, atren uumi enemi uitiin, qayagaluten-llu nangcimallemten̄i, elpet-llu niilluta anirturciqerpekut.’

¹⁰“Wani-wa Ammon-aam, Moab-am, Edom-aam-llu yuin anguyagaitkut. Ciuliaput anellratni Egypt-aamek tamakunun nunanun itercetellrunritaten, taumek ciuliamta negullruit piunrirpek'naki-llu.

¹¹Waniwa waten akinauraakut tailuteng anetnaluta nunamek cikiuteklerpenek wangkutnun.

¹²Elpet wangkuta Agayutkamteggen! Anucimirqecetaarki, tua-i wangkuta pinimek piilamta ukut amllellriit anguyagtet ullagtemta ciunratni. Callerkarput nalluarput, tau͡gaam elpet tangrramteggen ikayuusqelluta.”

¹³Judah-m angutai tamarmeng, nuliateng irniateng-llu ilakluki, nangerngaut tuani Agayuvigpagmi.

¹⁴ATANREM-llu Anernera tut'uq Levite-amun tuani quyungqalriani uitalriamun. Atengqertuq Jahaziel-aamek Zechariah-m qetunraqluku; ilakaat Asaph-aam tungayakellriarin kinguveqluku Asaph-aam Mattaniah-kun, Jeiel-aakun, Benaiah-kun-llu.

¹⁵Jahaziel-aaq-llu qanertuq, “Niicugnici, tamarpeci Judah-m Jerusalem-aam-llu yuini, Angayuqaq-llu Jehoshaphat-aaq, ATANEQ qanertuq elpecen̄un, Alingenrici, caperrsuutekenriciki-llu ukut yugugaat; anguyak Agayutmun atauq, elpecen̄un pivkenani.

¹⁶Unuaqu curukiciki mayullratni tumyarakun Ziz-ami. Pairciiqaci kuignayuum iquani ayalriami yuilqumun nunamun yaaqsinrilkiini Jeruel-aam.

¹⁷Callugnaqngaituci uumi anguyagmi. Uitavigkarpecen̄un tau͡gaam elkarrluci utaqakici; tangerciqerci ATANREM qakvautii elpeci pitekluci. Judah-m Jerusalem-aam-llu yuini, nalirrugcaqunaci wall'u alingluci. Ankici anguyagmun, ATANREM-llu nayurciqaaci.”

¹⁸Jehoshaphat-aaq-llu put'uq kegginani nunamun agtuulluku, yuut-llu tamarmeng pillgucirluku ciktut ATANREM ciuqerranun ciktaarvikluku.

¹⁹Levite-at-llu tungelqurrit Kohathite-at, Korahite-at-llu nangertut qayagpagluteng-llu qastuluteng nanraraat ATANEQ, Israel-aam Agayutii.

²⁰Unuaquan-llu makcara'arluteng unuakuayaarmi ayagtut Tekoa-m yuilqurtaanun; annginanermeggni Jehoshaphat-aaq nangerrluni qanertuq, “Niicia, Judah-m yuini, Jerusalem-aam-llu yuini! Cacetuqutekiciu ATANEQ Agayutsi, calligcimangaituci-llu. Ukveqiciki prophet-aarin qanellrit elpecen̄un, piluaqerciquci-llu.”

²¹Qanellgutkerraarluki-llu yuut, angayuqam picirkirai aturcetaartet at'esqelluki aturanek atulaqaitnek kencignarqellriani piyarani, anguyagtet-llu ciunratgun ayaasqelluki, aturluki: “Nanrarciu ATANEQ! Elliin kenkii pektaayuilnguq nangengailan akwarpak.”

²²Yuarun ayagniatgu nanrarluteng, ATANREM anguyagcet tailriit nuniircetai qaillun picirkaitelluki.

²³Ammonite-at Moabite-at-llu anguyagtaita callugait Edomite-at anguyagcet piunriqapiggluki-llu, nangeng'amegteki-llu ellmeggnun calluutut aaqutevkenateng.

²⁴Judah-m-llu anguyagtai tekicameng qertulriamun nacessvigmun mer'ilngurmi nunami, kiartut inglumeng tungiitnun, tangrrait-llu tamarmeng iqumaluteng cailkami tuqumaluteng. Atauciunge'rmi anagpek'nani.

²⁵Jehoshaphat-aam yun'i-llu ullagait uayarnaluki, kuluvagnek-llu nalaqutut amllernek, aklunek, aturanek, piksunarqellrianek-llu canek. Tuani uitallruut ernerni pingayuni uayaaqengateng quyurrluki, amllerrata tau͡gaam tamalkuita tegusciiganaki.

²⁶Erenret cetamiitni quyurtut Kuignayuani Beracah-m, tuani-llu nanraraat ATANEQ elliin caliallri pitekluki. Taumek tauna kuignayuk aprumalria “Beracah” una erneq tekilluku.[1]

²⁷Tua-llu utertut, tamarmeng Judah-m Jerusalem-aam-llu yui, Jehoshaphat-aaq ciuliqagtekluku, uterrluteng Jerusalem-aamun angnirluteng, tua-i-wa ATANREM cirlakellruaki ingluit.

²⁸Tekicameng Jerusalem-aamun, Agayuvigpagmun ag'ut aturcetaarluteng qelutelegnek cupu'uryaranek-llu.

²⁹Agayutem-llu qigcignarqucia tut'uq tamalkuitnun angayuqauviit nunaitnun niitellermeggni ATANERMUN cirlakellruciit Israel-aam yuin inglukestai,

³⁰tua-i Jehoshaphat-aam ataniullra qinuituq, Agayutiin cayailkuciumiini avatiinek tamiin.

³¹Jehoshaphat-aaq angayuqaurtellruuq Judah-mi allrakungluni yuinaq akimiarmek cipluku (35), ataniullruuq-llu yuinaq tallimanek cipluku (25) allrakuni Jerusalem-aami. Aaniin atra Azubah-rullruuq Shilhi-am pania.

³²Atamitun Asa-m, ciumini pillruciatun, calillruuq ellualriamek ATANREM tangvallrani ayuquciminek-llu tuigtellruvkenani;

³³tau͡gaam agayutnguanun ekuaviit piunriumallrunritut. Cali tua-i yuut ircaquteng tuigteksaitellruit tamalkirrluteng agayulallerkameggnun Agayutiitnun ciuliameng.

³⁴Allat Jehoshaphat-aam caliallri angayuqruluni ayagniqarraallerminek iquklitellranun igausngaut ukuni: Jehu-m Hanani-m Qetunraan Ayuqucillra taukut ilakait ukut kalikaat: Israel-aam Angayuqrin Ayuqucillrat.

³⁵Mat'um kinguani Judah-m Angayuqra Jehoshaphat-aaq pillguciutellruuq Ahaziah-mun Israel-aam angayuqranun, tauna calillrulria amllernek assiitellrianek.

³⁶Pillgucira-llu Ezongeber-aami sun'anek pilillrani Tarshish-aamun ayalararkanek.

³⁷Tau͡gaam Eliezer-aam, Dodavahu-m Mareshah-rmium qetunraan, aarcirturaa Jehoshaphat-aaq qanerluni, “Pillguciutellruavet Ahaziah-mun, ATANREM piunrirciqai pilialten.” Sun'at-llu akacagluteng navgurtut, Tarshish-aamun ayagciiganateng.