Read Yupik 2 Chronicles 21 Bible Online

2 Chronicles 21 - Yupik bible

2 Chronicles 21

¹Jehoshaphat-aaq-llu tungmagcimauq David-aam Nunarpiini; Jehoram-aaq-llu qetunraa ataniurtuq kinguakun.

²Jehoram-aaq, Judah-m Angayuqran Jehoshaphat-aam, qetunraa angutnek arvinlegnek anelgutengqellruuq: Azariah, Jehiel, Zechariah, Azariah, Michael, Shephatiah-mek-llu.

³Atiita cikillrui amllernek cikiutnek, qerrirlimek, suulutaamek, akitulrianek-llu tukuutnek, ilaluki asvairqumalrianek nunarpagnek Judah-melngurnek. Angayuqauvik tau͡gaam tunellrua Jehoram-aamun, ciuqlikacagaungan qetunramini.

⁴Jehoram-aam-llu aqumngami atami aqumllitaanun atanruvigmun, tuqutai tamalkuita anelgutni angutet nuussirpagkun, ilait-llu Israel-aam atanerruari.

⁵Jehoram-aaq allrakungellruuq yuinaq qulmek malrugnek cipluku (32) angayuqrurtellermini, ataniullruuq-llu allrakuni pingayunlegni Jerusalem-aami.

⁶Elliin-llu maligtellrui piciryarai Angayuqam Ahab-am, allat-llu Israel-aam angayuqrin, tua-i-wa kassuutellruami Ahab-am paniin iliitnek. Assiitellriamek-llu calillruuq tangvallrani ATANREM,

⁷tau͡gaam ATANREM piunriryuumiitellrua David-aam kinguvrinek angayuqertangqerrlainararkaullra, David-aaq pillgutekluku akqut'lillruami, akqellruamiu-llu kinguvri angayuqrurrlainarciqniluki imumirpak.

⁸Jehoram-aaq angayuqrullrani Edom-aaq inglulituq Judah-mun avvluteng-llu taqulluteng allakarmeng angayuqerkameggnek.

⁹Tua-llu Jehoram-aaq atanerruani-llu ayagtut akalrialegteggun ayagassuutetgun iterluku-llu Edom-aaq. Tuani-llu Edomite-at anguyagtaita avatairait, tau͡gaam unugmi anluteng qimagtut.

¹⁰Tuakenirnek Edom-aaq allakallruuq Judah-mek una erneq tekilluku. Taum-llu nalliini Libnah-m nunarpii inglulitellruuq Jehoram-aamun, Jehoram-aam-wa cakaallruaku ATANEQ, Agayutiit ciuliami.

¹¹Pilillruluni-llu agayutnguanun agayularvignek pengulilriami nuniini Judah-m, ciuliqaggluki-llu Judah-m Jerusalem-aam-llu yui assiilngirtelluki ATANERMUN.

¹²Elijah-llu prophet-aaq igamek ayagceciuq Jehoram-aamun qanelriamek: “ATANREM, ciuliarpet David-aam Agayutiin, pinarqelriarurtaaten maligtenrilavgu piciryaraa atavet, Angayuqam Jehoshaphat-aam, apa'urlurpet-llu Angayuqam Asa-m.

¹³Maligtellruaten tau͡gaam angayuqrin Israel-aam piciryarait, yui-llu Judah-m Jerusalem-aam-llu ciuliqaggluki piciuvkenateng Agayutmun pillerkaatnun, Ahab-am kinguani-llu angayuqat ciuliqagtellruciicetun Israel-aaq piciunricaramun. Tuqulluki-llu anelguteten, angutet elpeni assinrulriit.

¹⁴Tamana pitekluku, ATANEQ taiciiquq angelriamek cangerlagmek yugpenun, irniarpenun, nuliarpenun, akluten-llu piunrirluki tamalkuita.

¹⁵Elpet-llu nangteqnarqelriamek naulluutmek pingciquten iluvkun tamana-llu arcariinarciquq unuaquaqan.”

¹⁶Tamaani-llu Philistine-at Arab-at-llu uitallruut Ethiopian-aat imarpiim cen̄iini nunaliallrata yaaqsinrilkiini. Taukunun ATANREM Jehoram-aaq anguyagcetaa.

¹⁷Anguyagaat-llu Judah, iterluku-llu, ayaulluki-llu tamalkuita nataqelteng angayuqam eniin aklui, teguaqluki tamalkuita qetunrai, nulirri-llu, Ahaziah tau͡gaam pinritqerluku ayagyuankacagiit qetunrain.

¹⁸Makut-llu kinguatgun, ATANREM naulluutengevkaraa nangteqnarqellriamek qiluikun iinruilngurmek.

¹⁹Allrakuk-llu malruk aturlukek arcariinarluni kiituani angayuqaq yuunrirtuq cakneq nangteqluni. Yui-llu ekurpalriamek kumarcinritut nallunairutekluku tuqullranun angniilucirteng, ciuliarinun pilallrucirmegcetun.

²⁰Allrakungellruuq ataniungellermini yuinaq qulmek malrugnek cipluku (32), atanrullruuq-llu allrakuni pingayunlegni Jerusalem-aami; kia-llu tuqullra angniilutkenritaa. Tungmagtaat-llu David-aam Nunarpiinun, tau͡gaam angayuqat qunguatnun pivkenaku.