Read Yupik 2 Chronicles 23 Bible Online

2 Chronicles 23 - Yupik bible

2 Chronicles 23

¹Malrunelgatni allrakut utaqarraarluni Jehoiada agayulirta umyuanguq uitauryuumiirulluni. Umyuallgutekluteng-llu Jehoiada talliman-llu anguyagtet atanerruarit: Azariah Jeroham-am qetunraa, Ishmael-aq Jehohanan-aam qetunraa, Azariah Obed-aam qetunraa, Maaseiah Adaiah-m qetunraa, Elishaphat-aaq-llu Zichri-m qetunraa pillerkiurtut.

²Ayagaluteng-llu tamalkuitnun Judah-m nunarpainun malikluki ut'rutait Jerusalem-aamun Levite-at, tamalkuita-llu tungayakellriit ciuliqagtait.

³Agayuvigpagmun-llu quyurtut akqut'liluteng-llu Joash-aq, angayuqam qetunraa, pillgutekluku. Jehoiada-llu qanertuq ellaitnun, “Waniwa yuunrillrem angayuqam qetunraa! Angayuqaurrli! ATANEQ akqillruciatun Angayuqam David-aam kinguvranek angayuqertangqerrlainarciqniluku.

⁴Waten pikici. Agayulirtet Levite-at-llu caliarteng ayagniqunegteggu Sabbath-aami, pingasuingita nayurciqait Agayuvigpiim iteryarai,

⁵allat-llu pingasuingita angayuqam enii nayurciqaat, ilait-llu allat Gate of Foundation-aami elkarcimaciqut. Tamarmeng-llu yuut quyurciiqut Agayuvigpiim caniani carr'ilngurmi.

⁶Kina iterngaituq Agayuvigpagmun agayulirten͞gunret tau͡gaam Levite-at-llu calilriit. Taukut iteryugngaut, menuircaumiimeng-wa, yuut-llu tuanelnguut maligtaquarkaugaat ATANREM alerquutii uitaluteng ellami.

⁷Levite-at nangerngaarkaugut avatairluku angayuqaq, caskuteng tegumiaqluki; maligtelararkaugaat natmun ayallra tamalkuan. Kina itengnaqellria Agayuvigpagmun tuqucimaarkauguq.”

⁸Levite-at tamarmeng Judah-m-llu yuin maligtait Jehoiada-m alerquatai. Calillret-llu anevkaqsaunaki calinermek taq'aqata Sabbath-aami, tuaten piluteng atanerruanun paivngalartut caliyartulriit calinermek-llu taqellriit.

⁹Jehoiada-m-llu atanerruanun tunai narulkautet capkutat-llu angelriit mikellriit-llu Angayuqam David-aam pillri, qemangqallret Agayuvigpagmi.

¹⁰Elkartai-llu angutet nuussirpameggnek tegumiarluteng amumaluki kassuggluku ciuqerra Agayuvigpiim, camun pivkarngairulluku angayuqaq.

¹¹Tua-llu Jehoiada-m anutaa Joash-aq, nasqerrucirluku-llu, cikirluku-llu ayuqaitnek alerquutain atanirturillerkam. Tua-i angayuqrurtaat. Jehoiada-m-llu agayulirtem qetunrani-llu mingugaat, yuut-llu tamarmeng qayagpagtut, “Ak'anun unguvali angayuqaq!”

¹²Athaliah-m-llu niicamiki yuut angnirluteng qayagpagalriit angayuqamun, cukangnaqluni ag'uq Agayuvigpagmun, tuani quyungqiita yugugaat.

¹³Tangrraa-llu angayuqaurrnerralria Agayuvigpiim iteryaraani, nangengqaluni naparyam caniani angayuqat uitaviketukiitni, avatairumaluni anguyagtet atanerruaritnek cupu'uryarat-llu qalriastek'lallritnek. Yuut tamarmeng qayagpagaluteng angnirluteng, cupu'uryarat-llu cupu'urluki, Agayuvigpiim-llu aturcetaartain aturcetaateng aturluki ciuliqaggluki nunaniryulriit. Athaliah-m-llu allgurai aturani qayagpagluni-llu, “Piciunrilnguut wangnun! Piciunrilnguut wangnun!”

¹⁴Tua-llu Jehoiada-m agayulirtem taisqai anguyagtet atanerruarit qanrulluki-llu, “Tuqucaqunaciu Agayuvigpiim canimelkiini. Anuciu avapailicirluku nayurten̄ek; kia-llu ikayungnaqkaku tuqutarkaugaci.”

¹⁵Teguat-llu, agulluku-llu angayuqam eniinun, tuani-llu Horse Gate-ami tuqutaat.

¹⁶Jehoiada agayulirta Angayuqamun Joash-amun, tamalkuitnun-llu yugnun, pillguciisquq akqut'lillermini ATANERMUN yuugarkauluteng.

¹⁷Tua-llu yuut tamarmeng ag'ut Baal-am agayuvianun, imlluku-llu. Navgurluki-llu ekuavii agayutnguari-llu itumlluki, tuqulluku-llu Mattan-aaq, Baal-am agayulirtii, ekuaviit ciuqerratni.

¹⁸Jehoiada-llu elkarciuq nayurtekainek Agayuvigpiim, maliggluku Levite-at agayulirtet, allat-llu Levite-at pisquciat, Angayuqam David-aam taqellri calisten͞guarkauluki Agayuvigpagmun, ekuagilararkauluteng-llu elliitnek ATANERMUN, igausngaciatun Alerquutiini Moses-aam. Taukut cali ciuliqagtelarait atualriit cat nallairaqata atulalteng.

¹⁹Elkarciuq-llu nayurten̄ek Agayuvigpiim iteryarainun kina imna piciryaraq aturpek'naku menuulria itertessngairulluku.

²⁰Anguyagtet-llu ciuliqagtaita, yuut piuranrita, yuut atanirturtaita, tamarmeng-llu nunam yuin, pillguciraat Jehoiada malikerpagluteng agutellrani angayuqaq Agayuvigpagmek angayuqam eniinun. Itertut-llu itervikvallulaqiitgun ikirtuqakun, angayuqaq-llu aqumuq atanruvigmun aqumllitamun.

²¹Tamarmeng-llu yuut angnirtut; nunarpak-llu nepaituq, Athaliah tuqucimallruan nuussirpagkun.