Read Yupik 2 Chronicles 26 Bible Online

2 Chronicles 26 - Yupik bible

2 Chronicles 26

¹Tamarmeng-llu Judah-m yuin nakmikaat Uzziah, allrakurluni akimiaq ataucimek cipluku (16), angayuqrurrluku-llu atiin Amaziah-m eniini.

²(Amaziah-m yuunrillran kinguani Uzziah-m tegunqigtellrua Eloth-aaq nautenqiggluku-llu nunarpak.)

³Uzziah allrakungqellruuq akimiaq ataucimek cipluku (16) ataniungellermini, ataniullruuq-llu Jerusalem-aami yuinaq malrugnek cipluku (22) allrakuni. Aanii atengqellruuq Jecoliah-mek Jerusalem-aarmiunguluni.

⁴Calillruuq-llu ellualriamek tangvallrani ATANREM, maliggluki atami Amaziah-m tamalkuita pillri.

⁵Zechariah, agayumacimek alerquasten̄i, unguvallrani kevgiullrua ATANEQ piciuluni, Agayutem-llu atawaqercetaa.

⁶Anguyagai-llu Philistine-at, navgurluki-llu Gath-am, Jabneh-m, Ashdod-aam-llu casguit; nunarpaliluni-llu Ashdod-aam nunautiini nani-llu Philistine-at nuniitni.

⁷Agayutem-llu ikayuraa cirlakevkarluki Philistine-at, Arab-at-llu Gurbaal-ami uitalriit, Meunite-at-llu.

⁸Ammonite-at-llu akiliraat Uzziah, inglumeng pikateng ikayuusqelluteng, piniriqapigtuq-llu niitnaugaqluni-llu Egypt-aaq tekilluku.

⁹Pinircarluki-llu Jerusalem-aam asvairqutai qertulrianek eneliluni Corner Gate-ami, Valley Gate-ami qacarnerem-llu caqirtellrani.

¹⁰Cali-llu pililuni qertulrianek enenek yuilqumi, elagluni-llu amllernek mervignek, amllernek-wa kuluvautengqerrami Shephelah-mi manigcelngurmi-llu nunami, nauceciiyurterluni wine-arkanek-llu calitulinek penguni naungignarqelriani-llu nunani, elliin assikngamiu naucetaalillni.

¹¹Anguyagtengqertuq-llu amllellrianek, anguyagmun engelqaulrianek. Callrit igartek Jeiel-aankuk Maaseiah-aq-llu igautaqluki Hananiah-m, iliita angayuqam atanerruarin, pisqellri aturluki.

¹²Anguyagtet atanirturterluteng tiissitsaak malruk tiissitsaam-wa avga yuinarnek tallimanek cipnerluteng (2,600).

¹³Atanirtuq'ngait anguyagtet yuinaat akimiaq tiissitsaat malrunlegen-wa tiissitsaam avganek cipluki (307,500) amllertaluteng, anguyagyugngaluteng pinilegpauluteng angayuqaq ikayurluku inglukestainek.

¹⁴Uzziah-m-llu uptellrui tamalkuita anguyagtet capkutait, narulkautet, akngircailkutat nacat, aturat qalliit caviit, urluvret, teggalqunek-llu elluqaqussuutet imarkaitnek.

¹⁵Jerusalem-aami-llu massiinarnek piliuq, elisngalriit ayagnillritnek, pitegcautet pitgaqussuutaitnek angtuat-llu teggalqut egqaqsuutaitnek, enet qertulriit qaingantarkanek kangiraini-llu nunarpiim casguan uitaarkanek. Niitnaullra-llu sagtuq tamiinun, piniriqapiggluni-llu tua-i ikayuutmek akurtuumiimi Agayutmek.

¹⁶Tau͡gaam Angayuqaq Uzziah piniriami ucuryagtenguq, tuaten-llu ayuqlirillran catmun ayagcetaa. Qacungakaa-llu ATANEQ Agayutni itlermikun Agayuvigpagmun ekuagiyarturluni aruviarmek elliiviatni aruviaraat.

¹⁷Azariah-m-llu agayulirtem, maligluni yuinarnek cetamanek (80) pinilrianek cacetulrianek agayulirten̄ek, maligtaa angayuqaq

¹⁸inglulirnaluku. Qanertut-llu, “Uzziah! Piunarqutaituten aruviarararkauluten ATANERMUN. Kiimeng agayulirtet Aaron-aam kinguvri menuircaumallruut aruviaralararkauluteng. Ani maaken tanqilriamek. ATANEQ Agayun ilulliqevkaran, atawaqautiinek-llu piirututen.”

¹⁹Uzziah nangerngallruuq tuani Agayuvigpagmi caniani aruviarnek ekuaviim tegumiaqluku aruviarnek ekuagissuun. Qenqerrutai-llu agayulirtet, egmianun-llu mamyuilnguq naulluun anqe'rtuq qauraani.

²⁰Azariah-m-llu, taukut-llu agayulirtet, tangvagaat angayuqam qauraa alingluteng, anesquuraat-llu Agayuvigpagmek. Cukangnaqluni-llu an'uq ATANREM-wa anucimirqecetaarani.

²¹Angayuqaq-llu Uzziah mamyuilngungqellruuq tuquviminun, mamyuilngungqerrami-llu allakarmi enemi uitaluni, iterciigalivkaumiimi-wa Agayuvigpagmun, caliaqelallerminek taqevkaumaluni, qetunraan Jotham-aam atanirtullrani nunam yui.

²²Uzziah-m tamalkuita angayuqaullermini callri, ciuqliitnek ayagluki nangneratnun, Isaiah-m prophet-aam, Amoz-aam qetunraan, igautellrui.

²³Uzziah-llu tuquuq tungmagtaat-llu nunamun angayuqat tungmagciviatnun, angayuqat qungurviatnun tungmagcimallruvkenani naulluutengqellra pitekluku. Jotham-aaq-llu qetunraa ataniurtuq kinguakun.