Read Yupik 2 Chronicles 28 Bible Online

2 Chronicles 28 - Yupik bible

2 Chronicles 28

¹Ahaz-aq allrakungqellruuq yuinarnek (20) ataniungellermini, ataniullruuq-llu Jerusalem-aami allrakuni akimiaq ataucimek cipluku (16). ATANREM tangvallrani ellualriamek calillrunrituq, ciuliami Angayuqam David-aam pillruciatun,

²maligtellrui piciryarait angayuqrin Israel-aam. Pililuni-llu cavignek agayutnguanek Baal-am ayuqainek,

³ekuagiaqluni-llu aruviarnek Hinnom Valley-mi, ekuallruluki-llu qetunrani elliitekluki agayutnguanun ayuqeliluku uuminarqellria piciryaraat tamakut yuut ATANREM anevkallrin Israel-aam yuin ciunratnek.

⁴Elliilallruuq ekuagiluni aruviararaqluni-llu agayutnguat ekuaviitni, qemini, tamalkuitni-llu cungagcelnguut napat aciatni.

⁵Taumek tamana pitekluku ATANREM, elliin Agayutiin, tunellrua Syria-m angayuqranun, taum cirlakellrua tegulluni-llu amllernek Judah-m yuinek ut'rulluki-llu Damascus-aamun teguaqluki. Cali-llu ATANREM Israel-aam angayuqranun Pekah-mun, Remaliah-m qetunraanun, cirlakevkallrua Ahaz-aq, tuquciluni-llu yuinarnek arvinlegnek tiissitsaanek (120,000), arcaqerluteng alinguraranrilngurnek Judah-m anguyagtainek, ernermi ataucimi. ATANREM, Agayutiita ciuliarita, man'a tuaten pivkallrua, Judah-m-wa yuin cakaallruatni.

⁷Israelite-am anguyagtem aterluni Zichri-mek, pinilriim angutem, tuqutaa Maaseiah, Angayuqam Ahaz-am qetunraa, Azrikam-aaq-llu angayuqam eniini atanerruaq, Elkanah-llu angayuqamun tungliulria.

⁸Judah-m-llu yui nakmiin ilakutaqeng'e'rmegteki, Israel-aam anguyagtain tegullruit yuinaat qulen tiissitsaat (200,000) arnat, mikelnguut-llu teguaqluki, ut'rulluki-llu Samaria-mun; amllernek uayaarameggnek maligluki.

⁹Angun aterluni Oded-amek, ATANREM prophet-aara, uitallruuq Samaria-mi. Pairtai-llu Israel-aam anguyagtai tekitellriit Judah-m yuinek teguarluteng, itqatainanratni nunarpagmun, qanerluni-llu, “ATANREM, Agayutiita ciuliavci, qenrucamiu Judah elpecen̄un cirlakevkallrua, tau͡gaam watua niitaa cakneq elpecen̄un nanglluki tuqutellruciit.

¹⁰Watua-llu piciqliartuci angutet arnat-llu, Judah-m Jerusalem-aam-llu yui, pisteksagutnaluki. Nalluarci-qaa elpeci-llu assiilngillerci ATANERMUN Agayutevcen̄un?

¹¹Niicugnicia! Ukut teguat anelgutkaci angutet arnat-llu. Uterceciki, utercetenrilkuvciki ATANREM qenrulluci anucimirqecetaarciqaaci.”

¹²Ciuliqagtet-llu, Ephraim-aamek Negeqlirmek Angayuqauvigmek, Azariah-m Johanan-aam qetunraan, Berechiah-m Meshillemoth-aam qetunraan, Jehizkiah-m Shullum qetunraan, Amasa-m-llu Hadlai-am qetunraan inglulirait anguyagmek tekitellriit.

¹³Qanerluteng, “Itrusngaitaci teguat maavet, ATANERMUN atalriamek pinarqutkamten̄ek piciqliaravci, ilaluki watua assiilnguput pinarqutput-llu. Pinarqutput ak'a angelriaruan, tuknilriamek-llu eq'errutmek pitangqerran Israel-aam tungiinun.”

¹⁴Tua-i anguyagtet tunait teguat uayaaqengat-llu yugnun ciuliqagtaitnun-llu,

¹⁵angutet-llu cetaman ellimerrait teguat aturiisqelluki uayaaqengaitnek. Aturirait-llu matangqalriit, aluilitanek-llu cikirluki atu'urkaitnek, camirrluki-llu nerevkarluki mertelluki-llu, kilinrit-llu olive-aat uquitnek mingugluki. Piniatessiyaalriit-llu piyuasciiganateng elliluki ciulviit qaingitnun ut'rutait tungelqurritnun Jericho-mi, napalegmun palm-anek nunarpagmun. Israel-aam-llu anguyagtai uterrluteng kingunermeggnun Samaria-mun.

¹⁶Taum nalliini Angayuqaq Ahaz-aq ikayungcartuq Assyria-m angayuqranun.

¹⁷Edomite-at-wa pulenglluteng anguyangatgu Judah cirlakluku-llu, amllernek-llu teguanek ayaulluteng.

¹⁸Mat'um-llu nalliini ayuqmun Philistine-at anguyalarait nunarraat Shephelah-mi, Negeb-aaq-llu Judah-m nuniini, tegullruluki-llu Beth Shemesh-aaq, Aijalon-aaq, Gederoth-aaq, nunarpiit-llu Soco, Timnah, Gimzo-llu nunarrartuumaita, ellait-llu tamaavet nunalgarrluteng.

¹⁹ATANREM-wa Judah aciqsigivkaraa Ahaz-aq, Israel-aam angayuqra, ellii-wa takumcukivkenani pillruan Judah-mi, piciullruvkenani-llu ATANERMUN.

²⁰Tilgath-pilneser-aam, Assyria-m angayuqran, ikayurpek'naku Ahaz-aq ingluliraa, arenqiallugutmek-llu piluku.

²¹Taumek Ahaz-am tegui suulutaat Agayuvigpagmek, angayuqam-llu eniinek, yuut-llu ciuliqagtaita enaitnek, tunluki-llu Assyria-m angayuqranun ikayuusqelluni inglumi pikatni; tau͡gaam tamatum-llu ikayunritaa.

²²Arenqiallugutni-llu arcaqallratni, tauna angun Ahaz-aq assiilngillruuq ATANERMUN ciungani pillmi arcaqanranek.

²³Elliigaqluni agayutaitnun Syrian-aat, cirlakestellmi. Qanerluni, “Agayutaita Syrian-aat ikayullruatki Syria-m angayuqri, wiinga-llu elliivikekumteng ikayurciqliatnga.” Tau͡gaam tamatum taitaa picurlak elliinun Israel-aamun-llu tamiin.

²⁴Tamana ilaluku, tegui Agayuvigpiim aklui, navgurluki-llu ciamlluki. Patuluki-llu amiigi Agayuvigpiim piliuq-llu ekuavignek tamiini Jerusalem-aami.

²⁵Tamalkuitni Judah-m nunarpaini nunacuaraini-llu piliuq agayutnguanun agayularvignek, aruviarnek ekuavigkanek allanun agayutnun. Waten pillermikun ellminun tuc'etaa eq'uqertii ATANREM ciuliami Agayutiita.

²⁶Callri piciryarai, ciuqliqarraamek nangnermun igausngaut ukuni kalikarni: Ayuqucillrit Angayuqain Judah-m Israel-aam-llu.

²⁷Angayuqaq-llu Ahaz-aq tuquuq tungmagcimaluni-llu Jerusalem-aami, tau͡gaam ellinritaat angayuqat qungurviatnun. Hezekiah-llu qetunraa ataniurtuq kinguakun.