Read Yupik 2 Chronicles 29 Bible Online

2 Chronicles 29 - Yupik bible

2 Chronicles 29

¹Hezekiah atanirturingellruuq Judah-mi allrakungluni yuinaq tallimanek cipluku (25), ataniullruuq-llu Jerusalem-aami allrakuni yuinaq qulngunrita'arnek cipluku (29). Aanii atengqellruuq Abijah-mek, Zechariah-m panikluku.

²Ellualriamek-llu calillruuq tangvallrani ATANREM, maliggluku ciuliami David-aam caliallra.

³Ataniungellmi ciuqliatni iralut, Hezekiah-m ikirtenqigtai amiigi Agayuvigpiim, kituggluki-llu.

⁴Quyurcetai-llu agayulirtet Levite-at-llu carr'ilngurmun calaralirnerani Agayuvigpiim

⁵tuani-llu qalarulluki. Qanerluni, “Elpeci Levite-ani menuircararkauguci elpecen̄ek, menuircarluku-llu Agayuvigpii ATANREM, ciuliavci Agayutiita. Anulluki-llu pellernarqelriit Agayuvigpagmek.

⁶Ciuliaput piciullrunritut ATANERMUN Agayutemten̄un, caliluteng-llu elliinun ilulliqnarqellrianek. Cakaallruat tunulluku-llu uitavia.

⁷Amiigi palutellruit Agayuvigpiim, kenurrat nipluki, ekuagiyuunateng aruviarnek, elliitnek-llu ekuagarkanek Agayuvigpiini Israel-aam Agayutiin.

⁸Taumek man'a pitekluku ATANREM eq'uqertii tut'ellruuq Judah-mun Jerusalem-aamun-llu, elkegnun-llu pillran tatamevkallrui alingevkarluki-llu yuut tamalkuita, nakmiin iigpeciuggun tangellrucirpecetun.

⁹Ataput anguyagkun tuqutaullruut, qetunraput-llu, paniput, nuliaput-llu ayaucimaluteng teguaruluteng.

¹⁰“Watua piyugtequa akqut'linalua ATANEQ, Israel-aam Agayutii pillgutekluku, elliin tua-i qenrutenrirniaraakut.

¹¹Qetunramaa, uitauranrici. Elpeci nakmikellruaci ATANREM ekualaasqelluci aruviarnek ellminun, ciuliqagcesqelluku-llu yuut agayulallrat ellminun.”

¹²Ukut Levite-at tuantellruut: Kohath-am ilakellriarinek, Mahath qetunraa Amasai-m, Jouel-aaq qetunraa Azariah-m Merari-m ilakellriarinek, Kish-aaq qetunraa Abdi-m, Azariah-llu qetunraa Jehallelel Ilakellrianek Gershon-aam, Joah qetunraa Zimmah-m, Eden-aaq-llu qetunraa Joah-m Ilakellriarinek Elizaphan-aam, Shimri, Jeuel-aaq-llu Ilakellriarinek Asaph-aam, Zechariah, Mattaniah-llu Ilakellriarinek Heman-aam, Jehuel, Shimei-llu Ilakellriarinek Jeduthun-aam, Shemaiah, Uzziel-aaq-llu.

¹⁵Ukut angutet quyurcetait Levite-aullguteteng, tamarmeng-llu menuircartut ellmeggnek. Nutaan-llu angayuqam pisqucillratun, menuircaraat Agayuvigpak Alerquutiin ATANREM pisqucia maliggluku.

¹⁶Agayulirtet itertut iluqlianun Agayuvigpiim menuircarnaluku, tamalkuita-llu anutait menuulriit Agayuvigpagmek elatiinun. Tuaken-llu Levite-at ayaulluki nunarpagmek Kidron Valley-mun.

¹⁷Iralum ciuqliim erneqarraarani ayagnirluteng, erenret-llu pingayunelgatni qaqilluku tamalkuan, ilakluku ena iteryaraq Agayuvigpagmun. Ernerni-llu cali pingayunlegni caliluteng, iralum erenrin akimiaq ataucimek cipnengutiit (16th) tekilluku, uptellruat Agayuvigpak agayullerkameggnun.

¹⁸Levite-at-llu mat'umek qanemcitaat Angayuqaq Hezekiah: “Qaqitarput menuircallra tamalkuan Agayuvigpak, elliitnek ekuavik calissuutai-llu tamalkuita, estuuluat tangrrutet kelipat calissuutai-llu tamalkuita.

¹⁹Tamalkuita-llu calissuutet ut'rutellruaput Angayuqam Ahaz-am au͡g'allri tamaani allrakuni Agayutmun piciuvkenani pillermini, ataam-llu atawaqertelluki. Tamarmeng ATANREM ekuavian ciuqerrani uitaut.”

²⁰Atatakutevkenani Angayuqam Hezekiah-m quyurcetai atanerruari nunarpiim, malikluteng-llu ag'ut Agayuvigpagmun.

²¹Angayuqam ilakuralriarin, Judah-m-llu yuin assiilnguita au͡gautekaitnek, Agayuvigpak-llu menuircarnaluku, elliitekluki agutut malrunlegnek angucalunek kuluvagnek, malrunlegnek qusnginek, malrunlegnek qusngiyagarnek, malrunlegnek-llu qusngirngalngurnek. Angayuqam-llu agayulirtet, Aaron-aam kinguvri, ellimerrai taukut elliitekesqelluki elliviakun ATANREM.

²²Agayulirtet-llu tuqutait kuluviit ciumek, kinguatgun-llu qusngit, tuamta-llu qusngiyagaat, augit-llu tamarmeng elliitet ceqvallertaulluku elliiviim qainganun.

²³Nutaan-llu angucalut qusngirngalnguut taitait angayuqamun, allanun-llu agayuyalrianun, taukut-llu unatmeggnek pategvikait.

²⁴Agayulirtet-llu tuqutait qusngirngalnguut, augat-llu kuvluku elliiviim qainganun elliitekluku aug'autekaatnun tamalkuita yuut assiilnguita, angayuqam pisqutkellruaku ekuagisqelluki elliitnek, assiilngurmun-llu elliitnek Israel-aaq tamalkuan pitekluku.

²⁵Maliggluki alerquutet ATANREM tunellri Angayuqamun David-aamun Gad-akun, angayuqam prophet-aarakun, prophet-aakun-llu Nathan-aakun; angayuqam elkartai Levite-at Agayuvigpagmi, aturcetaarluteng qelutelegnek harp-anek cymbal-aanek-llu,

²⁶ayuqaitnek Angayuqam David-aam atulallrin. Agayulirtet-llu cupu'uryaranek tegumiarluteng tuani nangengqaluteng.

²⁷Tua-llu Hezekiah picirkiriuq ekualuku elliin elliitekesqelluku elliivigkun; elliillrat-llu ayagnian, yuut aturtut nanrarluku ATANEQ, aturcetaartet-llu ayagnirluteng cupu'uryaranek allanek-llu aturcetaanek aturluteng.

²⁸Tamarmeng-llu tuanelnguut ilagautut agayullratnun, aturtu'rtut-llu aturtet, aturcetaarturluteng-llu elliitet tamarmeng ekualuki nangviatnun.

²⁹Elliillrat iquklican, Angayuqaq Hezekiah, yuut-llu tamarmeng, ciisqumigtut ciktaarluteng Agayutmun.

³⁰Angayuqam-llu Hezekiah-m, atanerruarita-llu yuut, Levite-at qanrutait atuusqelluki ATANERMUN nanrautet yuarutet David-aam Asaph-aam-llu prophet-aam igautelkek. Yuut-llu tamarmeng aturpagtut cakneq nunaniryugluteng ciisqumiggluteng ciktaallermeggni Agayun.

³¹Hezekiah-llu qanertuq yugnun, “Waniwa menuircaumariavci, taici elliitnek elliitekluki quyatmek ATANERMUN.” Yuut-llu tuaten piut, ilait-llu piyugteqelriit ungungssinek tailluteng ekualuki elliitekanek.

³²Taitellruut, ekualuki elliitekanek ATANERMUN: yuinaat pingayun qulmek cipluki (70) angucalunek kuluvagnek, yuinarnek tallimanek (100) angucalunek qusnginek, yuinaat-wa qulen (200) qusngiyagaat;

³³cali-llu tiissitsaam avga yuinarnek tallimanek cipluku (600) angucalunek kuluvagnek, pingayunek-llu tiissitsaanek (3,000) qusnginek elliitnek yuut neqkaitnek.

³⁴Agayulirtet-llu ikgelata amiirciiganaki tamalkuita ekualuki elliitekat allat agayulirtet menuircarnatkaatnun ellmeggnek, anelgutaita Levite-at ikayurait, caliaq taqvianun. (Levite-at aturturanrularaat piciryaraq aturluku menuircaumalteng pinruluteng agayulirten̄i.)

³⁵Avatiitgun tamalkuuluki elliitekellmeng ekualuki, agayulirtet caliaqaat ekuallrat uquit elliitngullret yuut neqkaitnun, cali wine-am, cikiutngullrem ekualuki elliitnun ilakluku, kuvumallra ekuavigmun. Tuaten tua-i ataam agayulallrat Agayuvigpagmi ayagnirtuq.

³⁶Angayuqaq Hezekiah yuut-llu angnirtut, Agayutem-wa ikayullruateng makut caliaqellratni; man'a alqunaq ellaitnun tekiartellruan.