Read Yupik 2 Chronicles 30 Bible Online

2 Chronicles 30 - Yupik bible

2 Chronicles 30

¹Yuut aturciigatellruat Kituutem Nerevkaritii piciryaraani iralut ciuqliatni, amllenrilata menuircaumalriit agayulirtet amlleret-llu yuut quyurteksailata Jerusalem-aamun. Taumek Angayuqaq Hezekiah, atanerruani-llu, Jerusalem-aam-llu yui umyuallgutekluteng taqutut tamana aturarkauluku iralum aipaani. Hezekiah-llu iganek ayagceciuq yuullgutkelriakegnun Ephraim-aam Manasseh-m-llu, kelegluki taisqelluki Agayuvigpagmun Jerusalem-aami aturnaluku Kituun umyuaqulluku ATANERMUN Israel-aam Agayutiinun.

⁴Picirkiullrat-llu assirnganani angayuqamun tamalkuitnun-llu yugnun.

⁵Tua-i kelgait tamalkuita Israelite-at, Dan-amek neglirnermi uitalriamek Beersheba-mun ungalalirnermi uitalriamek, yuut quyurtesqelluki Jerusalem-aamun aturnaluku Kituun maliggluku Alerquun, ciunganimi yugyanruluteng.

⁶Tua-i kevgat ayagtut angayuqam pisquciatun tamiin Israel-aamun Judah-mun-llu iganek ayaulluteng angayuqamek atanerruarinek-llu kingunelegnek, qanerluteng, “Israel-aam yuini, uterci ATANERMUN Agayutiinun Abraham-aam, Isaac-aam, Israel-aam-llu, ellii-llu uterrnaurtuq elpecen̄un ilakuarrarnun piunrirtenritellritnun Assyria-m angayuqain.

⁷Ciuliavcetun, tungayagpecetun-llu Israelite-atun pinrici, piciullrunrilngurnun ATANERMUN Agayutmeggnun, taumek tangrrucirpecetun elliin angtuamek anucimirqecetaallrukai.

⁸Pamaitenrici ciuliavci pillracetun, tau͡gaam tunluci ATANERMUN, tailuci-llu agayuvianun, elliin atawaqercetellranun akwarpak, kevgiurluku-llu ATANEQ Agayutsi, arcaqalria eq'urrutii tuigcimanaurtuq elpecen̄ek.

⁹Ut'reskuvci ATANERMUN, anelguceci irniaci-llu takumcukumaciqut teguaqestemeggnek, uterrluteng-llu maavet nunamun. Tua-i ATANEQ Agayutsi takumcutalriaruan, naklegtalriaruluni, ciuniurciqaaci-llu, ut'reskuvci elliinun.”

¹⁰Tua-i kevgat ayagaut tamalkuitnun nunarpagnun Ephraim-aam Manasseh-m-llu nuniigni, yuullgutkelriari Zebulun-aam negeqvami uitalriit tekilluku; tau͡gaam yuut temciarautekait caunrilkuurluki-llu.

¹¹Kiimeng tua-i qavcirraan Asher-aam, Manasseh-m, Zebulun-aam-llu yui ellmeggnek picalqukenrirluteng taigut Jerusalem-aamun.

¹²Agayun-llu caliuq Judah-mi umyuallgutekluki yuut piyugteqellratgun atuusqelluku pisqutni maligngallritgun angayuqam atanerruarin-llu pisqutiit.

¹³Amlleret-llu yuut quyurtut Jerusalem-aamun aturnaluku Nerevkaritii Quuleciryarailnguum Kelipam iralum tungliani.

¹⁴Au͡g'arait-llu ekuaviit Jerusalem-aami uitallret, ekuaviit-llu aruviarnek tamalkuita, ayaulluki-llu eggluki Kidron Valley-mun.

¹⁵Tuquciut-llu qusngiyagarnek Kituutmi atu'urkat ciuqliim iralum tunglian akimiarunritariitni erenrin. Agayulirtet-llu Levite-at-llu kasnguyugtut piciryaraq aturluku menuircaumanrilameng taumek menuircartut tunluteng ATANERMUN, nutaan taicugngariluteng ekuagarkanek elliitnek Agayuvigpagmun.

¹⁶Caliarkiurumallermeggnun-llu elkartut Agayuvigpagmi maliggluku Alerquutii Moses-aam, Agayutem yuan. Levite-at tunaat auga elliitem agayulirten̄un, taukut-llu ekuavigmun ceqvallertarkaugaat.

¹⁷Amllellriit yuut piciryaraq aturluku menuircaumanrilameng tuqucisciigatellruut Kituutmun atu'urkanek qusngiyagarnek, taumek Levite-at tuqucitellrukait tunluki-llu qusngiyagaat ATANERMUN.

¹⁸Amllellriit taillret yuut, amllerrluteng-llu yuullgutkelriaritnek Ephraim-aam, Manasseh-m, Issachar-am, Zebulun-aam-llu atuqsaitellruat menuircaryaram piciryarai, taumek atuqiit Kituun piciryaraqenrilkiikun. Angayuqam-llu Hezekiah-m piicautai, qanerluni,

¹⁹“ATANEQ, Agayutiita ciuliamta, elluarucirpegun au͡g'ariski agayulriit elpenun ircaqumegteggun tamalkirrluteng, piciryaraq aturluku menuircaumanrilnguut.”

²⁰ATANREM-llu niitaa Hezekiah, canrirtelluki-llu yuut.

²¹Israel-aam-llu yuin Jerusalem-aamelnguut aturaat Nerevkaritii Quuleciriyarailnguum Kelipam, ernerni malrunlegni angnirpagluteng; Levite-at-llu agayulirtet-llu nanraraat ATANEQ unuaquaqan, aturpagluteng pitacirmegcetun.

²²Hezekiah-m-llu tamalkuita Levite-at qalarutai eguaqurluki munarluteng calillret kevgiullermeggni ATANEQ. Tua-i yuut ner'ut nerevkaritmek ernerni malrunlegni, elliiluteng nepaitem elliitiinek, quyavikluku-llu ATANEQ Agayutiit ciuliameng.

²³Tua-llu tamarmeng yuut umyuallgutekluteng piut nerevkarin aturnaluku cali malrunlegni ernerni; tua-i cali aturaat malrunlegni ernerni angnirluteng.

²⁴Hezekiah-m Judah-m angayuqran yuut quyungqalriit cikirai tiissitsaanek (1,000) kuluvagnek, malrunlegnek-llu tiissitsaanek (7,000) qusnginek elliitekanek, atanerruat-llu cikirait tiissitsaanek (1,000) kuluvagnek qulnek-llu tiissitsaanek (10,000) qusnginek. Amllerrluteng-llu agayulirtet aturaat piciryaraq ellmeggnek menuircarluteng.

²⁵Tua-i tamarmeng angnirtut, Judah-m yui, agayulirtet, Levite-at, yuut-llu taillret negeqvamek, allanret-llu arulaillret Israel-aami Judah-mi tamakumiungurrluteng.

²⁶Tua-i Jerusalem-aam nunarpii muirumauq angnimek, ca waten ayuqellria piksaitellruan kinguani Angayuqam Solomon-aam, David-aam angayuqran Israel-aam, qetunraan.

²⁷Tua-llu agayulirtet Levite-at-llu ATANERMUN atawaqaasqait yuut. Agayutem-llu uitavimini qilagmi niitai piicautiit ciuniurluku-llu.