Read Yupik 2 Chronicles 34 Bible Online

2 Chronicles 34 - Yupik bible

2 Chronicles 34

¹Josiah allrakungellruuq pingayunlegnek (8) ataniungellermini, ataniullruuq-llu allrakuni yuinaq akimiaq ataucimek cipluku (31) Jerusalem-aami.

²Calillruuq-llu ellualriamek tangvallrani ATANREM, maliggluku Angayuqam David-aam ciuliami piciryarallra, caqtaarpek'nani maligtaquluki alerquutai Agayutem.

³Allrakut pingayunelgurtellratni ataniullmi, cali ayagyuakacagarluni, kevgiungellrua Angayuqam David-aam ciuliami Agayutii. Allrakut-llu cetaman kinguatni ayagnirluni carrillruak Judah-nkuk Jerusalem-aaq-llu navgurluki agayutnguanun agayularviit, ayuqai-llu arnam agayutnguam Asherim-aam, allat-llu tamalkuita agayutnguat.

⁴Navgurait-llu Baal-at ekuaviit pisqutii aturluku; piqertuarluki-llu aruviarnek ekuaviit qulaitni uitalriit; ciamlluki-llu ayuqai Asherim-aam allat-llu tamalkuita agayutnguat, qamllerit-llu saggluki elliivikestek'lallrita qunguita qaingitnun.

⁵Ekuavkarluki-llu agayutnguat agayulirtaita enrit ekuavigni agayuvikelallritni. Waten pillermikun menuirutellruak piciryaraq maliggluku Judah-nkuk Jerusalem-aaq-llu.

⁶Tuaten-llu cali piuq nunarpagni, navgumalriani-llu nunarpaitni Manasseh-m, Ephraim-aam, Simeon-aam-llu, Naphtali tekilluku negeqvamelnguq.

⁷Navgurluku ekuaviit, Asherim-aam-llu ayuqai agayutnguat-llu qamllerurrluki, piqertuarluki-llu aruviarnek ekuaviit tamiini Israel-aam nuniini. Tua-llu utertuq Jerusalem-aamun.

⁸Tua-llu akimiaq pingayunek cipluku (18) ataniullran allrakuani, carrirraarluku nuna Agayuvigpak-llu taqevkallermikun agayutnguanun agayulallrat, Angayuqam Josiah-m ayagcetai pingayun angutet: Shaphan-aaq Azaliah-m qetunraa, Maaseiah-llu nunarpiim angayuqra, igarta-llu Joah, Joahaz-aam qetunraa, kitugcesqelluku Agayuvigpii ATANREM.

⁹Akit-llu, nayurtet Levite-at quyurtellrit Agayuvigpagmi tunumaut, Hilkiah-mun Agayulirten͞gunermun. (Ukut quyurtelqait Ephraim-aam Manasseh-m-llu yuinek, tamalkuitnek-llu Israel-aanek Negeqlirmi Angayuqauvigmelngurnek, Judah-m-llu, Benjamin-aam, Jerusalem-aam-llu yuinek.)

¹⁰Una-llu akiq tunumallruuq pingayunun angutnun Agayuvigpiim kitugtellran atanirturtainun, taukut-llu tunaat

¹¹muraliurten̄un enelisten̄un-llu kipuyutkesqelluki teggalqunun, muragnun-llu kitugutkaitnun enet Judah-m angayuqrin aruvkallrita.

¹²Caliaqestait calillruut elluarrluteng. Ciuliqagterluteng cetamanek Levite-anek: Jahath-aaq, Obadiah-llu Merari-m ilakellriarinek, Zechariah-nkuk-llu, Meshullam-aaq-llu Kohath-am ilakellriarinek. (Levite-at tamarmeng elisngallruut aturcetaaryaramek.)

¹³Allat Levite-at atanirtullruit calligtaartait caliarkat, ayuqucirtualuki-llu allat ayuqenrilngurnek calialget; ilait Levite-at igarten͞guluteng, wall'u nayurten͞guluteng.

¹⁴Akit anutellermegteki ellivigmek, Hilkiah-m agayulirtem nalaqai Kalikai Alerquutiin ATANREM, Alerquun Agayutem cikiutekellra Moses-aamun.

¹⁵Hilkiah-llu qanertuq Shaphan-aamun igartem̄un, “Nataqanka Kalikait Alerquutet maaken Agayuvigpagmek.” Tunai-llu Shaphan-aamun,

¹⁶Shaphan-aam-llu agutai angayuqamun. Qanrulluki-llu, “Tamalkuita ellimerrutelten pistevnun qaqitut.

¹⁷Agayuvigpagmi-llu akit uitalriit teguluki tunluki calisten̄un alerquastaitnun-llu.”

¹⁸Tua-llu Shaphan-aam igartem qanrutaa angayuqaq, “Hilkiah-m agayulirtem cikiraanga kalikarnek.” Shaphan-aam-llu naaqai qastuluni angayuqamun.

¹⁹Angayuqam-llu niicamiki kalikaat naaqumallratni, allgurai aturani alingluni,

²⁰alerqurai-llu Hilkiah, Ahikam Shaphan-aam qetunraa, Abdon-aaq Micah-m qetunraa, Shaphan-aaq, igarta, Asaiah-llu angayuqam nayurtii, qanerluni,

²¹“Ayagluci ATANERMUN taringnaurucarturcia yuut-llu Israel-aami Judah-mi-llu uitalriit. Kangingnaurciki alerquutait ukut kalikaat. ATANREM qenrutaakut ciuliamta niisngallrunrilatgu ATANREM qanellra, maligtellrunrilatki-llu ukut kalikaat pisqutait.”

²²Angayuqam pisquciatun Hilkiah, allat-llu ayagtut arnamun at'legmun Huldah-mek, prophet-aamun Jerusalem-aam nutaqsinrani uitalriamun. (Uinga Shallum, Tokhath-aam qetunraa, tutgarii Hasrah-m, Agayuvigpagmi aturat qaunqestekaat.) Arnamun-llu qanemcikait qaillun pillret.

²³Arnam-llu qanrutai uterrluki angayuqaq qanrutesqelluku

²⁴mat'umek qanermek kingunelegmek ATANERMEK, “Anucimirqecetaaqataraqa Jerusalem-aaq tamalkuita-llu yui, aniqlaatetgun igausngalriatgun kalikarni naaqumallerni angayuqamun.

²⁵Cakaallruatnga ekuagiaqluteng-llu aruviarnek allanun agayutnun, eq'urtelqa tupaggluku tamaitgun caliamegteggun. Eq'urtelqa tupagcimauq Jerusalem-aamun, nipngaunani-llu.

²⁶Tau͡gaam Judah-m angayuqranun, ayagcecestellerpecen̄un taringnaurvikesqelluku ATANEQ qanrarkauguci: Waten qanertuq ATANEQ, Agayutii Israel-aam: Niicugnillruaten igausngalriit kalikarni,

²⁷umyuarniullruavet-llu ellmikutuurrluten Agayutem ciuqerrani niitellerpeni qanellri man'a nuna yui-llu piluki, aturaten-llu allgurluki, qialuten-llu ciuqamni, niitellruaqa piicauten, qanertuq ATANEQ,

²⁸anucimirqecetaarun taitarkaqa Jerusalem-aamun tusngaituq unguvainanerpeni. Uitanqegciluten yuunrirceciiqamken.” Taukut-llu angutet utertut Angayuqamun Josiah-mun mat'umek qaneryarturluteng.

²⁹Tua-llu Angayuqam Josiah-m taisqai tamalkuita ciuliqagtai Judah-m Jerusalem-aam-llu,

³⁰malikluteng-llu ag'ut Agayuvigpagmun, tamarmeng-llu Judah-m yuin, Jerusalem-aam yuin, agayulirtet, Levite-at, tamarmeng-llu yuut, tukuulriit arrsaulriit-llu ayuqluteng maligtait. Yuut-llu ciuqerratni niicugnillratni angayuqam qastuluni naaqai tamalkuita igausngalriit kalikaini akqutem, nataqumallret Agayuvigpagmek.

³¹Nangertuq-llu angayuqat nangerngalallratnun naparyam canianun, akqut'liluni-llu ATANEQ pillgutekluku, piyuagarkauluni ATANREM kingunrakun alerquutai picirkiutai-llu aturluki ircaquni tamalkirrluku, yuucini-llu tamalkirrluku, aturarkauluki qaneryarai akqutem igausngaciicetun kalikarni.

³²Tamalkuita-llu Benjamin-aam yui, Jerusalem-aamelnguut-llu yuut akqivkarai akqun aturarkauluku. Jerusalem-aam-llu yuin maligtait picirkiutai akqutem taqellmeng Agayutiit ciuliameng pillgutekluku.

³³Josiah-m-llu navgurai tamalkuita pellernarqelriit agayutnguat nunautaitni Israel-aam yuin uitalriit, unguvallmi-llu taktaciatun pisqutkaa yugnun kevgiuresqelluku ATANEQ, ciuliameng Agayutiit.