Read Yupik 2 Chronicles 35 Bible Online

2 Chronicles 35 - Yupik bible

2 Chronicles 35

¹Angayuqam Josiah-m aturaa Kituun ATANERMUN Jerusalem-aami; tuqutaat-llu kituutem qusngiyagii iralum ciuqliim erenri akimiarunritaraurrluki.

²Elkartai-llu agayulirtet caliarkaitnun Agayuvigpagmi, eguaqurluki-llu munarcaulluki caliaqesqelluki caliarkait.

³Picirkirai-llu Levite-at, Israel-aam elitnauristai tunumalriit ATANERMUN, “Elliciu Akqutem Yaassiiga Agayuvigpagmun Angayuqam Solomon-aam, Israel-aam angayuqran David-aam qetunraan, piliallranun. Qugluku ayagasngairutarci nugtaqtaarluku, kevgiurarkaugaci tau͡gaam ATANEQ Agayutsi, yui-llu Israel-aat.

⁴Caliarkarpecen̄un elkarrluci Agayuvigpagmi tungayakucirci maliggluki, Angayuqam David-aam alerquutii aturluku, qetunraan-llu Angayuqam Solomon-aam,

⁵arenqiggluci elpecen̄ek ilaci upingaarkaurtelluki ikayuallerkaitnun tamaita Israel-aam yuin ilakuralriartai.

⁶Tuquciarkauguci Kituutmi atu'urkanek qusngiyagarnek qusngirngalngurnek-llu. Kitaki menuircarci piciryaraq aturluku, upluki-llu elliitekat ilavci Israel-aat maliggnaurait alerquatet ATANREM cikiutekellri Moses-aakun.”

⁷Angayuqam-llu Josiah-m yuut cikirai atu'urkaitnek Kituutmi elliin nakmiin katngautminek: yuinaq qulmek cipluku tiissitsaanek (30,000) qusnginek, qusngiyagarnek, qusngirngalnguut piyagaitnek, pingayunek-llu tiissitsaanek (3,000) angucalunek kuluvagnek.

⁸Atanerruarin-llu piyuumirluteng cikirait yuut, agayulirtet, Levite-at-llu atu'urkaitnek. Atanerruat-llu Agayuvigpiim qaunqestai, Hilkiah Agayulirten͞guneq, Zechariah, Jehiel-aaq-llu cikirait agayulirtet, elliitekanek Kituutmi: tiissitsaat pingayuat avguluku yuinaat-wa talliman (2,600) qusngiyagarnek, piyagaitnek-llu, yuinarnek-llu akimiarnek (300) angucalunek kuluvagnek.

⁹Ciuliqagtait-llu Levite-at: Conaniah, Shemaiah anelgutni-llu Nethanel, Hashabiah, Jeiel Jozabad-aaq-llu, cikiqengut tallimanek tiissitsaanek (5,000) qusngiyagarnek piyagarnek-llu qusngirngalngurnek, tiissitsaam-llu avganek (500) angucalunek kuluvagnek Levite-at elliitekaitnek.

¹⁰Tamarmeng-llu Kituutmi atu'urkat upingariata, agayulirtet Levite-at-llu nangertut uitallerkameggnun, angayuqam alerquutii aturluku.

¹¹Qusngiyagaat qusngirngalnguut-llu tuqucimariata, Levite-at amiirait, agayulirtet-llu ceqvallertaulluku auk ekuavigmun.

¹²Ekualuki-llu elliitekait avenqegtait, yugnun ilakuralriaritgun, elliitekesqelluki alerquutet maliggluki Alerquutiini Moses-aam.

¹³Levite-at-llu maniarait kenerkun Kituutmun elliitet, alerquun maliggluku, tanqilriit-llu elliitet kenirluki qallarvaulluki egatetgun, egalvagteggun, assalissuutetgun-llu, patagturluteng-llu aruqutekluki kemget yugnun.

¹⁴Makut qaqicata, Levite-at neqkameggnek upciut, agayulirtet-llu, Aaron-aam kinguvrin, neqkaitnek, agayulirtet-wa yagarcelata unugvianun, ekuagiluteng ungungssinek tamalkuuciicetun uquitnek-llu elliitet.

¹⁵Ukut-llu aturcetaartet Levite-at, tungayakellriari Asaph-aam, elkartellruut uitallerkiurumaallermeggnun, Angayuqam David-aam alerquutii aturluku: Asaph-aaq, Heman-aaq, Jeduthun-aaq-llu angayuqam prophet-aari. Nayurtet-llu Agayuvigpiim iteryaraini unitnarqenritait nayurviteng, atu'urkait-wa Kituutmi allat Levite-at upcatki.

¹⁶Tua-i Angayuqam Josiah-m pisqucillratun, cat tamarmeng qaqitut tuani ernermi, atu'urkat agayullermeggni ATANERMUN, Kituutem Nerevkaritiini atu'urkat, elliitekellrit-llu ekualuki elliivigmi.

¹⁷Ernerni-llu malrunlegni, Israel-aam yuin tamaanelnguut, aturaat Kituun, Nerevkaritii-llu Quuleciryarailnguum Kelipam.

¹⁸Israel-aami waten Kituun atuumaksaitellruuq Samuel-aam prophet-aam nalliinirnek. Iliita ciungani Israel-aam angayuqallrin waten ayuqluku atullrunritaat wani atullratun Angayuqam Josiah-m, agayulirtet, Levite-at, Judah-m yuin, Israel-aam yuin, Jerusalem-llu yuin

¹⁹Josiah-m angayuqrullran akimiaq pingayunek cipluku (18) allrakuani una Kituun atullruat.

²⁰Angayuqam Josiah-m makut tamarmeng caliallrin Agayuvigpagmun kinguatni, Egypt-aam Angayuqra Neco anguyagyarturtuq Carchemish-aami Euphrates-aam Kuigani. Josiah-m-llu arulairtengnaqsaaqaa,[3]

²¹tau͡gaam Neco pisten̄ek ayagceciuq Josiah-mun, qanerluni, “Anguyak una callukengaqa elpenun pimanrituq, Judah-m Angayuqrani. Tainritua callugyarturluten, inglunka tau͡gaam callugyarturanka, Agayutem-llu alerqullruanga cukamek pisqellua. Agayun tunglirnemni uitauq, taumek inglulinrilnga, elliin piunrircuaraaten.”

²²Tau͡gaam Josiah cumigtuq anguyagmun. Niicugniyuumiinaku Agayutem qanellra Angayuqaq Neco tumekluku, tua-i allaunguarluni ayagtuq anguyagmun manigcelngurmi nuniini Megiddo-m.

²³Anguyausnginanratni Angayuqaq Josiah Egyptian-aat pitegcautaita nall'artaat; qanertuq-llu pistem̄inun, “Ayaucia maaken, akngirterpagtua.”

²⁴Tua-i pistain yuugaat ayagassuutiinek, kevegluku-llu allamun ayagassuutmun ekluku Jerusalem-aamun agutaat. Tuani-llu yuunrirtuq, tungmagtaat-llu angayuqat qungurviatnun. Tamarmeng-llu Judah-mi Jerusalem-aami-llu yuut angniilutkaat tuqullra.

²⁵Prophet-aaq-llu Jeremiah igartuq yuarutmek qivrukluku Angayuqaq Josiah. Piciryaraurtellruuq-llu Israel-aami aturten̄un, angutnun arnanun-llu, man'a yuarun atulararkauluku angniilutkaqamegteggu Josiah. Man'a yuarun igausngauq Laments-aani.

²⁶Tamarmeng Josiah-m callri—assilriit caliallri alerquutii ATANREM igausngalria maliggluku,

²⁷caurallri ciuqlikacaarmek nangenratnun—igausngaut ukuni kalikarni: Ayuqucillrit Angayuqrin Israel-aam Judah-m-llu.