Read Yupik 2 Chronicles 36 Bible Online

2 Chronicles 36 - Yupik bible

2 Chronicles 36

¹Judah-m yuin nakmikaat Joahaz-aaq, Josiah-m qetunraa, angayuqrurrluku-llu Jerusalem-aami.

²Joahaz-aaq allrakungqellruuq yuinaq pingayunek cipluku (23) Judah-m angayuqaqsagutellrani, Jerusalem-aami-llu ataniullruuq pingayuni iraluni.

³Egypt-aam-llu Angayuqran Neco-m teguaqaa, Judah-llu akilirtelluku pingayunelgat tiissitsaat avguluku (7,500) uspernek qerrirlimek, yuinaat-llu pingayun akimiarmek (75) cipluki uspernek suulutaamek, akiliutekevkarluki ellminun Judah ingluin pikatgu elliin ikayurarkauluku.

⁴Neco-m-llu Joahaz-aam anelgutii, Eliakim-aaq, angayuqrurtaa Judah-mun, atra-llu cimirluku Jehoiakim-aamek. Ayaulluku-llu Jehoahaz-aaq teguaqluku Egypt-aamun.

⁵Jehoiakim-aaq allrakungqellruuq yuinaq tallimanek cipluku (25) ataniungellermini, angayuqrullruuq-llu Jerusalem-aami allrakuni qula ataucimek cipluku (11). Calillruuq-llu assiitellriamek tangvallrani ATANREM Agayutmi.

⁶Babylon-aam Angayuqran Nebuchadnezzar-aam anguyagaa Judah, Jehoiakim-aaq-llu teguaqluku, kalivnercirluku-llu ayautaa Babylon-aamun.

⁷Nebuchadnezzar-aaq-llu ayautuq ilaitnek assigtat Agayuvigpagmek Babylon-aamun, elliluki-llu eneminun atanruvigmun Babylon-aami.

⁸Ilait Jehoiakim-aam callrin, pellernarqelriit-llu caliallri, cat-llu pinarqutai, ukuni kalikarni igausngaut: Ayuqucillrit Israel-aam Judah-m-llu Angayuqrin. Jehoiachin-aaq-llu qetunraa ataniurtuq kinguakun.

⁹Jehoiachin-aaq allrakungqellruuq akimiaq pingayunek cipluku (18)[4] ataniungellermini, Jerusalem-aami-llu ataniullruuq iraluni pingayuni ernerni-llu qulni. Calillruuq assiitellriamek ATANREM tangvallrani.

¹⁰Up'nerkaan Angayuqam Nebuchadnezzar-aam teguaqluku ayautaa Babylon-aamun, ayaulluki-llu Agayuvigpagmi kenegnarqelriit assigtat. Nebuchadnezzar-aam-llu angani, Zedekiah, angayuqrurtaa Judah-mun Jerusalem-aamun-llu.

¹¹Zedekiah yuinaq ataucimek cipluku (21) allrakungellruuq ataniungellermini, atanrullruuq-llu Jerusalem-aami qula ataucimek cipluku (11) allrakuni.

¹²Calillruuq assiitellriamek tangvallrani ATANREM Agayutmi. Ellminek-llu picalqukevkenani niicugninritaa prophet-aaq Jeremiah, ATANREM qaneryaraanek qalartelalria.

¹³Zedekiah-llu inglulituq Angayuqamun Nebuchadnezzar-aamun, taum akqivkallrukii, Agayutem atrakun, piciuluni piciqniluni. Ircaquni teggia umyualinqiggluni utertellerkarminun ATANERMUN, Agayutiinun Israel-aam.

¹⁴Tamarmeng-llu ciuliqagtai Judah-m, agayulirtet, yuut-llu maligtait assiilngurkun piciryarait yuut avatmeggni uitalriit; pellernariluku Agayuvigpak elliin ATANREM tungaunani tanqilriarurtellra.

¹⁵ATANEQ, Agayutiit ciuliarita, taqsuunani ayagcecilartuq prophet-aanek aarcirtuusqelluki yun'i, tua-i-wa takumcukngamiki yun'i Agayuvigpak-llu.

¹⁶Tau͡gaam caunrilkuularait Agayutem kevgai, catkevkenaki qanellrit, temciarautekaqluki-llu prophet-aari, kiituani tua-i ATANREM eq'urtellra yum'inun arenqiatessiyaagami qaillun qimagviituq.

¹⁷Taumek ATANREM Babylon-aam angayuqra taivkaqii anguyagyarturluki. Angayuqam tuqurqai yun'erraat, ayagyuari Judah-m nuussirpagteggun, Agayuvigpagmi tuaten. Kitumek takumcikivkenani, ayagyuanek wall'u ak'allaurtellrianek, angutnek wall'u arnanek, naulluulrianek wall'u calrilngurnek. Agayutem tunai tamalkuita elliinun.

¹⁸Agayuvigpak-llu Babylonia-m angayuqran uayaaraa, Agayuvigpiim akiutai, angayuqam, atanerruarin-llu tukuutait, tamalkuita-llu ut'rulluki Babylon-aamun.

¹⁹Ekuagaat-llu Agayuvigpak, nunarpiim-llu Jerusalem-aam qacarnera navgurluku, tamalkuita-llu angayuqam enai ekuavkarluki, navgurluki-llu akluit.

²⁰Tuqutaunritqallret-llu ayautai Babylon-aamun, tuani-llu elliinun pisten͞gurrluteng kinguvrinun-llu Persia-m Angayuqauvia piurcimarillerkaanun.

²¹Tua-i ATANREM ciunguluku qanrutkellra prophet-aakun Jeremiah-kun piciurtuq: “Nuna uitaciquq yuunani yuinaat pingayun qulmek cipluku (70) allrakuni, imirluki Sabbath-aami mernuinerciun[5] atuumaksailnguq.”

²²Tua-llu allrakumi ciuqlirmi Cyrus-aaq angayuqruqarraallrani Persia-mi, ATANREM qanellni, prophet-aaq Jeremiah tumekluku, piciurcetaa. Cyrus-aaq umyugiraa man'a picirkiun ayagcecesqelluku igakun naaqumaarkauluku tamiini angayuqauvimini:

²³“Una pisqutkaa Cyrus-aam Persia-m Angayuqran. ATANREM, Qiliim Agayutiin, angayuqaurcetellruanga tamaitnun angayuqauviinun ellarpiim, ellimellruanga-llu agayuvigpalisqelluni Jerusalem-aami, Judah-melngurmi. Taumek, tamarpeci Agayutem yuini, tuavet ayagci, ATANREM-llu Agayutevci nayurlici.”