Read Yupik 2 Chronicles 5 Bible Online

2 Chronicles 5 - Yupik bible

2 Chronicles 5

¹Wani-wa tamarmi caliaq, Solomon-aam caliaqellra, Agayuvigpagmun qaqituq. Nek'egtai-llu Agayuvigpiim elliviinun cat tamalkuita atami David-aam urenkutmek ATANERMUN umyuaqutkellri: qerrirliq, suulutaaq, cat-llu allat.

²Tua-llu Solomon-aam taisqai ciulirneri Israel-aam, ciuliqagtait yuullgutkelriit, ciuqliit-llu ilakuralriartain Israel-aam Jerusalem-aamun, taitnaluku Akqutem Yaassiiga Zion-aamek, David-aam Nunarpiinek, Agayuvigpagmun.

³Tamarmeng-llu Israel-aam yui quyurtut ciuqerranun angayuqam nerevkaritmi Festival of Shelters, malrunelgatni iralut atutukiitni.

⁴Tamarmeng-llu ciulirneri Israel-aam quyurcimariata, nutaan Levite-at kevgaat Akqutem Yaassiiga

⁵agulluku-llu Agayuvigpagmun. Pelatekaa-llu ATANREM uitavian, tamalkuita-llu calissuutai iluani uitalriit, agayulirtet Levite-at-llu nugtartait Agayuvigpagmun.

⁶Angayuqaq Solomon-aaq, tamarmeng-llu Israel-aam yui, quyurtut ciuqerranun Akqutem Yaassiigem, elliiluteng-llu amlleqapigtellrianek qusnginek, angucalunek-llu kuluvagnek, amllessiyaagameng-llu naaqumasciiganateng.

⁷Tua-i agayulirtet kevegluku agutaat ATANREM pikekii Akqutem Yaassiiga itrulluku-llu Agayuvigpagmun elliluku-llu Tanqinqukacaarmun, aciagnun cherubim-aak.

⁸Yaqukenka nengingalriik patumaak Yaassiigek, muriit-llu takellriit tegumiaqessuutellri.

⁹Muriit iquit taksiyaagameng kia im'um nangerngakuni ciuqerrani Tanqinqukacagaam tangerrsugngaluki; elatiinek tau͡gaam alaitevkenatek. (Tuani cali uitaut una erneq tekilluku.)

¹⁰Cataunani Akqutem Yaassiigegken iluak kiimek tau͡gaam teggalquk malruk igausngaviik Moses-aam tuavet ellillrek Mount Sinai-ami, ATANREM akqut'lillrani Israel-aam yui pillgutekluki Egypt-aamek anellratni.

¹¹Tamarmeng agayulirtet tuanelnguut, ilausngallgutkenrilnge'rmeng ellmegnek menuircallruluteng.

¹²Tamarmeng-llu Levite-at aturcetaartet: Asaph, Heman, Jeduthun-aaq-llu, qetunrait, tungelqurrit-llu aturangqerrluteng 'lumarraqegtaarnek, aturcetaarluteng cymbal-aanek, qelutelegnek-llu, nangertut calaralirnerani ekuaviim ilaluteng arvinlegnek yuinarnek (120) agayulirten̄ek cupu'uryaralegnek.

¹³Cupu'uryaralget aturtet-llu caliaqaat qastuluteng pitatekluteng nanrallerkarteng quyaviklerkarteng-llu ATANEQ, yuarun-llu ayagnillrani, aturcetaarluteng cupu'uryaranek, qasiarcetaanek, allanek-llu aturcetaanek, nanrarluku ATANEQ, “Nanrarciu ATANEQ assilriaruan, Caqtaanrilnguq kenkii piugarkaungan akwarpak,” Agayuvigpak-llu imanguq amirlumek.

¹⁴Tua-i agayulirtet ciumurucesciigataat agayullerteng amirlum pisciigatevkarluki; ATANREM ucurnaan imiaku Agayuvigpak.