Read Yupik 2 Chronicles 6 Bible Online

2 Chronicles 6 - Yupik bible

2 Chronicles 6

¹Angayuqaq Solomon-aaq piicagtuq, “ATANEQ, nakmikellruan uitanaluten amirluni tan'germi-llu.

²Maa-i-llu enelillruamken ucurnarqellriamek agayuvigpagmek, uitavigkarpenek akwarpak.”

³Tuani tamarmeng Israel-aam yui nangerngaut. Angayuqaq-llu tuigtuq cauluki kaigalluki-llu Agayutmun atawaqaasqelluki.

⁴Qanerluni, “Nanraumali ATANEQ Agayutii Israel-aam! Elliin unatmikun piciurtellrukii qanmikun akqutellni David-aamun atamnun qanerluni,

⁵‘Anuqaanemnek yuunka Egypt-aam nuniinek una tekilluku, cucukliqsaitellruunga nunarpagmek Israel-aam nuniini pilivigkamnek agayuvigpagmek wangnun agayularvigkamek, cucukliqsaitellruunga-llu yugmek ciuliqagtekaatnek yum'a Israel-aam.

⁶Tau͡gaam waniwa cucukaqa Jerusalem-aaq wangnun agayularvigkamun uitavikesqelluku, elpet-llu, David-aaq, ataniumasqelluki yuunka Israel-aat.’”

⁷Iquliraa qanellni Solomon-aam, “Ataka David-aaq picirkiullruuq pilinaluni agayuvigpagmek agayularvigkamek ATANERMUN, Agayutiinun Israel-aam.

⁸Tau͡gaam ATANREM qanrutellrua, ‘Elluarrluten piuten agayuvigpagmek piliyugluten pikamnek,

⁹elpet tau͡gaam piliaqngaitan, qetunrarpet tau͡gaam, yuurtarkam elpenun, piliaqeciqaa agayuvigpaka.’

¹⁰“Wani-wa ATANREM piciurtaa akqutkellni: tua-i nangertellruama David-aam atama eniini, aqumlua-llu atanruvianun Israel-aam, ATANREM akqutkellruciatun, agayuvigpagmek-llu pililua agayularvigkamun ATANERMUN, Agayutiinun Israel-aam.

¹¹Agayuvigpagmun ellillruaqa Akqutem Yaassiiga, imalek igausngaviigkenek teggalqugnek akqutem ATANREM piurtellra pillgutekluki Israel-aam yui.”

¹²Tua-llu Solomon-aaq nangertuq ciuqerranun ekuavian ATANREM tangvagtelluni tamalkuitnun Israel-aanun, yagglukek-llu talligni piicagluni.

¹³(Solomon-aaq pilillruuq punernermek tuss'ararrarmek elliluku-llu qukaanun carr'ilnguum. It'ganernek pingayunlegnek angtauq kangirinqeggluni, it'ganernek-llu tallimanek qertutaluni. Qainganun-llu ugtuq, ciisqumiggluni-llu tamarmeng yuut tangerrsugngakiitnun, yaggluki-llu unatni qilatmun.)

¹⁴Piicagtuq-llu, “ATANEQ, Israel-aam Agayutiin, allamek Agayucetaituq elpetun ayuqellriamek qilagmi nunam-llu qaingani, aturturqiinek akqutni, nasvaumaluku caqtaanrilnguq kenken pistevnun yuulrianun tamalkirrluteng ircaqumegteggun.

¹⁵Piciurtellruan akqutkellren atamnun David-aamun; aa-ang, qallatellruuten qanerpegun, unatevgun-llu piciurrluku mat'umi ernermi.

¹⁶Taumek waniwa, ATANEQ Agayutiin Israel-aam, piciureskiu alla akqutellren pistevnun, David-aamun atamnun, qanrutlerpeni elliin kinguvranek atanirturilriartangqerrlainarciqniluku Israel-aamun angayuqauluni, mulngakluteng tau͡gaam maligtestainek Alerquutvet ellii pillruciatun.

¹⁷Watua taumek, ATANEQ Israel-aam Agayutiin, cat tamalkuita piciureskiki akqutelten pistevnun David-aamun.

¹⁸“Tau͡gaam-qaa Agayutem ilumun uitallgutekciqaa yuk nunam qaingani? Tangerrluku qilak, quyinquqapiar-llu qilak, engelqerrungaituk elpet angtacirpenun, qaillun-mi tua-i una Agayuvigpak pilialqa engelqerruyarta elpenun?

¹⁹ATANEQ Agayutmaa, wiinga pistekarpenga. Niisgu piicauteka cikirlua-llu kaigatemnek elpenun.

²⁰Murilkekiu una Agayuvigpak erenrani unugmi-llu, akqutkellren wani agayulararkauniluki elpenun, niicugninga piicallemni una Agayuvigpak cauluku.

²¹Niiski piicautenka, piicautait-llu pistevvet, yugpet-llu Israel-aam, piicakata una cauluku; aa-ang, niiskiki qilagmek uitavigpenek; niiskuvki-llu au͡g'ariski.

²²“Yuk piciliumakan assiilngurmek ilainun, taicimaluni-llu ekuavigpenun wani Agayuvigpagmi, piciulriamek ukvernarisqelluku pinarqutaitniluni.

²³ATANEQ, niicugniniartuten qilagmek, cuqluki-llu pisteten, anucimirqecetaarluku pinarqellria umyugaakun taringevkarluku caliara, au͡g'arluku-llu avalitii ellualriim, nunulirluku elluarrluni pillra tangerrluku.

²⁴“Ingluita-llu yut'en Israel-aat cirlakekatki assiilngillrat elpenun pitekluku, ataam tuigeskata elpenun tailuteng-llu wavet Agayuvigpagmun, piicagluteng-llu ellmeggnek pivakenrirluteng au͡g'aritesqelluteng,

²⁵kitaki niicugniniaraten qilagmek, au͡g'arluki-llu assiilnguit yugpet, ut'rulluki-llu ataam nunamun cikiuteklerpenun ellaitnun ciuliaritnun-llu.

²⁶“Ellalliqsaitevkaquvgu, tua-i-wa yut'en assiilngillruata elpenun, piicakata cauluku una Agayuvigpak, aterpet-llu piciucia nallunairluku assiilngumeggnek tuiggluteng,

²⁷ATANEQ, niicugniki qilagmek, au͡g'arilluki-llu assiilnguitnek pisteten, yut'en Israel-aat, elicungcarluki-llu elluamek piyuavigkaatnek. Nutaan, ATANEQ, ellallungevkaqiu mat'umun nunamun pivnun, cikiuteklerpenun yugpenun au͡gaumangailngurmek paitaqevkarluku.

²⁸“Piitnaq nunami pikan, wall'u cangerlak, wall'u naucillrit piunriumakata: kiirpiim anuqiikun, petgertayulitgun, ciissitgun uguguarngalngurteggun; ingluita-llu kassuguskatki nunarpaitni; wall'u caungraan nangteqnaq, caungraan-llu naulluun;

²⁹piicautait niiskiki. Ilait yugpet Israel-aat, ircaqumegteggun umyuarniuqapiggluteng, yageskatki unateteng Agayuvigpiim tungiinun;

³⁰niiskiki piicautait. Niicugnikiki qilagmek uitavigpenek, au͡g'arilluki-llu. Kiivet elpet nallunritaten umyugai yuum ircaqruan. Caliaqekikut atauciuqaqluta ayuqucirput tangerrluku,

³¹yugpet qigciknauraatgen piyuavikluki-llu piciryaraten erenret tamaita uitallermeggni nunami cikiutellerpeni ciuliamten̄un.

³²“Ayuqluku tekitaq, ilakenrilkiit yugpet Israel-aat, tailria yaaqvanek nunamek angelria atren pitekluku, unateten-llu pinilriit, talligken-llu yagingalriik, tailuni piicakan wani Agayuvigpagmi,

³³niisgu qilagmek uitavigpenek, niiskiu kaigatii-llu kiuluku, tua-i tamarmeng nunam yuin nallunritnauraatgen qigcikluten-llu, yugpet Israel-aat pilauciicetun, nallunrirnauraat-llu una, Agayuvigpak piliaqelqa, elpenun agayularviugarkaucia.

³⁴“Yut'en alerququvki ayaasqelluki anguyagluki ingluit, piicakata nanlengraata, tungiinun uum nunarpiim cucukellerpet, Agayuvigpiim-llu piliaqellma elpenun,

³⁵niiskiki piicautait. Niiskiki qilagmek qakvautmek-llu cikirluki.

³⁶“Assiilngiqata elpenun, tua-i yugtailan assiilngiyuilngurmek, qenruskuvki cirlakevkarluki-llu ingluitnun, ayaucimakata-llu teguaruluteng nunamun yaaqvanelngurmun wall'u canimelngurmun;

³⁷cali tau͡gaam ircaqumegteggun umyualinqigeskata nunami ayaucimavimeggni teguaruluteng, kaigakata-llu elpenun qanerluteng, ‘Wangkuta assiilngillruukut, alangqacirput-llu ciumurulluku, assiilnguq-llu aturluku.’

³⁸Umyualinqigeskata tamalkirrluteng umyuamegteggun, tamalkirrluteng-llu ircaqumegteggun nunami ayaucimavimeggni teguaruluteng, piicagluteng-llu tungiinun nunam, cikiuteklerpet ciuliaritnun, nunam elpet cucukellerpet, uum-llu Agayuvigpiim piliaqellma,

³⁹kitaki niiskiki qilagmek uitavigpenek piicautiit kaigatait-llu, piciurrluku-llu piyuutiit, au͡g'arilluki-llu yut'en elpenun assiilngillret.

⁴⁰“Tua-i, Agayutmaa, tangvagkut niilluki-llu piicautet wani nunami.

⁴¹Waniwa nangerten, ATANEQ, malikluku-llu Akqutem Yaassiiga, nallunairutii pinirpet, itra Agayuvigpagmun maanlluten-llu akwarpak. Agayulirteten, ATANEQ Agayun, aturiumalit anirtuutmek, yut'en-llu tamarmeng angnirlit assilriarucin ellmeggnun pitekluku.

⁴²ATANEQ Agayun, qessayagucaqunaku angayuqaq elpet cucukellren! Neq'akiu pektayiilnguq kenken David-aamun pistevnun.”