Read Yupik 2 Chronicles 8 Bible Online

2 Chronicles 8 - Yupik bible

2 Chronicles 8

¹Iquatni yuinaat (20) allrakut Solomon-aam piliaqellran Agayuvigpak, elliin-llu eneni,

²ataam nautenqigtai nunarpiit Angayuqam Hiram-aam ellminun cikiutekellri, nunalgarrluki-llu Israel-aam yui tamakunun.

³Anguyagkun-llu teguak Hamath-aaq Zobah-llu.

⁴Piliaqaa-llu Tadmor-aq yuilqumi, tamalkuita-llu qemaggvigtalget nunarpiit Hamath-aami.

⁵Cali nautenqigtak Upper Beth Horon-aaq, Lower Beth Horon-aaq-llu, cayailkuciumalriik nunarpiik qacarnengqerrlutek iteryararlutek-llu caniruciryaralegnek,

⁶nunarpii-llu Baalath-aam, tamalkuita-llu qemaggvilget nunarpiit, tamalkuita-llu nunarpiit pekcessuutmi akalrialget uitavigkait, nunarpiit-llu anguyagtem̄i horse-aalget uitavigkait, cat-llu Solomon-aam piliaqsukni Jerusalem-aami, Lebanon-aami, tamiin-llu nunami elliin ataniuqengamini.

⁷Solomon-aam umyugait aturcetevkenaki cakviurten͞gurtai tamalkuita Canaan-aam yui Israel-aat tuqutenritellrit nuna tamana piksagutellermeggni. Ilangqerrluteng Hittite-anek, Amorite-anek, Perizzite-anek, Hivite-anek, Jebusite-anek-llu, maa-i cali tamakut kinguvrit pisten͞guluteng una erneq tekilluku.

⁹Israel-aam yuinek Solomon-aaq cakviurten͞gurcillrunrituq, tau͡gaam kevgiullruut anguyagten͞guluteng, atanerruaruluteng, ciuliqagten͞guluteng-llu akalrialegnun pekcessuutnun, horse-aalegnun-llu anguyagten̄un.

¹⁰Angayuqaq Solomon-aaq ciuqliulrianek atanerruangqertuq amllertaluteng yuinaat yuinaq qulmek cipluku (250), taukut ataniularait yuut.

¹¹Solomon-aam nuliani, Pharaoh-m pania, upagcetaa David-aam, Nunarpiinek allamun enemun piliaqellerminun elliinun. Qanertuq, “Nulirqa uitangaituq eniini David-aam Israel-aam angayuqran, tua-i-wa nani uitavikellri Akqutem Yaassiigan tanqilriaruata.”

¹²Tua-llu Solomon-aaq elliiguq ekualuki elliitnek ATANERMUN ekuavigkun piliaqellermikun ciuqerrani Agayuvigpiim.

¹³Elliilartuq ekuagiluni maliggluku Alerquutii Moses-aam tamaitni tanqilriani ernerni: Sabbath-aani, Nutaram Iralum Nerevkaritiini, pingayuni-llu allrakum iluani piyaralegni nerevkaritni, Nerevkaritiini Quuleciriyaarailnguum Kelipam, Quyurciyaram Nerevkaritiini, Uqisviit-llu Nerevkaritiitni.

¹⁴Maliggluku picirkiutii atami David-aam, elkartai agayulirtet calivigkaitnun, Levite-at-llu nanrautnek atualallerkaatnun ikayullerkaitnun-llu agayulirtet erenrem caliarkai maliggluki caliaqellratni. Cali elkarrluki Agayuvigpagmi nayurtet unuaquaqan tamalkuitni iteryarani avvluki calillerkaitnun, David-aam picirkiutai maliggluki, Agayutem yuan.

¹⁵David-aam-llu alerquutekellri agayulirten̄un Levite-anun-llu enet qemaggviit tungiitnun, allat-llu, maligtaquit ilarrait pinriteksaunaki.

¹⁶Wani-wa qaqitut tamarmeng caliari Solomon-aam ernermek tusnganirraanranek Agayuvigpak qaqisvianun. Tua-i Agayuvigpak qaqituq.

¹⁷Tua-llu Solomon-aaq ayagtuq Eziongeber-aamun, Elath-amun-llu cen̄iini imarpiim uitalriignun, nuniini Edom-aam.

¹⁸Hiram-aaq-llu ayagceciuq sun'anek atanerruaminek angayuqirluki maliggluki imarpigmi ayagayaram elisngastainek. Ayagtut-llu Ophir-aamun malikluki Solomon-aam atanerruari, tuaken-llu ut'rulluteng Solomon-aamun tayima akimiaq ataucimek cipluku uqamaltalrianek cuqnek (16 tons) suulutaamek.