Read Yupik 2 Chronicles 9 Bible Online

2 Chronicles 9 - Yupik bible

2 Chronicles 9

¹Tua-llu queen-aa Sheba-m niituq angelriaruluni qanrutkumallranek Solomon-aam, taiguq Jerusalem-aamun naspaaluku nallunarqellriatgun apyutetgun. Malingqerrluni amllernek pistem̄inek, ungungssinek-llu qulugtellrianek atmalegnek ayuqenrilngurnek tepkegcilrianek naunrarnek, amllermek-llu suulutaamek, teggalquqegtaarnek-llu. Tekicami-llu Solomon-aamun qanrutaa tamalkuitnek umyuamini uitalrianek.

²Solomon-aam-llu kiugurarai tamalkuita apyutai; camek iirumalriartaituq Solomon-aamun nalqigcesciigalkiinek elliinun.

³Queen-aan-llu Sheba-m tangrramiki umyuartucia Solomon-aam, angayuqam enii piliallra,

⁴neqet estuuluan qaingani, uitaviit atanerruarin, kevgiullrat pistain, aturait, ekualuki elliitai, elliitekellri Agayuvigpagmi, ukverciiganani iillayugtuq.

⁵Qanerluni-llu angayuqamun, “Niitelqa nakmiin nunamni caliarpenek umyuartutacirpenek-llu piciulliniuq!

⁶Ukveqellrunritanka qanemcit elpenek, taingama tau͡gaam iigemkun-llu tangrramki ukvertua. Avga angelriarucian umyuartucirpet qanrutkumallrunrituq wangnun. Amatairumaan qanrutkumalleq niitelqa.

⁷Piluaqerpagtat nuliaten! Piluaqerpagtat-llu pisteten, uitallgutkerrlainaqiitgen niicugniluku umyuartucin!

⁸Nanraumali ATANEQ Agayuten! Nallunaillrukii umyuaqegcitni elpenek angayuqrurtellermikun, ataniurisqelluten at'mikun. Tua-i-wa Agayutvet kenekngamiki yun'i Israel-aat piurrlainarcecuamiki akwarpak, angayuqrurtellrukiiten ellaitnun pitalqeggsaraq elluaryaraq-llu elpenun piurrlainarcecesqellukek.”

⁹Tua-llu cikiraa Angayuqaq Solomon-aaq cikiutnek taitellerminek: cuqnek tallimanek suulutaamek, amllellrianek-llu tepkegcilrianek naunrarnek, teggalquqegtaarnek-llu: ayuqaitut-llu tamakut tepkegcilriit naunraat queen-aan Sheba-m Angayuqamun Solomon-aamun cikiutekellri.

¹⁰(Tamakut-llu ilaluku pistai Hiram-aam, Solomon-aam-llu, taitellret suulutaamek Ophir-aamek, taitut algum-aanek muragnek teggalquqegtaarnek-llu.

¹¹Solomon-aam-llu algum-aat muriit aturluki ak'lia Agayuvigpak, angayuqam-llu eniinun, aturcetaaliluni-llu qelutelegnek-llu aturtet atu'urkaitnek. Tamakunek tangrrulriartangqeksaitellruuq ciungani nuniini Judah-m.)

¹²Angayuqam-llu Solomon-aam cikiraa queen-aa Sheba-m canek tamalkuitnek piyullrinek. Avatiitgun Solomon-aam navrutekluki cikiutellrin arnam cikiutainun taitellrinun. Tua-llu utertuq nakmiin nunaminun pisten̄i malikluki.

¹³Waniwa uqamaltacia suulutaam allamiaqan Solomon-aam akurtulaqiin pitauq yuinaq tallimanek cipluku cuqnek (25 tons),

¹⁴avatiitgun tuneniartet kupcaat-llu taitellrita; tamarmeng-llu angayuqri Arabia-m, nunam-llu angayuqri Israelite-at nuniitni, taitelartut suulutaamek qerrirlimek-llu Solomon-aamun.

¹⁵Angayuqaq Solomon-aaq piliuq yuinarnek qulnek (200) angelrianek capkutanek kaugtuarumalrianek suulutaanek; qallingqerrluteng akimiarem usperem nuniini suulutaamek.

¹⁶Pililuni-llu yuinarnek akimiarnek (300) mikellritnek capkutanek, tamarmeng qallirluteng pingayunlegnek uspernek kaugtuarumalrianek suulutaamek. Angayuqam-llu elliluki Enetaanun Napalilriaran Lebanon-aam.

¹⁷Solomon-aaq cali piliuq angtuamek tulurmek angayuqam aqumlleranek. Qallilirluku-llu suulutaarrlainarmek.

¹⁸Aqumlleq arvinlegnek akengqerrluni, it'gat-llu uitayaraat ilakliiyusngaluni aqumllermun, atunem-llu avategkeni tallik uitayararlutek, malruk-wa yugtutuliruak caniagni tallik uitayaraagnek.

¹⁹Yugtutuliruat-llu, qula malrugnek cipluku, nangengqaluteng akrem atunem iquugkeni tuss'aram qaingani. Waten ayuqellriamek angayuqam aqumlleranek pitangqeqaqsaituq nani allani angayuqauvigni.

²⁰Tamarmeng Angayuqam Solomon-aam mercuutai saskat suulutaaruut, tamarmeng-llu assigtat Enetaani Napalilriim Lebanon-aami suulutaarrlainaugut; tamaani Solomon-aam nalliini qerrirliq umyuartequsngallrunrituq akitulriaruluni.

²¹Angayuqam-llu sunai ayalartut Tarshish-aamun pillgutekluki Angayuqam Hiram-aam sunai. Pingayuurtaqata allrakut utertelartut tekiulluteng suulutaanek, qerrirlinek, tulunek, ape-anek, yaqulegnek-llu peacock-anek.

²²Angayuqam Solomon-aam anagngai tamalkuita nunam angayuqri tukuutetgun umyuartuyarakun-llu.

²³Tamarmeng-llu nunam angayuqrin tangerrsuumilaraat Solomon-aaq niitnaluku umyuartuciq, Agayutem elliinun cikiutellra.

²⁴Tamarmeng-llu taitelaraat Solomon-aaq cikiutnek, canek taqumalrianek qerrirlinek, suulutaanek-llu, aturanek, myrrh-anek, tepkegcilrianek-llu naunrarnek, horse-aanek, ciulvagnek-llu. Waten pilartut allamiaqan.

²⁵Solomon-aaq cali pingqertuq tiissitsaanek cetamanek (4,000) horse-aat enaitnek akalrialget-llu pekcessuutet, qula-llu malrugnek cipluku tiissitsaanek (12,000) horse-aatgun pilalrianek, nunalgaringaluki nunarpagni, akalrialget pekcessuutet uitauviitni ilait-llu angayuqam nuniini Jerusalem-aami.

²⁶Ataniumai-llu tamalkuita angayuqat Euphrates-aam Kuiganek ayagluki Philistia tekilluku, Egypt-aaq engelkarrluku.

²⁷Angayuqaullran nalliini qerrirliq nurnaitellruuq teggalqutun Jerusalem-aami, cedar-aat-llu napat nurnaunateng sycamore-atun napaitun Shephelah-m.

²⁸Horse-aat-llu taicimalartut Solomon-aamun Egypt-aamek allanek-llu nunanek tamalkuitnek.

²⁹Solomon-aam pillra, ayagniqarraallranek iquklitellranun igausngaut kalikarni ukuni: Nathan-aam Prophet-aam Kalikai, Ahijah-m Shiloh-armium Qanrutkellri Tekitarkat, Nasvicimallri Iddo-m Prophet-aam ukuni-llu Angayuqran Israel-aam Jeroboam-aam ataniullra qanrutkumauq.

³⁰Solomon-aaq ataniullruuq Jerusalem-aami tamalkuitnun Israel-aanun yuinaagni malrugni (40) allrakuni.

³¹Solomon-aam-llu qavallgutkai atani, tungmagcimaluni-llu nunarpiinun David-aam atami; Rehoboam-aaq-llu qetunraa ataniurtuq kinguakun.