Read Yupik Ezra 3 Bible Online

Ezra 3 - Yupik bible

Ezra 3

¹Iralut malrunelgatni tamarmeng Israel-aam yui nunalgarcimarillruut nunameggni. Tua-i-llu tamarmeng quyurtut Jerusalem-aamun,

²Joshua-m-llu qetunraan Jehozadak-am, agayulirten͞gullgutni-llu, Zerubbabel-aaq-llu qetunraa Shealtiel-aam, tungelquminek ilaluni ataam nautaat ekuavik ayuqucirtuutet aturluki Alerquutaini Moses-aam, Agayutem yuan.

³Utertellriit taukut nunameggnek ayaucimallret alingeng'e'rmeng nunam tamatum yuinek, ekuavik uitavillranun ataam nautaat. Ataam-llu ekualangluki elliitet ciunganicetun unuakumi atakumi-llu.

⁴Uqisviit Nerevkaritiit aturaqluku picirkiutet maliggluki; unuaquaqan ekuagiaqluteng ernermi tuani pisqumalrianek;

⁵cali tamakunun ilakluki elliigaqluteng piciryaramegtun ekuagarkanek tamalkuuciicetun, elliitekat-llu Nutaram Iralum Nerevkaritiini, allani-llu quyurcarameggni quyurtaqameng ATANERMUN agayuaqameng, allat-llu elliilalteng ATANERMUN piyugteqlerteng maliggluku.

⁶Iralut malrunelgata erenrin ciuqliatnek ayagluteng elliilangellruut ekuagarkanek ATANERMUN. Tau͡gaam cali tusnganerkaa Agayuvigpiim ellimaksaunani.

⁷Tua-i yuut akinek cikiqengut akiliutekaitnek teggalqunek calitulit maastilat-llu, cali cikirluki neqkanek, merkanek, olive-aat-llu uquatnek ayagcetarkaitnek nunarpainun Sidon-aam Tyre-am-llu navrutekluki, napanun cedar-aanun Lebanon-aamek, tuaken Joppa-mun taitarkauluki imarpigkun. Makut tamalkuita pillruit apelcillruamegteggu Cyrus-aaq Persia-m atanra.

⁸Allrakum aipaani malrugnek iralungqerluku uterqaanermeggnek Agayuvigpiim uitallranun Jerusalem-aami, caliarteng ayagnillruat. Zerubbabel-aaq, Joshua, nunalgutkek, agayulirtet, Levite-at, tua-i-wa tamarmeng nunameggnek ayaucimallret utertellret Jerusalem-aamun, ilautellruut calilrianun. Tamarmeng Levite-at allrakungelriit yuinarnek wall'u cipluku caliarkicimallruut Agayuvigpak ataam nautesqelluku.

⁹Levite-aq-llu Jeshua qetunrani-llu tungayai-llu, Kadmiel-aaq-llu qetunrani-llu (Hodaviah-m yuullgutkelriari) quyurrluteng ciuliqagciut ataam naparcimallerkaanek Agayuvigpiim. (Ikayurterluteng Levite-anek Henadad-am yuullgutkelriarinek.)

¹⁰Agayuvigpiim tusnganran ellillra ayagniatgu, agayulirtet ulikutameggnek aturluteng taigut cupu'uryaranek tegumiarluteng, Levite-at-llu yuullgutkelriari Asaph-aam nangengqaut tuani qasiarcetaanek tegumiarluteng. Taukut nanraraat ATANEQ ayuqucirtuutek'lalteng Atanermek David-aamek aturluki.

¹¹Aturluteng ATANEQ nanraraat, aturtet waten man'a nanrauteteng pulengtaarluku: “ATANEQ assilriaruuq, kenkii-llu Israel-aamun nangyuunani.” Tamarmeng yuut pitacirmegcetun qayagpagaluteng nanraraat ATANEQ, Agayuvigpiim tusnganerkaan caliaqellra ayagniumarian.

¹²Tau͡gaam amlleret ciuqvallaraat agayulirtet, Levite-at, angutngurtellriit-llu tangertellri ciuqliim Agayuvigpiim, tangvallermeggni Agayuvigpiim tusnganerkaa ellillratni, qiallruut neplirluteng-llu. Tau͡gken allat tuanelnguut nunaniryugluteng qayagpagaluteng;

¹³niitestaita naliit nunaniryugluki qastuluki qayagpagaciinaki, naliit-llu qastuluki qiaciinaki, tua-i-wa qastupiarluteng nepliata yaaqvanek niitnaqluteng.