Read Yupik Ezra 4 Bible Online

Ezra 4 - Yupik bible

Ezra 4

¹Inglukestaita Judah-m Benjamin-aam-llu yuk'egken niitait utertellernun nunameggnek ayaucimallernun caliaqniluku nautenqiggluku Agayuvigpii ATANREM, Israel-aam Agayutiin.

²Tua-i tangerrsarturaat Zerubbabel-aaq ciuliallgutkelriit-llu ciuliqagtait qanrulluki-llu, “Elpecen̄un ilagaucecikut Agayuvigpak nautellerpecen̄i; Agayulartukut Agayutevcen̄un elpecicetun, elliigaqluta-llu elliinun ekuagarkanek Angayuqam Esarhaddon-aam Assyria-rmium ayagceqaanranek maavet maani uitasqelluta.”

³Zerubbabel-aam, Joshua-m, ciuliallgutkelriit-llu ciuliqagtaita kiugait, “Ikayuutekarci nuuqiyutekenritarput naucillemten̄i agayuvigpagkaanek ATANREM Agayutemta. Wangkutnek piliaqeciqerput, Angayuqam Cyrus-aam Persia-rmium alerqullruciatun.”

⁴Tuamta-llu yuut tamaani nunami uitalriit arulaircetengnaqsaaqait alingcira'arluki Jews-aat calillratnek taqevkangnaqluki.

⁵Cali-llu Persia-rmiut atanerruarit akinek cikirluki caliarat inglulircetaarluku. Waten piurarait Cyrus-aam atanrullran taktaciatun egmirluni-llu Darius-aam atanrullran nalliinun.[3]

⁶Angayuqaq Ahasuerus-aaq atanrurteqarraallrani, yuut inglukestaita, Judah-mi Jerusalem-aami-llu, uitalriit kalikatgun igarluteng pinarqelriaruniluki picetaarutellrulliniit.

⁷Tuamta-llu cali Artaxerxes-aaq atanrullrani Persia-mi, ukut Bishlam-aaq, Mithredath-aaq, Tabeel-aq-llu calillguceteng-llu igallrulliniat angayuqaq. Igallrat Aramaic-aatun igaumaluni naaqestiin mumiggluku naaqerkauluku.

⁸Cali Rehum-aaq, nunam atanra, Shimshai-aq-llu, igartii nunam, igallrulliniuk waten Angayuqamun Artaxerxes-aamun Jerusalem-aaq pitekluku:

⁹“Una igaq kingunengqertuq Rehum-aamek, nunam angayuqranek Shimshai-amek, igartiinek nunam, calillgutkegnek, cuqcisten̄ek, allanek-llu atanerruanek Erech-aarmiullernek, Babylon-aarmiullernek, Susa-rmiullernek-llu Elam-aam nuniini,

¹⁰allat-llu yuut ilakluki pinilegpaulriim Ashurbanipal-aam enaitnek ayagcetellri nunalgartelluki-llu Samaria-m nunarpiini allani-llu nunani Kanaknalirnerani-Euphrates-aam.”[4]

¹¹Waten tauna igaq qanerluni: “Angayuqamun Artaxerxes elliin pistainek Kanaknalirnerani-Euphrates-aam uitalrianek.

¹²“Elpenun Angayuqamun nallunritesqumaarput Jews-aat taillret allanek nunanek arulaillruut Jerusalem-aami, waniwa-llu caliaqaat napartenqigteqatarluku tauna assiitellria inglulitaaryulria-llu nunarpak. Qacarneri-llu caliaqluki ayagnillruit maa-i-llu taqniararluki.

¹³Kitaki elpet Angayuqaq, nallunritniaran, nunarpak una nautenqigcimarikan qacarneri-llu taqkata, yuut akiliqurautnek akilicinanrirciqut, akit-llu akivigpenun iluvalriit ikegliluteng.

¹⁴Taumek wangkuta, elpet ataniumak'ngarpeni, tuaten pisqumanritaput, taumek waten pisqumayaaqamteggen:

¹⁵picirkiri yuaresqelluki ciuliarpet callret igauquralallrit. Tuaten pikuvet, nallunrirciqan una nunarpak imumirpak inglulitaalriarucianek, ciuqvanek-llu ayagluni uitacurlagcetaariluni angayuqanek nunat-llu atanirturtaitnek. Yuin-llu ataniumallrat caknernaqluni. Man'a pitekluku una nunarpak piunriumallruuq.

¹⁶Nallunricetarput angayuqaq, una nunarpak naucimanqigeskan qacarneri-llu qaqiskata, ataniumasciigaliciqaten nunat Kanaknalirnerani-Euphrates-aam.”

¹⁷Angayuqaq waten kiuguq: “Una igaq ciunengqertuq Rehum-aamun, nunam atanranun, Shimshai-amun, nunam igartiinun, calillgutkegnun-llu Samaria-mi uitalrianun, allanun-llu nunanun Kanaknalirnerani-Euphrates-aam uitalrianun, aryuqutmek piamci.

¹⁸“Igaq tuyuqellertek mumigqaarluku wangnun naaqellruat.

¹⁹Wiinga-llu alerquilua tamana yuvriisqelluku, maaten piukut ilumun ciuqvanek ayagluni Jerusalem-aam angayuqanek ingluliqenglaucianek yungqellrulliniluni-llu inglulitaaryulrianek picurlagcetaarilriaruluteng tuaten.

²⁰Pinilriit angayuqat atanirturilallruut tuani, tamiini-llu Kanaknalirnerani-Euphrates-aam, akiliqurautnek akilirivkaraqluki.

²¹Taumek alerquigarkauguci taukut angutet calilriit nunarpak nautenqiggluku arulairesqelluki, allamek alerquutmek wangnek niitnatkaatnun.

²²Tuaten egmianun piniartuci, taukut ataniumak'ngamnek picurlagcecivailgata.”

²³Man'a igaq kingunelek Angayuqamek Artaxerxes-aamek naaqumarraartelluku Rehum-aamun, Shimshai-amun, calillgutkegnun-llu, cukangnaqluteng Jerusalem-aamun ayagtut, Jews-aat-llu calilriit taqsuumiilengraata pinirteng aturluku arulaircetait.

²⁴Agayuvigpiim caliaqellra Jerusalem-aami arulaircimallruuq, caliaqenqigtevkenaku-llu allrakum aipaa tekilluku atanrullran Darius-aam Persia-m Atanran.