Read Yupik Ezra 5 Bible Online

Ezra 5 - Yupik bible

Ezra 5

¹Taum nalliini malruk prophet-aak, Haggai-ankuk Zechariah-llu Iddo-m qetunraa, qalartellruuk Israel-aam Agayutiin atrakun Jews-aanun Judah-mi Jerusalem-aami-llu uitalrianun.

²Zerubbabel-aam Shealtiel-aam qetunraan, Joshua-m-llu Jehozadak-am qetunraan, qalartellrak niicamegnegu, ayagnirluku caliaqaak nautenqigtellra Agayuvigpiim Jerusalem-aami, taukuk-llu malruk prophet-aak ikayuragkek.

³Ak'anun pivkenateng nunam atanra Tattenai-aq Kanaknalirani-Euphrates-aam, Shethar Bozenai-aq-llu, ilameggnek atanerruanek ilalutek taiguk Jerusalem-aamun aplutek-llu: “Kia picirkirtaci una Agayuvigpak nautesqelluku aklukiuresqelluku-llu?”

⁴Cali-llu nallunricugait atrit tamalkuita tuani ikayuulluteng Agayuvigpak ataam naulluku calilriit.

⁵Tau͡gaam Agayutem nayuaki Jews-aat ciuliqagtait, atanerruarin Persia-m uitatellruit calillrat taqevkarpek'naku igarpailegmegteggu Angayuqaq Darius-aaq elliinek-llu kiutengvailegmeng.

⁶Waten igaraat tauna angayuqaq:

⁷“Angayuqaq Darius, atanrukina uitanqegcinarqellriakun.

⁸“Nallunritesqumaarput, elpenun Angayuqaq, ayallerput Judah-m nuniinun tangerrluku-llu Agayuvigpii ucurnarqellriim Agayutem ataam naucimallra teggalqunek angelrianek yaassiigenqellrianek, muragnek-llu qacarneranun aturluteng. Munarcaarluteng caliaqaat caliarat-llu ciutmurqurluni.

⁹“Tua-llu yuut ciuliqagtait aptaput qanrutesqelluta kitumun piyunarqucimek cikillruciitnek ataam nautesqelluku Agayuvigpak aklukiurluku-llu.

¹⁰Calilriit-llu atrit apyutekellruaput qanrutnaluten kinkut ciuliqagten͞guciitnek mat'umun caliamun.

¹¹“Waten kiullruut, ‘Wangkuta pistekaakut nunam qiliim-llu Agayutiin, watua-llu caliukut nautenqiggluku Agayuvigpak piliaqumaqerraalleq ak'a tamaani piliaqesterluni aklukartuumarmi pinilriamek Israel-aat angayuqratnek.

¹²Tau͡gaam ciuliamta Qiliim Agayutii qenercecatni cirlakevkallrui Angayuqamun Nebuchadnezzar-aamun Babylonia-rmiumun, tauna Chaldean-aaruluni, taukut kinguveqellriaruut angayuqat. Taum-llu Agayuvigpak navgurluku piunrirtellrua, yuut-llu nuniitnek ayaulluki Babylonia-mun.

¹³Tua-llu allrakut ciuqliatni angayuqrullermini Cyrus-aaq Babylonia-mi picirkirillruuq Agayuvigpak ataam nautesqelluku.

¹⁴Utercetellrui-llu suulutaat qerrirlit-llu Agayuvigpiim aklui Nebuchadnezzar-aam tegullri Agayuvigpagmek Jerusalem-aami ellillruluki-llu agayuvigpagmun Babylon-aami. Angayuqam Cyrus-aam tamakut qantat tunellrui angutmun Sheshbazzar-amek at'legmun, Judah-mi nunamun atanrurcetlerminun.

¹⁵Cyrus-aam-llu qanrutellrua teguluki ut'rutesqelluki Agayuvigpagmun Jerusalem-aamun, Agayuvigpak-llu ataam nautesqelluku ciungani uitavillranun.

¹⁶Tua-i Sheshbazzar-am tailuni tusnganerkai ellillrui; tuaken-llu ayagluku caliaqaat una engelkarrluku, tau͡gaam cali qaqiteksaunani.’

¹⁷“Kitaki, Elpet Angayuqaq, canrilkekuvgu yuarceski cat pillret angayuqat igaucet'lallrit Babylon-aami yuarluku ilumun Angayuqaq Cyrus-aaq picirkirillrucianek wall'u picirkirillrunrilucianek una Agayuvigpak Jerusalem-aami ataam naucesqelluku, nallunricetniarpekut qaillun man'a pisqumacirpenek.”