Read Yupik Ezra 6 Bible Online

Ezra 6 - Yupik bible

Ezra 6

¹Tua-i Angayuqaq Darius-aaq alerquiguq yuaresqelluki enemi tuani cat ak'allaat igausngalriit qemangqaviatni Babylon-aami.

²Tau͡gaam nunarpagmi Ecbatana-mi, Media-m nuniinelngurmek, culugtamek nalaqutellruut waten igaumalriamek:

³“Atanirturillmi allrakut ciuqliatni Angayuqaq Cyrus-aaq picirkirillruuq Agayuvigpak Jerusalem-aami ataam nautesqelluku elliivigkauluku tuqutarkanek elliitnun. Tauna Agayuvigpak yuinaat cetaman qulnek cipluku (90) it'ganernek qertutaarkauluni, tuaten-llu cali pitalriamek iqtutaluni.

⁴Qacarneri taqumaarkauluteng muragmek ataucimek saanermek qalliliraqluki pingayun qalliqelriit teggalqut. Akiit tamakut tamarmeng akilicimaciqut atanruviim akiutainek.

⁵Cali-llu suulutaat qerrirlit-llu assigtat, Angayuqam Nebuchadnezzar-aam ayautellri Babylon-aamun Agayuvigpagmek Jerusalem-aami, ut'rucimaarkauluteng nutem uitavillratnun Agayuvigpiini Jerusalem-aam.”

⁶Tua-llu Angayuqaq Darius-aaq uumek igamek kiutminek ayagceciuq qanerluni: “Una ayagtuq Tattenai-amun, nunam atanranun Kanaknalirnerani-Euphrates-aam, Shethar Bozenai-mun, atanirturillgutetek-llu Euphrates-aam Kanaknalirnerani. “Ullagyaqunaciu Agayuvigpak

⁷caliaqellratgu-llu arenqiallugcecaqunaciki. Judah-m nuniin atanra Jews-aat-llu ciuliqagtait naucivkarki ataam Agayutem Agayuvigpiinek ciuqliim uitavillrani.

⁸Wani-wa-llu alerquramken ikayuusqelluki ataam naparcillratni. Aki atullrat naparcillermeggni egmianun akilicimaarkauguq aturluki akit akiliqurautet atanruviim akiutai Kanaknalirnerani-Euphrates-aam.

⁹Pinriteksaunak unuaquaqan agayulirtet Jerusalem-aami cikilararkaugaten canek tamalkuitnek aturyukaitnek: kuluvagnek, qusnginek, wall'u qusngiyagarnek ekuagarkanek elliitekluki Agayutiinun Qiliim, wall'u mukaarkanek, taryumek, wine-amek, wall'u olive-aat uquatnek.

¹⁰Watnaarkauguten, tua-i-wa elliilarniartut ekuagarkanek akurtuyunarqellrianek Agayutiinun Qiliim, piicautelarniaraatnga-llu elliinun atawaqercecesqellua qetunraanka-llu.

¹¹Cali ilaluku alerquigua kia imum narureskaku una picirkiun, murak eniini inguqerrulria au͡gaumaciquq, ipegcarraarluku-llu iqua kapucimaciqluni temiinun. Enait-llu ciqitallertun imenrurcimaciqut.

¹²Kitaki Agayutem, cucukillrem Jerusalem-aamek tuani ellminun agayulaasqelluki, cirlakluku piunriqiliu angayuqrulria wall'u atanruviulria uumek picirkiutmek narurcikan piunringnaqkaku-llu Agayuvigpak. Wiinga, Darius, waten picirkiriunga. Picirkiuteka tamalkirrluku atuumaarkauguq.”

¹³Tua-llu nunam atanra Tattenai, Shethar Bozenai-aq, atanerruarullgutkek-llu angayuqam alerquutekellra maligtaquqapiarluku tuaten pillruut.

¹⁴14 Jews-aat ciuliqagtaita Agayuvigpak cukamek caliaqaat, tengruca'artengqerrameng prophet-aagnek Haggai-amek Zechariah-mek-llu. Qaqitaat Agayuvigpak alerquumacimegcetun Israel-aat Agayutiitnek, Cyrus-aamek-llu, Darius-aamek, Artaxerxes-aamek-llu Persia-m angayuqrinek.

¹⁵Adar-am iraluani erenrin pingayuatni, allrakut arvinelgurtellratni Angayuqrullran Darius-aam, Agayuvigpak qaqitellruat.

¹⁶Tua-llu Israel-aam yui—agayulirtet, Levite-at, allat-llu nunameggnek ayaucimarraarluteng utertellret—nunaniryugluteng naaqitaat Agayuvigpak.

¹⁷Naaqitlermeggni-llu elliillruut yuinarnek tallimanek (100) kuluvagnek angucalunek, yuinarnek qulnek (200) qusnginek, yuinarnek-llu yuinarnek (400) qusngiyagarnek, qula-llu malrugnek cipluku (12) qusngirngalngurnek assiilnguum au͡gautekaanun elliitnek, pikirluki tamalkuita yuullgutkelriartai Israel-aam.

¹⁸Cali-llu caliarkaitnun elkarrluki agayulirtet Levite-at-llu Agayuvigpagmi agayulallerkameggnun Jerusalem-aami, ayuqucirtuutet aturluki Moses-aam kalikaini uitalriit.

¹⁹Iralut ciuqliat ernengqerluku akimiarunrita'arnek nunameggnek ayaucimallret utertellret Kituun atullruat.

²⁰Tamarmeng-llu agayulirtet Levite-at-llu kencignarcallruameng menuilnguuluteng. Levite-at-llu tuqutait ungungssit Kituutmi ekuagarkait yuut tamarmeng utertellret, agayulirtet, ellaita-llu ekuagarkateng.

²¹Elliitet tamarmeng Israelite-at nunameggnek ayaucimallret utertellret nerellruit, ilakluki tuigtellret maligutlermeggnek yuut agayumanrilnguut tamaani nunami uitalriit piciryaraitnek, ullautellret-llu agayunaluteng ATANERMUN Agayutiitnun Israel-aat.

²²Nerevkariyaraq Quuleciriyarailngurmek Kelipamek atullruat nunaniryugluteng ernerni malrunlegni. Angnillruut cakneq ATANREM atanirturtiinun Assyria-m[5] takumcukevkallruateng, ikayurluki-llu caliaqellratni nautenqigtellran Agayuvigpii Agayutiita Israel-aat.