Read Yupik Ezra 7 Bible Online

Ezra 7 - Yupik bible

Ezra 7

¹Amlleret allrakut kinguatni, Artaxerxes-aaq angayuqrullrani Persia-mi, angucetangqellruuq Ezra-mek aterluni. Uum ciuliari kinguvalriaruluteng Aaron-aamun Agayulirten͞gunrulriamun, wani-wa ukut ciuliari: Ezra qetunraqluku Seraiah-m, Seraiah-llu qetunraqluku Azariah-m, Azariah-llu qetunraqluki Hilkiah-m,

²Hilkiah-llu qetunraqluku Shallum-aam Shallum-aaq-llu qetunraqluku Zadok-am, Zadok-aq-llu qetunraqluku Ahitub-aam,

³Ahitub-aaq-llu qetunraqluku Amariah-m, Amariah-llu qetunraqluku Meraioth-aam, Meraioth-llu qetunraqluku Zerahiah-m,

⁴Zerahiah-llu qetunraqluku Uzzi-m, Uzzi-llu qetunraqluku Bukki-m,

⁵Bukki-llu qetunraqluku Abishua-m, Abishua-llu qetunraqluku Phinehas-aam, Phinehas-aaq-llu qetunraqluku Eleazar-aam, Eleazar-aaq-llu qetunraqluku Aaron-aam.

⁶Ezra elitnauraullruuq elisngaqapiggluki Alerquutet ATANREM, Israel-aam Agayutiin, cikiutekellri Moses-aamun. Ezra-llu atawaqercecimiimi ATANERMEK Agayutminek, angayuqam cikillrua piyullrinek tamalkuitnek. Allrakut malrunelgatni atanrullran Artaxerxes-aam, Ezra ayallruuq Babylonia-mek Jerusalem-aamun, maligluni Israelite-at yuin ilaitnek ilakluki agayulirtet, Levite-at, Agayuvigpagmi aturcetaartet, Agayuvigpagmi murilkestet, calistet-llu.

⁸Ayallruut Babylonia-mek iralum ciuqliim erenrin ciuqliatni. Agayutem-llu ikayullrakun tekitellruut Jerusalem-aamun iralut tallimiita erenrin ciuqliatni.

¹⁰Ezra-m elitnaurturallrua ATANREM Alerquutii, aturtuarluku, elitnaurutekluki-llu tamalkuita alerquutai pisqutai-llu Israel-aam yuinun.

¹¹Angayuqam Artaxerxes-aam kalikarnek cikiraa Ezra, agayulirta elitnaurumalria, elisngalria alerquutnek ATANREM cikiutekellrinek Israel-aamun. Kalikaq waten imarluni:

¹²“Una kingunengqertuq Angayuqamek Artaxerxes-aamek agayulirtem̄un Ezra-mun elisngastiitnun alerquutain Qiliim Agayutiin.

¹³“Alerquranka ataniumakenka tamalkuita Israel-aam yui, agayulirtet Levite-at-llu piyulriit ayagcecesqelluki maliggluten Jerusalem-aamun.

¹⁴Wiinga, malrunlegnek ayuqucirturtemnek ilalua, ayagcetamteggen paqtesqelluku Jerusalem-aami Judah-mi-llu qaillun pitalriamek niisngaciit Alerquutain Agayutevci, elpenun cikiutekumallret.

¹⁵Ayautarkaugaten-llu suulutaanek qerrirlinek-llu wiinga ayuqucirturtem̄a-llu elliiteksuumiqemten̄ek Agayutiitnun Israel-aat, ellii Agayuvigpangqellria Jerusalem-aami.

¹⁶Ayautarkaugaten-llu quyurtelten suulutaat qerrirlit-llu tamalkuitnek Babylonia-m nunainek, cali Israelite-at agayulirtaita-llu elliitait cikiutekluki Agayutmeng Agayuvigpiinun Jerusalem-aami uitalriamun.

¹⁷“Akit ukut mulngakluki aturarkaugaten kipulluten-llu angucalunek kuluvagnek, angucalunek qusnginek, qusngiyagarnek, mukaarkanek, wine-amek-llu, elliitekluki-llu ekuaviani Agayuvigpiim Jerusalem-aami.

¹⁸Ilakuat suulutaat qerrirlit-llu aturniaten canun piyullerpenun, yugpet-llu canun piyullritnun, Agayutevci pisqutainun uniurusnganrilngurnun.

¹⁹Tun'arkaugaten Agayutmun Jerusalem-aami tamalkuita aklut, enem iluani atuulalriit, cikiutekumallret elpenun Agayuvigpagmi agayuaqavci atulaasqelluki.

²⁰Canek allanek piyukuvet Agayuvigpiim pikaanek, aqvatniartuten angayuqam akivianek.

²¹“Alerquranka akiliurtet Kanaknalirnerani-Euphrates-aam uitalriit egmian cikilaasqelluku Ezra, agayulirta elitnaurumalria Agayutem Alerquutiinek, tamalkuitnek piyullrinek,

²²engelkarrluku waten tiissitsaanek malrunlegnek tiissitsaam-wa avga (7,500) uqamaltalrianek qerrirlimek, tiissitsaam avganek (500) cuqnernek mukaarkanek, tiissitsaam avga yuinaak malruk qulnek cipluku (550) gallon-aanek wine-amek, tiissitsaam avga yuinaak malruk qulnek cipluku (550) gallon-aanek olive-aat uquatnek, piyugtaciatun-llu taryumek.

²³Murilkelluci paivcitlerkaanek canek tamalkuitnek Qiliim Agayutiin piyuutainek Agayuvigpami pikainek, qenngut'lanritniaraanga kingumkun-llu atanrulriit.

²⁴Akiliqurautnek tegusngaituci agayulirten̄ek, Levite-anek, aturcetaarten̄ek, kellutesten̄ek, calisten̄ek, wall'u allanek Agayuvigpagmi casten͞gulrianek.

²⁵“Elpet-llu, Ezra, umyuartuneq Agayutem cikiutekellra elpenun aturluku, cucuklirniartuten cuqcivigmi caliarkanek, cuqcistekanek-llu ataniurtekaitnek tamalkuita yuut Kanaknalirnerani-Euphrates-aamelnguut, yuulriit Agayutvet Alerquutai aturluki. Elitnaurutkarkaugan-llu Alerquun kinkunun imkunun nallustainun.

²⁶Kia imum atunrilkaki Agayutevci alerquutai wall'u nunam alerquutai, egmianun anucimirqecetaararkaugarci: tuqulluku wall'u ayagtelluku nunamek wall'u akluinek uayarluku wall'u iterrluku.”

²⁷Ezra qanertuq, “Nanraumali ATANEQ Agayutiit ciuliamta! Umyugillrua angayuqaq qigcikesqelluku waten ayuqellriakun Agayuvigpii ATANREM Jerusalem-aami.

²⁸Agayutem naklekutiikun unakellruaqa yugnikutii assilria angayuqam, ayuqucirturtain, tamalkuita-llu pinilegpaulriit atanerruarin; ATANREM Agayutma caceturtellruanga, amlleret-llu Israel-aam yuini ciuliqagcet unakellruanka utertesqelluki maligglua.”