Read Yupik Ezra 9 Bible Online

Ezra 9 - Yupik bible

Ezra 9

¹Makut tamalkuita pimariluki Israel-aam yuin ciuliqagtaita ilaita ullagaatnga qanrullua-llu yuut, agayulirtet, Levite-at-llu ilagautelarniluki avaqlimeggnun yugnun Ammonite-at, Moabite-at, Egypt-aarmiut, wall'u Canaanite-at, Hittite-at, Perrizzite-at, Jebusite-at, Amorite-at-llu nunautaitni uitalrianun. Tamakunun-llu maligtaqulluteng atuyunailngurnek atulalliniluteng.

²Jews-aat angutait nulirtulalliniluteng allat nunat arnaitnek, menuurtelluki tanqilriit Agayutem yui. Ciuliqagtait-llu atanerruarit-llu arcaqanruluteng tuaten pillermegteggun.

³Wiinga-llu tamana niicamku aturanka allgullruanka qecuurluki-llu nuyanka ungiinka-llu, aqumlua-llu angniitqapigcama cakneq.

⁴Tuani-llu angniitqapigglua aqumgalua atakumi tuqutarkanek elliiyaraq tekilluku, yuut-llu quyurtengluteng avatemnun—alingelriit Israel-aat Agayutiita qanellra pitekluku nunameggnek ayaucimallermeggnek utertaullret assiilnguit piluki.

⁵Atakumi tuqutarkanek elliiyaraq tekican, tuaken angniinii aqumgallemnek nangertua, aturanka allguumalriit cali aturluki, ciisqumigtua-llu talligka yagglukek piicagtua ATANERMUN Agayutemnun.

⁶Qanerlua, “Agayun, kasnguyussiyaagtua qamiquma ciugtellerkaanek ciuqerpeni. Assiilngumta qamiquput kiturluki patuakut; kiituani-llu qilak tekitaat.

⁷Ciuliamten̄ek ayagluta una tekilluku, wangkuta yugpeni assiilngurmek atulriaruukut. Assiilngumta wangkuta, ataneput, agayulirteput-llu teguarurcet'laraitkut allanun angayuqanun, tuqurqumaaqluta uayaumaaqluta, ayaucimaaqluta-llu teguarurrluta. Angelriamek kasnguyugcecimaaqluta, maa-irpak-llu cali tuaten ayuqluta.

⁸Tau͡gaam watua carrarmi, ATANEQ Agayun, takumcukellruarpekut, ilaput-llu anagcelluki teguarullratnek uitavkarluki alingniurpek'naki wani tanqilriami. Teguarullemten̄ek anagcetellruarpekut nutaramek-llu yuucimek cikirluta.

⁹Teguarullruyaaqukut, tau͡gaam elpet cakaaqsaitarpekut teguarullemten̄i. Persia-m atanrinun takumcukevkallruarpekut, unguvavkararpekut-llu, nautenqiggluku-llu Agayuvigpiin, navguumalleq, maani-llu Judah-mi Jerusalem-aami-llu elluiluta uitavkarluta.

¹⁰“Tau͡gaam watua, Agayun, camek qanerciqseta makut tuaten pirraartelluki? Wangkuta-wa ataam narurcamteki alerquutet

¹¹cikiutekelten wangkutnun pistevgun prophet-aatgun. Ellaita qanrutellrukaitkut nuna uitavigkarput menuulriaruniluku, yuut-wa tamaanelnguut imillruatgu pellernarqelrianek caliameggnek iquanek iqua tekilluku.

¹²Inerqullruitkut paniput qetunraitnek tamakut uingevkalaasqevkenaki wall'u qetunraput nulirtulaasqevkenaki paniitnek; cali piluta ikayulaasqevkenaki piluaqallerkaatnun, nunami tamaani elluiluta uitauryukumta kinguliamta-llu yuinun paitaqevkaryukumteggu akwarpak.

¹³Assiilnguput arcaqalriit pitekluki anucimirqecetaallrung'e'rpekut, wangkuta nallunritukut elpet Agayun anucimirqecetaaqsaitarpekut pinarqucirput engelkarrluku, cali unguvavkarluta piunrircetevkenata.

¹⁴Qaillun tua-i waniwa piluta ataam nallunguarciqseta inerquuteten kassuulluta-llu tamakunek assiitqapigtellrianek yugnek? Tuaten pikumta, eq'uqerten angelriaruciquq piunrirciqerpekut-llu tamaq'apiaramta, kina imna atauciungraan unguvavkarpek'naku.

¹⁵ATANEQ Israel-aat Agayutiita, pitalqellriakun cuqcilartuten, tau͡gken wangkuta pinarqellriarungramta unguvavkarluta. Wani-wa apervikuatekarput assiilngillerput elpenun; tua-i wangku'rlumta ciuqerpenun ullaucunaicaaqukut.”