Read Yupik Nehemiah 11 Bible Online

Nehemiah 11 - Yupik bible

Nehemiah 11

¹Yuut ciuliqagtait Jerusalem-aami nunalgartellruut, allat-llu nall'arcetaariluteng cucuklillruut qulen ilakuralriit naliit uitaarkauciitnek Jerusalem-aami tanqilriami nunarpagmi, allat tau͡gken uitalararkauluteng allani nunarpagni wall'u nunacuarni.

²Yuut-llu nanrarait kinkut umyuarteng aturluku uitayulriit Jerusalem-aami.

³Allani nunarrarni nunarpagni-llu Israel-aam yui, agayulirtet, Levite-at, Agayuvigpagmi calialget, kinguvrit-llu Solomon-aam pistain, uitaut nakmiin nunameggni. Ukut wani-wa Judah-m nuniini piuranrita igausngallrit, Jerusalem-aami uitalriit.

⁴Athaiah, qetunraa Ussiah-m tutgarii Zachariah-m. Allat-llu ciuliari ilangqertut: Amariah, Shephatiah, Mahalalel-aaq-llu, kinguvri Perez-aam Judah-m qetunraan.

⁵Maaseiah-llu, qetunraa Baruch-aam tutgarii Colhozeh-m. Allat-llu ciuliari ilangqertut: Haziaah, Adaiah, Joiarib, Zachariah-llu, kinguvri Judah-m qetunraan Shelah-m.

⁶Perez-aam kinguvrinek yuinaat yuinaq pingayun pingayunlegnek cipluku (468) alingura'arpek'nateng anguyagtet uitallruut Jerusalem-aami.

⁷Sallu, Meshullam qetunraa Joed-aam tutgarii. Allat-llu ciuliari ilangqellruut: Pedaiah, Kolaiah, Maaseiah, Ithiel, Jeshaiah-llu.

⁸Gabbai, Sallai-llu canimenakek ilakutak Sallu-m. Tamarmeng Benjamin-aam kinguvri Jerusalem-aami uitallruut amllertaluteng tiissitsaam avga, yuinaat yuinaq atauciq, pingayunlegnek cipluku (928).

⁹Joel-aaq Zichri-im qetunraa ciuliqagtekellruat, Judah-llu Hassenuah-am qetunraa tungliuluni atanerruaruluni nunarpagmi.

¹⁰Jedaiah Joiarib-aam qetunraa, Jachin-aaq-llu.

¹¹Seraiah, Hilkiah-m qetunraa tutgarii Meshullam. Allat-llu ciuliari ilangqellruut: Zadok, Meraioth, Ahitub-aaq-llu Agayulirten͞guneq.

¹²Ukut naumallgutkelriit Agayuvigpagmi calilallruut amllertaluteng tiissitsaam avga, yuinaat akimiaq ataucimek cipluku, malruk-wa (822). Adaiah qetunraa Jeroham-aam tutgarii Pelaliah-m. Allat-llu ciuliari ilangqellruut: Amzi, Zachariah, Pashhur, Malchijah.

¹³Tamarmeng ukut naumallgutkelriit amllertaluteng, yuinaat qula malruk, malrugnek cipluku (242), ilakuralrianun ciuqliullruut. Amashsai, Azarel-aam qetunraa Ahzai-am tutgarii. Allat-llu ciuliari ilangqellruut Meshillemoth-aamek, Immer-aamek-llu.

¹⁴Ukuni-llu naumallgutkelriani yuinaat arvinlegen pingayunlegnek cipluku (128), anguyagten͞gullruluteng alinguraralriaruvkenateng. Ciuliqagterluteng Zabdiel-aamek, ilakuralriit piuranritnek kingunelegmek.

¹⁵Shemaiah, Hasshub-aam qetunraa Azrikam tutgarii. Allat-llu ciuliari ilangqellruut: Hasabiah-mek Bunni-llu.

¹⁶Shabbethai Jozabad-aaq-llu Levite-ani piuranrulriik atanirturten͞gullruuk Agayuvigpiim elatiinek calilrianun.

¹⁷Mattaniah, Mica-m qetunraa Zabdi-aam tutgarii, Asaph-aam kinguvra. Ciuliqagtellrui Agayuvigpiim aturtai atullratni quyatmek piicagyaramek. Bakbujiah-wa, Mattaniah-m ikayua. Abda, Shammua-m qetunraa, Galal-aam tutgarii, Jeduthun-aam kinguvra.

¹⁸Waten amllertalriit Levite-at yuinaat qulngunritaraan cetamanek cipluku (284) uitallruut Jerusalem-aami.

¹⁹Akkub-a, Talmon, tungayamegnek ilalutek, yuinaat pingayunlegen qula malrugnek cipluku (172) amllertaluteng.

²⁰Ilait-llu Israel-aam yui, allat-llu agayulirtet Levite-at-llu uitallruut nunarpaini nunarraini-llu Judah-m nakmiin nunautmeggni.

²¹Agayuvigpiim calistai Jerusalem-aam iliini Ophel-aami uitaluteng, caliaqluteng Ziha-mek Gishpa-mek-llu atanirturterluteng.

²²Uzzi, Bani-am qetunraa Hashabiah-m tutgarii, atanirturten͞gullruuq Levite-anun. Allat-llu ciuliari ilangqellruut: Mattaniah-mek Mica-mek-llu, Asaph-aamek naumavilget ilakluku, ukut Agayuvigpagmi aturcetaat agayuaqata atulaq'ngait caliaqellruit.

²³Angayuqam alerquutekellrini taqumaluteng naumavillgutkellriit kipullgutaagulluki aturarkat caliaqelararkauluki unuaquaqan.

²⁴Pethahiah, Meshezabel-aam qetunraa, ilakellriartainek Zerah Judah-m-llu yuullgutkelriartain, cingilek'laraat Israel-aam yuin Persian-aat apqaurviatni.

²⁵Amlleret-llu yuut nunarrarni uitalartut naucetaarvimeng yaaqsinrilkaitni. Yuullgutkellriari Judah-m uitaluteng Kiriath Arba-mi, Dibon-aami, Jakabzeel-ami, nunarrarni-llu taukut nunarpiit yaaqsinrilkaitni.

²⁶Cali-llu uitaluteng nunarpagni Jeshua, Moladah, Bethpelet,

²⁷Hazarshual-aami, Beersheba-mi nunarrarni-llu avatiinelngurni.

²⁸Uitaluteng-llu nunarpagni Ziklag-ami, Meconah-ami nunarrarni-llu,

²⁹Enrimmon-aami, Zorah-mi, Jarmuth-aami-llu,

³⁰Zanoah-mi, Adullam-aami, nunarrarni-llu taukuk canimelkiigni. Uitaluteng Lachish-aami, naucetaarvigni-llu canimelkaini, Azekah-mi-llu nunarraini-llu. Tua-i-wa Judah-m kinguvri uitaut nunami akuliigni Beersheba-nkuk ungalalirnermi, Hinnom Valley-m neglirnermi.

³¹Benjamin-aamek-llu yuullgutkelriartai uitallruut Geba-mi, Michmash-ami, Ai-ami, Bethel-aami nunarrarni-llu yaaqsinrilkaitni uitalriani,

³²Anathoth-aami, Nob-ami, Ananiah-ami,

³³Hazor-aami, Ramah-mi, Gittaim-aami,

³⁴Hadid-aami, Zeboim-aami Neballat-aami,

³⁵Lod-ami, Ono-mi-llu, calitulit-llu kuignayuatni.

³⁶Ilait-llu Levite-at uitatullret Judah-m nuniini alerquumallruut uitallgutkesqelluki Benjamin-aam yui.