Read Yupik Nehemiah 13 Bible Online

Nehemiah 13 - Yupik bible

Nehemiah 13

¹Alerquutii Moses-aam naaqumallrani yugnun, qanrumalria tekitaat Ammonite-at Moabite-at-llu Agayutem yuinun ilagautarkaunriluciat.

²Man'a tuaten pilliniuq Ammon-aam yuin, Moab-am-llu yuin cikillrunrilatki Israel-aam yui neqnek mermek-llu anellratni Egypt-aamek. Cali-llu akilirluku Balaam-aamun aniqlaasqellruamegteki, tau͡gaam Agayutem mumigtellrua aniqlaatii atawaqautngurrluku.

³Israel-aam-llu yuin man'a naaqumallrani niicamegteggu ilakumanrilnguut tamalkuita ayagcetellruit uitavimeggnek.

⁴Eliashib-aam, agayulirtem, aulukisten͞gulriim Agayuvigpiim qemaggviinek, ak'anun yugnikellrua Tobiah.

⁵Uitavkaraa-llu Tobiah enet iliitni Agayuvigpagmi qemangqaviatni mukaarkat elliitet, aruviaraat elliitet, calissuutet atulaqait Agayuvipagmi, agayulirten̄un elliitet, qulngurutaita mukaarkat, wine-at, uqut-llu, cikiutngullret alerquun aturluku Levite-anun, Agayuvigpiim aturcetaartainun, murilkestainun-llu.

⁶Mat'um pillran nalliini Jerusalem-aami uitallrunritua, tua-i-wa yuinaq malrugnek cipluku (22) allrakungeqerluku angayuqrullran Artaxerxes-aam Babylon-aami, utertellruama cat pillret ayuquciitnek qanemcicarturluku. Qaillun tayima pitariluku tamaani uitalqa, apelcillruaqa angayuqaq ayagyuglua,

⁷Jerusalem-aamun-llu utertua. Nallunrirluku-llu Eliashib-aamun uitavkaucia Tobiah enet iliitni Agayuvigpagmi.

⁸Qenertellruunga-llu cakneq, Tobiah-m-llu aklui tamalkuita tuaken anlluki.

⁹Ellimerranka-llu piciryaraq aturluku menuircaasqelluki enet Agayuvigpiim iluanelnguut, aklui, mukaarkat elliitet, aruviar-llu ataam tuavet enemun ellisqelluki.

¹⁰Maaten-llu cali pianka Agayuvigpagmi aturcetaartet allat-llu Levite-at ayallrullinilriit Jerusalem-aamek uterrluteng naucetaarvimeggnun, cikiumaksaitellrulliniameng yuutekaitnek nurutarkauvkenaki.

¹¹Nunuranka-llu atanerruat Agayuvigpak aulukumanritellranek. Levite-at tua-i aturtet-llu utercetanka Agayuvigpagmun ataam caliarit caliaqesqelluki.

¹²Tamarmeng-llu Judah-m yui ataam taicilangut Agayuvigpiim qemaggviinun qulngurutmeggnek mukaarkanek, wine-anek, olive-aat-llu uquitnek.

¹³Cucuklillruunga-llu aulukestekaitnek qemaggviit: Shelemiah-mek agayulirtem̄ek, Zadok-aamek-llu elisngastiitnek Alerquutet; Pedaiah-mek-llu Levite-amek. Hanan-aaq-llu, Zaccur-aam qetunraa Mattaniah-m tutgarrii, ikayuqesqelluku taukunun. Nallunritellruaqa ukunun angutnun peng'garutaunii pillerkaqa elluarrluteng caliaqeciqngatki aruqutkellrit allat calilriit atu'urkait.

¹⁴Agayutmaa, neq'akiki makut tamalkuita calillrenka Agayuvigpagpenun agayuyaranun-llu.

¹⁵Tamatum-llu nalliini tangertua yugnek Judah-mi mecuirilrianek wine-arkanek atsanek Sabbath-aami, ciulviit tuaten ucilirluki mukaarkanek, wine-anek, atsanek, figs-aanek, allanek-llu ayuqenrilngurnek, tamakunek-llu itrucilrianek Jerusalem-aamun Sabbath-aami; taukut aarcirturanka Sabbath-aami canek tun'isqevkenaki.

¹⁶Ilait-llu yuut, Tyre-am nunarpiinek kingunelget, uitaut Jerusalem-aami, itrutaqluteng neqnek, ayuqenrilngurnek-llu aklunek nunarpagmun tuneniarkameggnek Sabbath-aami Judah-m yuinun Jerusalem-aam-llu yuinun.

¹⁷Caliarat atawakevkenaku taqsuariutanka Judah-m atanerruari qanrulluki-llu, “Cauga man'a assiilnguq caliarci, erneq uitayaraq qigcignairulluku?

¹⁸Man'a pitekluku Agayutem anucimirqecetaallrui ciuliaci piunriqapiggluku una nunarpak. Tau͡gken elpeci Agayutem eq'uqertii pikanircetaaraci Israel-aam yuinun qigcignairutlerpeciuggun Sabbath-aaq.”

¹⁹Tua-i alerquranka Jerusalem-aam ikirtuqai palutelararkaurtelluki Sabbath-aam ayagnillrani atakuarauciatun,[10] ikirtenqiggngaunaki-llu Sabbath-aaq pellugnatkaanun. Pistem̄a-llu ilait elkartanka ikirtuqanun murilkesqelluki kina camek itrucingairutelluku nunarpagmun Sabbath-aami.

²⁰Ataucirqumek-llu wall'u malrurqugnek tunenialalriit aklunek ayuqenrilngurnek qavartallruut elatiini nunarpiim qacarneran tallimiritem atakuani.

²¹Wiinga-llu aarcirtullruanka qanrulluki, “Camek unangengaituci tuani utaqallerpeciuggun unuaqullerkaa. Tuaten pinqigeskuvci tegularluci piciqamci.” Tuakenirnek-llu tainqigtellrunritut Sabbath-aami.

²²Levite-at-llu alerquranka menuircarraarluki tailuki ikirtuqat murilkelaasqelluki qigciklerkaa uitayaram pitekluku. Agayutmaa, mat'ukun cali umyuaqekia, camun-llu pivkaryaqunii kenken angelria aturluku.

²³Cali-llu taum nalliini nallunriranka ilait Jews-aat amlleret nulirtullruciitnek arnanek Ashdod-aamek, Ammon-aamek, Moab-amek-llu.

²⁴Avgit irniarit qalartaqluteng Ashdod-aarmiut qaneryaraicetun, wall'u allatgun qanrucitgun, wangkuta qanrucimcetun qalarcesciiganateng.

²⁵Wiinga-llu nunuranka taukut angutet, qayagauralua aniqlaatnek ellaitnun, kaugtuarluki, nuyait-llu qecugmiarluki. Akqivkaranka-llu Agayutem atrakun uum kinguakun watqapik ellait wall'u irniarit kassuusngaunaki ilakumanrilngurnek.

²⁶Qanrutanka-llu, “Solomon-aaq-qaa, Israel-aam angayuqra, arnat waten ayuqellriit picurlagcetellrunritaat? Amllerni atanruvigni angayuqertaitellruuq elliitun ayuqellriamek, Agayutiin-llu kenkellruluku, angayuqrurtelluku-llu tamalkuitnun Israel-aam yuinun; tau͡gken tuaten pillrungraan arnat ilakumanrilnguut assiilngircetellruat.

²⁷Tua-llu-qaa wangkuta elpeci niilluci man'a angelriarulria assiilnguq aturlaut narurrluku Agayutvut kassuutellemteggun ilakumanrilngurnek arnanek?”

²⁸Joiada qetunraqellrua Eliashib-aam Agayulirten͞gunrem, tau͡gaam Joiada-m qetunraan iliit kassuutellruuq Sanballat-aam panianek, nunarrarmek Beth Horon-aamek kingunelgem, tua-i Joiada ayagcetaqa Jerusalem-aamek.

²⁹Agayutmaa, umyuaqekiki qaillun ukut yuut menuurcillrat agayulirten͞guyaramek, akqut'lillren-llu agayulirtet Levite-at-llu pillgutekluki.

³⁰Menuircaranka-llu yuut tamalkuitnek canek ilakumanrilnguut piitnek; taqutua-llu picirkanek agayulirtet Levite-at-llu maligtarkaitnek tamalkuitnun nalluarkaunrirtelluki caliarit.

³¹Picirkiranka-llu taitelararkaullritnek, pinariaqan, muragat atuugarkat ekualuki elliitnun, yuut-llu taitelaasqelluki elliitaitnek mukaarkanek naugiqarraarutnek, atsanek-llu naugiqarraarutnek. Agayutmaa, umyuaqekiki makut tamalkuita, umyuaqekia assilriatgun caliaqellemkun.