Read Yupik Nehemiah 2 Bible Online

Nehemiah 2 - Yupik bible

Nehemiah 2

¹Iraluani Nisan-aam, yuinaurutiitni allrakut angayuqaullran Artaxerxes-aam, taicatgu wine-amek teguluku tun'aqa angayuqamun. Taum ciungani angniinii tangeqsaitellruanga,

²taumek aptellrukiinga, “Ciin angniilngapakarcit, amta-llu naulluuvkenak? Cam imum umyuarpeni angniicecugnarqaaten?” Alingem-llu tuani tutaanga.

³Angayuqaq kiullruaqa, “Angayuqaq akwanun unguvakili! Ciin tangelqa angniitenricarta nunarpak ciuliama tungmagcimaviat navguumaluku, ikirtuqai-llu kenerkun piunriumaluteng?”

⁴Angayuqam tua-i qanrutellruanga, “Camek-qaa piyuutengqertuten?” Tuani Qiliim Agayutiinun piicallruunga,

⁵tua-llu qanrulluku angayuqaq, “Canrilkekuvgu, ilukegcinarqekuma-llu elpeni, ayagcessnga Judah-mun ciuliama tungmagcimaviatnun, nunarpak ataam naucarturluku.”

⁶Angayuqam qanrutaanga nuliani canimini aqumgaluku, “Qaillun pitalriamek cataiciiqsit, qaku-llu uterciiqsit?” Ayagcecugngallinianga, qaku utertellerkamnek qanrutaqa.

⁷Qanrutaqa-llu, “Cangalkenrilkuvgu iganek ayauceskia nunat atanirturtaitnun Euphrates River-aam yaatiinelngurnun,[1] alerqurluki tamaaguircet'laasqellua Judah-mun tekitnatkamnun.

⁸Allamek-llu cali igamek kaigaunga ciunelegmek Asaph-aamun, aulukestiitnun napalilriit nunautain angayuqam, alerqurluku cikiisqellua muragnek atuugarkanek nayurvian Agayuvigpiim ikirtuqerkainun, nunarpiim-llu qacarnerin kitugutkaitnun, enem-llu uitavigkama.” Angayuqam-llu tamalkuitnek piyullemnek cikillruanga, tua-i-wa Agayutem piluaqercecanga.

⁹Angayuqam maligcetellruanga anguyagtet atanerruarita ilaitnun anguyagten̄un-llu horse-aatgun pilalrianek, tua-i elraugua Kanavalirneranun Euphrates-aam. Tuani tun'anka angayuqam igallri nunat atanritnun.

¹⁰Tau͡gaam Sanballat-aam, kingunelgem Beth Horon-aamek, Tobiah-m-llu, atanerruam Ammon-aam nuniini, niitellermegni yuk tekitniluku Israel-aam yuinek ikayuqengyarturluni cakneq qenertellruuk.

¹¹Ciumurtellruunga Jerusalem-aamun, erneret-llu pingayun aturluki

¹²kina qanruteksaitellruaqa Agayutem piyuumircetellranek qaillun pillerkaanek Jerusalem-aaq. Tua-llu unuum qukaani maklua anua, malilirlua qavcirrarnek malima ilaitnek. Ungungssinek maliinata kiingan tau͡gaam ciulvak ekumavika.

¹³Unuullruuq cali anllemni nunarpagmek Valley Gate-akun kanaknelirnermelngurkun, ungalatmun-llu ayaglua kiturluku Dragon’s Fountain-aaq Rubbish Gate-amun. Kituinanemni yuvrillruanka navgumalriit nunarpiim qacarneri ikirtuqat-llu ekualuki piunriumalriit.

¹⁴Calaralirneranek-llu nunarpiim ayagtua negetmun Fountain Gate-amun King’s Pool-amun-llu. Tau͡gaam enellret imenrit tamaani anagucata ekumavika ciulvak tumkaituq,

¹⁵taumek atrallruunga Kidron Valley-mun ayagturlua-llu yuvrirluku qacarneq. Uterrlua-llu nunarpagmun tumllemkun Valley Gate-aq tumekluku.

¹⁶Tamaani atanerruat nallullruat natmun ayallruciqa callruciqa-llu qanruteksailtellruamki Jews-aat, agayulirtet, atanerruat, kinkut-llu caliamun ikayuutarkaq.

¹⁷Tau͡gaam tuani qanrutanka, “Tangrrarci arenqialuguteput Jerusalem-aaq imerqumiin ikirtuqai-llu ekuamaluteng. Kitaki, nautenqiggnauraput qacarnera Jerusalem-aam kiaresngialutkenrirniarput.”

¹⁸Qanrutanka-llu Agayutmun nayullrucimnek ikayullrucimnek-llu angayuqam-llu qanellranek wangnun. Qanrucamteng kiullruatnga, “Ayagnirnaurtukut kitugciluta!” Tua-i uptut caliaq ayagnirnaluku.

¹⁹Sanballat-aaq, Tobiah, Arab-aq-llu at'lek Geshem-aamek niicameng caliqataucimten̄ek, temciarautekaitkut caunrilkuurluta-llu, qanerluteng-llu, “Caqataryukluci umyuarteqseci? Angayuqaq-qaa ingluliqatararci?”

²⁰Kiullruanka, “Qiliim Agayutiin piluaqerceciiqaakut. Elliin pistekaakut, ayagnirluta caliqatartukut. Elpeci tau͡gaam piunarquciituci nunautengqellerkarpecen̄ek Jerusalem-aami, ilagaucugngaarkauvkenaci-llu piciryarainun.”