Read Yupik Nehemiah 3 Bible Online

Nehemiah 3 - Yupik bible

Nehemiah 3

¹Waten nunarpiim qacarnera caliaqumallruuq:[2] Agayulirten͞gunrem Eliashib-aam agayulirten͞gullgutnii-llu caliaqellruat napartenqiggluku Sheep Gate-aq, naaqitraarluku-llu kencignarcarluku ikirtuqai ellillruit. Naaqitellruat-llu kencignarcarluku qacarneq tekillukek Tower of Hundred-aaq, Tower of Hananel-aaq-llu.

²Tuaken ayagluku Jericho-m yuin caliaqaat. Yaatii-llu Zacchur-aam Imri-m qetunraan caliaqaa.

³Hassenaah-m-llu ilakellriarin caliaqellruat Fish Gate-aq. Ayagtet ikirtuqat-llu enaitnun elliluki, caviit-llu kelucat, muragmek-llu caningqalriamek kelucarvililuku.

⁴Ukut-llu yaatiitni caliluni Merimoth-aaq, Uriah-m qetunraa tutgarii Hakkoz-aam. Yaatiitni-llu Meshullam-aaq Berech-aam qetunraa, tutgarii Meshezabel-aam caliluni. Ukut-llu yaatiitni Zadok-aq Baana-m qetunraa caliluni.

⁵Taukut-llu yaatiitni Tekoa-m yui caliluteng, tau͡gaam nunani yuut piuranrita caliaqsuumiitellruit caliarkiutseng ayuqucirtuasten̄ek.

⁶Jeshana Gate-aq-llu napartenqigtellruak Joiada-m Paseah-m qetunraan, Meshullam-aam-llu Besodeiah-m qetunraan.[3] Ayagtet ikirtuqat-llu elliluki, caviit-llu kelucat, muragmek-llu caningqalriamek kelucarvililuku.

⁷Yaatiitni-llu caliluteng Melatiah Gibeon-aarmiu, Jadon-aaq-llu Meronoth-armiu, angutet-llu Gibeon-aamek, Mizpah-mek-llu, West Euphrates-aami nunam angayuqran enii tekilluku.

⁸Taukut-llu yaatiitni Uzziel-aaq Harhaiah-aam qetunraa, suulutaaliurta, caliluni. Hananiah-llu, tepkegcautnek pilituli, yaatiini caliluni, Broad Wall-aq tekilluku.

⁹Rephaiah-m-llu Hur-am qetunraan, atanirturtiin Jerusalem District-aam avgan, yaatii caliaqaa.

¹⁰Jedaiah-llu Harumaph-aam qetunraan, yaatii caliaqaa, tamana elliin eniin caniani uitaluni. Taum-llu yaatiini caliluni Hattush-aaq Hashabneiah-m qetunraa.

¹¹Malchijah Harim-aam qetunraan, Hasshub-aam-llu Pahath Moab-am qetunraan, yaatii caliaqellruak, Tower of the Ovens-aaq-llu.

¹²Yaatiigni-llu calillruuq Shallum-aaq Hallohesh-aam qetunraa, atanirturtii Jerusalem District-aam avgan. (Paniin ikayullruat calillrani.)

¹³Hanun-aam-llu, nunarpiim-llu Zanoah-m yuin caliaqellruat Valley Gate-aq. Ikirtuqait enaitnun elliiluki, elliiluki-llu caviit kelucat muragmek-llu caningqalriamek kelucarvililuku ikirtuqaq, qacarneranek-llu kituggluku it'ganernek tiissitsaam aipaa avguluku (1500) taktaluni, Rubbish Gate-aq tekilluku.

¹⁴Malchijah-m-llu Rechab-am qetunraan atanirturilriim Beth Haccherem District-aarani, caliaqellrua Rubbish Gate-aq. Ikirtuqat enaitnun elliluki, caviit-llu kelucat, muragmek-llu caningqalriamek kelucarvililuku.

¹⁵Shallum-aam-llu Colhozeh-aam qetunraan, Mizpah District-aam atanirturtiin, caliaqellrua Fountain Gate-aq. Ikirtuqaq qilakutaliluku, ikirtuqat-llu enaitnun elliluki, caviit-llu kelucat, murak-llu caningqalria elliluki. Pool of Shelah-mi-llu qacarneq piliaqellrua canianek angayuqam naucetaarvian ayagluku, akret atraryarat David-aam Nunarpiinek tekilluki.

¹⁶Yaatiini-llu calillruuq Nehemiah Azbuk-aam qetunraa, atanirturtiin avgan Bethzur District-aam, David-aam qungua tekilluku, nanvarra'ar, anguyagtet-llu enait.

¹⁷Taum-llu yaatiini Levite-at ukut kitugcillruut: Rehum-aaq Bani-m qetunraa; tunglia-wa Hashabiah, atanirturta avganun Keilah District-aam, man'a caliaqellrua atanirturivini piluku.

¹⁸Bavvai-aaq-llu Henedad-aam qetunraa, atanirturilria avganek Keilah District-aam yaatiitni caliluni.

¹⁹Yaatiini-llu cali kitugciluni Ezer-aaq Jeshua-am qetunraa, atanirturten͞gulria Mizpah-mi, kitugcillruuq anguyagtet akliviata ciuqerranek ayagnirluni qacarnerem caqirtellra tekilluku;

²⁰Baruch-aam-llu Zabbai-am qetunraa caliuq taum yaatiini, Eliashib-am Agayulirten͞gunrem eniinun iteryaraq tekilluku.

²¹Meremoth-aaq-llu Uriah-m qetunraa tutgarii Hakkoz-aam, tuaken ayagluku caliaqaa Eliashib-aam eniin yaalirneq iqua tekilluku.

²²Ukut agayulirtet caliaqellruat qacarneq: Agayulirtet, kingunelget Jerusalem-aam avatiinek, yaatii caliaqellruat;

²³Benjamin-aankuk-llu Hasshub-aaq-llu yaatii caliaqellruak, tamana eniignek ciuqerragni uitaluni; Yaatiigni-llu Azariah, Messiah-m qetunraa tutgarii Ananiah-m, calillruuq, tamana eniin akiani uitaluni;

²⁴Binnui-m-llu, Henedad-aam qetunraan caliaqellrua yaatii, Azariah-m eniinek ayagluku qacarnerem kangiraa tekilluku;

²⁵Yaatiini-llu Palal-aaq, Uzai-am qetunraa, calillruuq ayagnirluni kangiraanek qacarnerem qulliim-llu qertulriartaan angayuqam eniin canimelkiin nayurtet uitaviata; Pedaiah-llu Parosh-aam qetunraa, yaatiini calillruuq, tekilluku calarami kangiraq Water Gate-am canianelnguq qertulriim-llu nayurviim Agayuvigpagmek. (Una caniani uitauq nunarpiim iliin aterpagcimalriim Ophel-aamek, Agayuvigpagmi calilriit uitavikluku.)

²⁷Yaatiitni-llu angutet Tekoa-mek calillruut, tauna tungliqluku caliallrata, ayagnirluteng kangiramek akianelngurmek angtuam qertulriim nayurvian Agayuvigpiim, qacarneq canianelnguq Ophel-aam tekilluku.

²⁸Agayulirtet-llu yaatiini calillruut, ayagluteng neglirneranek Horse Gate-am, tamarmeng ellaita enemeng ciuqerratni caliluteng.

²⁹Yaatiitni-llu Zadok-aaq Immer-aam qetunraa calillruuq, elliin enemi ciuqerrani. Yaatiini-llu calillruuq Shemaiah Shecaniah-m qetunraa, murilkestii East Gate-am.

³⁰Yaatiini-llu calillruuk Hananiah-nkuk Shelemiah-m Hanun-aaq-llu, arvinelgat Zalaph-aam qetunrain, allamek cali qaqiutellrulutek. Yaatiini-llu calilliuq Meshullam-aaq Berechiah-m qetunraa, tamana elliin eniin ciuqerrani uitaluni.

³¹Malchijah-m-llu, suuluciiyurtem, tunglia caliaqaa tekilluku ena Agayuvigpiim calistain kupcaat-llu atuqiit canianelnguq Miphkad Gate-aq Agayuvigpagmun, canimelkiini enem kangrani neglirnerani qacarnerem kangiraan.

³²Suuluciiyurtet kupcaat-llu caliaqaat nangneq, enemek kangirami ayagluku Sheep Gate-aq tekilluku.