Read Yupik Nehemiah 4 Bible Online

Nehemiah 4 - Yupik bible

Nehemiah 4

¹Sanballat-aam niicamiu Jews-aanun ayagnirniluku napartenqigtellra qacarnerem, qenertuq cakneq eq'urrluni, Jews-aat-llu caunrilkuurluki-llu temciarautekluki tuaten.

²Ciuqerratni-llu ilami, Samaria-rmiut-llu anguyagtet qanertuq, “Caliat ukut kemyunailnguut Jews-aat? Umyuartequt-qaa nautenqiggnaluku nunarpak? Umyuartequt-qaa elliillermegteggun caliaq qaqitnayukluku ernermi ataucimi? Navguumallret-llu-qaa teggalqut ataam piurcugngait elegumangraata?”

³Tobiah-llu nangerngallruuq caniani, qanellra-llu ilaluku qanertuq, “Aa-eng, waten ayuqellriamek piliut, kaviam qainganun ugeskuni imciiqaa teggalquq qacarneliarat.”

⁴Wiinga-llu piicagtua, “Niiski ukut yuut caunrilkuurutait wangkutnun, Agayun! Picingssautait ellaita qamiquitnun tuc'eskiki, uayarceskiki cairulluki, teguarurrluki-llu ayagceskiki allanun nunanun.

⁵Assiitellriamek caliaratnek au͡g'aricaqunaki, nalluyagucaqunaki assiilnguit eq'uqercetaaratgen picurlagcetaarillermegteggun calilrianek.”

⁶Tua-i caliurtukut napartenqiggluku nunarpiim qacarnera, kiituani qertutacillran avgatun qertutariarput, tua-i-wa yuut cumigcata calillerkameggnun.

⁷Tau͡gaam Sanballat-aaq, Tobiah, Arab-at, Ammonite-at, Ashodite-at-llu niitellermeggni Jerusalem-aam qacarneran tumarcimallra elluarrluni ayagturaucianek, ukinret-llu patumarillratnek, qenertellruut cakneq.

⁸Tamarmeng-llu quyurrluteng pillerkiurtut curukarnaluku Jerusalem-aaq aakulagcetnaluki-llu calilriit.

⁹Tau͡gaam wangkuta piicallruukut Agayutemten̄un, nayurten̄ek-llu elkarciluta murilkarkanek erenrani unugmi-llu.

¹⁰Judah-m-llu yui yuarutmek aturtut: “Piniarutukut atmagtullemten̄ek; Navguumalriit ayauqurarkat amlleqapigtut. Qaillun naparciiqseta qacarneq ernerpak?”

¹¹Inglukesteput qanertut, “Nalluciqaitkut tangerrngaunata-llu, akunlemeggnun tau͡gaam pimarikumta elpekciqaitkut, tuqurqekumceteng calillrat-llu taqevkaqumteggu.”

¹²Tau͡gaam pulengtaq Jews-aat inglukesteput ilagarluki uitalriit tailartut qanrucarturluta wangkutnun picirkiuraitnek inglukestemta.

¹³Taumek yuut caskukitellruanka nuussinek, pananek, urluvernek-llu, elkarrluki-llu, tungayakellriit ataucimun quyurrluki piaqluki ukinret qacarnermi patuksailnguut nallaitnun.

¹⁴Tangrramku yuut umyuassuugauciat ciuliqagtait atanerruarit-llu qanrutanka, “Alikenriciki inglukesteput! Umyuaqluku ATANREM artuqailucia uluryanarqucia-llu, calluuciki ilakutaci, irniaci, nuliaci, eneci-llu.”

¹⁵Inglukestemta nallunriraat picirkiurateng wangkutnun nallunriucia, taringaat-llu Agayutmun cirlakucia picirkiurameng. Wangkuta-llu caliamten̄un utertukut tumarrluku qacarneq.

¹⁶Tuaken ernermek ayagluteng avgit calistemta calilartut, avgit-llu nayurluteng anguyagcuutnek aturluteng caskurluteng pananek, capkutanek, urluvernek-llu. Ciuliqagtemta-llu tamarmirrluteng yuut ikayuagait

¹⁷calilriit qacarnermek nautenqiggluku. Imkut-llu caliameng aklukaitnek iluvaucilriit inglupiakun tegumiaqelarait, ingluakun-llu caskumek tegumiarluteng,

¹⁸tamarmeng-llu nuussirpateng naqugutmiaquralarait. Iliit-llu elpengcariarkaq cupu'uryarakun canimni uitauralartuq.

¹⁹Qanrutanka-llu atanerruarit, ciuliqagtait-llu, “Caliarput yaaqvanun sagingiin avvingatukut qacarnermi yaaqsiulluta.

²⁰Cupu'uryaram qalriallra niiskuvciu, egmian tailuci avatemnun quyureskici. Agayutemta ikayurciqaakut callukumta.”

²¹Taumek erenret tamaita, erqaarallranek unugmi agyat alairviatnun, avgit calilartut qacarneq nautenqiggluku, avgit-llu nayurluteng caskumeggnek pananek tegumiarluteng.

²²Mat'um nalliini ciuliqagcilriit ikayuit-llu qanrutanka uitalararkauniluki Jerusalem-aami unugmi, tuaten piluta kellutelararkaungamteggu nunarpak unugmi, erenrani-llu caliluteng.

²³Aturanka yuuksaitellruanka unuungraan, tuaten-llu piut ilanka, pistenka, nayurtenka-llu. Tamamta-llu saskuput avaliqerrlainarluki.