Read Yupik Nehemiah 5 Bible Online

Nehemiah 5 - Yupik bible

Nehemiah 5

¹Kinguqvaarni amlleret yuut, angutet arnat-llu, qanemyuugautek'ngait Jews-aarullguteteng.

²Ilait qanraqluteng, “Wangkuta yugyalriaruamta mukaarkanek piicunaitukut unguvaarkaukumta.”

³Allat-llu qanraqluteng, “Akiilngircuutekellruaput nunauteput, wine-arkanek naucetaarviput eneput-llu, kiputnaluta mukaarkanek palullerkarput aviyulluku.”

⁴Allat tuaten qanraqluteng, “Navrallruukut akinek akikaitnek akiliqurautaita nunautemta wine-arkat-llu naucetaarvimta.

⁵Tamamta ayuqluta Jews-aaruukut. Irniaput-llu irniaricetun ayuqluteng; tau͡gken wangkuta irniaput piyuumiilengraata pistepayuurcetaput. Panimta-llu ilait ak'a teguarurrluteng; wangkuta-llu qaillun pisciiganata allat yuut piksagucatki nunauteput, wine-arkanek-llu naucetaarviput.”

⁶Niicamki qanemyuugautait umyuaqa assiitellruuq.

⁷Ayuqucingcarraarlua yuut ciuliqagtait, ataneruarit-llu ikiaranka qanrulluki, “Nakmiin ilakutaci nangtaci!” Yuut-llu quyurcetanka arenqiallugun tamana arenqiirtuutekesqelluku

⁸qanrulluki, “Piyugngatacirramcetun ataam kiputelaraput Jews-aat ilakutaput tunumallret ilakumanrilngurnun yugnun. Tau͡gken elpeci nakmiin ilaci qessangraata tunlaraci wangkutnun ataam kiputesqelluki.” Ciuliqagtet-llu nepaunateng uitallruut camek qanerkaunateng.

⁹Taumek qanrutellrukenka, “Caliarci man'a assinrituq! Agayun niisngaarkaugarci elluaq-llu aturluku. Tuaten pikuvci Gentile-at, inglukesteput, wangkutnun temciarautekaitnek pingaitaci.

¹⁰Cali-llu wiinga, ilama, pistem̄a-llu navritellruaput akinek mukaarkanek-llu. Akiilnguit wangkutnun pellugcetnauraput.

¹¹Mat'umi ernermi uterceciki ellaita naucetaarviit, wine-arkanek naucetaarviit, olive-aat napautait, enait, tamalkuita-llu akit, mukaarkat, wine-at, uqut-llu ellaitnek tegulalci.”

¹²Ciuliqagtet kiugut, “Qanrucirpetun piciqukut. Nunautait ataam ellaitnun uterceciiqaput, akiilnguircetaarngaunaki-llu.” Agayulirtet-llu taisqanka ciuqerratni akqivkaranka ciuliqagtet wanirpak akqutellrat aturarkauluku.

¹³Naqugun-llu[4] atuqengaqa qukamni yuugaqa evcugluku-llu. Qanerlua, “Waten Agayutem evcugciqaa ilasi akqutminek piciurcecinrilnguq, teguciqai-llu eneci, akluci-llu tamalkuita, camek piirulluci.” Tamalkurmeng-llu tuanelnguut qanertut, “Amen!” nanrarluku-llu ATANEQ. Ciuliqagtet-llu akqillerteng aturluku.

¹⁴Tamalkuitni yuinaq malrugnek cipluku allrakuni Judah-m nuniinek atanirturillemni, Artaxerxes-aam angayuqrullran allrakui yuinaurtellratnek ayagluku, yuinaq qula malrugnek ciptellra (22) tekilluku, ilanka wiinga-llu neryuitellruaput neqkat yuut nunam atanranun cikiutait.

¹⁵Ciumni nunamek atanirturten͞gullret cakviurcet'lallruit yuut, cikircetaqluteng yuinaagnek malrugnek (40) qerrirlinek erenret tamaita, cali neqnek, wine-anek-llu. Pistaita tuaten yuut cakviurcelluki nanglluki. Wiinga tau͡gaam tuaten piksaitellruunga, qigcikngamku Agayun.

¹⁶Cumigulluku caliaqaqa nunarpiim qacarnera nunautekamnek-llu piksaunii; tamarmeng-llu calistem̄a ilalirluta caliurluteng.

¹⁷Nerevkarilartua-llu yugnek amllertalrianek yuinaat malrunlegen qulmek cipluku (150), Jews-aanek atanerruanek-llu, avatiitgun yuut tailuteng wangkutnun ilagautellernek avaqlimten̄ek atanruvignek.

¹⁸Ataucimi ernermi neqkiularaitkut: ataucimek kuluvagmek, arvinlegnek uqurilrianek qusnginek, yaqulegnek, erenret-llu qulngurtaqata paivcilartua amllernek aminek wine-anek imalegnek. Tua-i makunek pingqerrama pitekliqsaitua neqnek cikiutngutulinek nunam atanrinun, nallunrilamku yuut cakviullrat ellmaaraunrilucia.

¹⁹Elpenun piicagtua, Agayutmaa, elluarrlua pingnaquralqa ukunun yugnun nalluyagutevkenaku umyuaqelaqiu.