Read Yupik Nehemiah 6 Bible Online

Nehemiah 6 - Yupik bible

Nehemiah 6

¹Sanballat-aaq, Tobiah, Geshem-aaq-llu Arab-aq, allat-llu inglukesteput niitut wangnun tumarrniluku nunarpiim qacarnera, ukinret-llu patuluki, (tau͡gaam taum nalliini elliksaitellruaput iteryarat amiigit.)

²Tua-i Sanballat-aankuk Geshem-aaq-llu qanrucarturcetaagnga waten, “Taitai quyurrniartukut iliitni nunarraat maraini Ono-m uitalriami.” Maaggun usvituyagutaagnga elkenka akngirtengnaqnalua.

³Wiinga-llu qanrucarturcetellruagka waten, “Unitaayunailngurmek caliangqerrama tamaavet ayagciigatua. Calilriit arulaircessngaitanka ayagnalua paqteqainarlutek.”

⁴Cetamarqunek waten qanrucarturcet'laryaaqaagnga, tau͡gaam wiinga kiutekelqa cakanirpek'naku kiulallruagka.

⁵Tua-llu Sanballat-aam tallimiriluni pisten̄i taivkallrua igamek taitelluku nepyuciumanrilngurmek.[5]

⁶Igaq waten qanertuq: “Qanrutkumauq atanruvignun, Geshem-aam-llu qanrutellrulua elpet, Jews-aat-llu ingluliteqatarniluci; taumek-gguq nunarpiim qacarnera kitugeskeci. Cali-llu qanerluni piciqliarniluten elpenek angayuqrurciiqniluten

⁷prophet-aanek-llu piteklirniluten Jerusalem-aami qanrarkanek elpet angayuqruniluten Judah-mi. Mat'umek nallunrirceciiqerput angayuqaq. Taumek taikina quyurrluta man'a qanellgutekniararput.”

⁸Wiinga waten qanrucarturcetellruaqa, “Tamarmeng qanelten piciunritut, elpet umyuarpegun piliaqaten.”

⁹Alingallagcetengnaqsaaqaitkut umyuarteqluteng, “Caliateng pegciiqaat, qaqisngaitaat.” Wiinga-llu piicagtua, “Watua, Agayun, pinirivkarnga.”

¹⁰Uum nalliini paqtellruaqa Shemiah, Delaiah-m qetunraa, Mehetabel-aam tutgarii, unicesciigalaku eneni. Qanrutaanga, “Iirnaurtukuk Tanqilriaranun Agayuvigpiim kelucarluki amiiget, tailuteng tuqucartuqataatgen. Maa-i tua-i unuut iliitni taiciqut tuqucarturluten.”

¹¹Kiugaqa, “Wiinga imuunritua qimagaluni iiralalria. Umyuartequten-qaa unguvaka anirtungnaqnayukluku iirlua Agayuvigpagmi? Tuaten pingaitua!”

¹²Umyuangcautellemni taringaqa Agayutem qalarutellrunrilucia Shemaiah, tau͡gaam Tobiah-mun Sanballat-aamun-llu akilirluku mat'umek aarcirtuutmek wangnun qanresqellruciagnegu.

¹³Akilirluku tuaten pillruuk alingellemkun assiilngircetengnaqlua, assiilngiquma qanerrluuteknalua yugnun pikegtakenrirtellua.

¹⁴Piicagtua, “Agayutmaa, neq'akekiu Tobiah-nkuk Sanballat-aaq-llu caliallrak anucimirqecetaaqikek-llu. Neq'akekiu arnaq prophetess-aaq Noadiah, allat-llu prophet-aat alingcetaarillret wangnek.”

¹⁵Nunarpiim qacarnera qaqitellruuq Elul-am iralua ernengqerluku yuinaq tallimanek cipluku (25), caliaqellruluku ernerni yuinaagni malrugni qula-llu malrugnek cipluku (52).

¹⁶Inglukestemta, atanruviit yuita avatemten̄i uitalriit, niicamegteggu man'a alingenga'artut kiaresngianateng-llu; yuut tamarmeng nallunrilatgu Agayutmun ikayullrucirput calillemten̄i.

¹⁷Cali-llu tamakuni ernerni Judah-m ciuliqagtai Tobiah-llu igartaaguqurallruluteng.

¹⁸Amlleret Judah-m yuin Tobiah ililillruamegteggu Jews-aamek cakingqerran, Shecaniah-mek Arah-m qetunraanek. Cali-llu qetunraa Jehohanan-aaq nulirtullruan panianek Meshulam-aam, Berechiah-m qetunraan.

¹⁹Yuut-llu takumni qanrutkelarait Tobiah-m assilriit caliari, wiinga-llu qanllemnek qanrutaqluku. Arulaiqsaunani-llu igarturalallruanga alingcetaarlua.