Read Yupik Nehemiah 8 Bible Online

Nehemiah 8 - Yupik bible

Nehemiah 8

¹Malrunelgatni iralut Israel-aam yui nunameggni elkarcimariluteng uitangellruut. Ciuqliatni erenrin taum iralum, tamarmeng quyurtut carr'ilngurmun ciuqerranun Water Gate-am. Ezra-mun-llu, agayulirten͞gunermun elisngastiitnun Alerquutet ATANREM cikiutellrin Israel-aamun Moses-aakun, aqvasqait Alerquutet kalikaat.

²Ezra-m tua-i taitai yuut quyungqauviatnun; angutet, arnat, mikelnguut-llu angliriluteng taringyugngarilriit.

³Tuani-llu, carr'ilngurmi ciuqerrani Water Gate-am, naaqai Alerquutet erqaarallranek erenrem qukallra tekilluku, yuut-llu tamarmeng murilkelluteng niicugnillruut.

⁴Ezra nangerngallruuq muragmi inguqam qaingani piliaqumallerni tuani aturarkauluku. Ukut angutet nangerngallruut tallirpilirnerani: Mattithiah, Shema, Anaiah, Urijah, Hikiah, Maaseiah-llu. Iqsulirnerani-llu Pedaiah, Mishael, Malchijah, Hashum, Hasbadana, Zachariah, Meshullam-aaq-llu.

⁵Ezra-llu nangerngallrani inguqam qaingani yuut quliitni, tamarmeng tangvallruat. Egmian-llu ikircaki kalikat tamarmeng nangertut.

⁶Ezra qanertuq, “Nanraumali ATANEQ, ucurnarqellria Agayun!” Tamarmeng-llu yuut talliteng yagtait qulmun, kiuluteng, “Amen! Amen!” Ciisqumigtut-llu piicagluteng, nunamun kegginateng agtuulluki.

⁷Nangerrluteng-llu nangerngaut uitavimeggni, ukut-llu Levite-at nalqigtaat Alerquun ellaitnun: Jeshua, Bani, Sherebiah, Jamin, Akkub, Shabathai, Hodiah, Maaseiah, Kelita, Azariah, Jozabad, Hanan.

⁸Qalarqurluteng-llu mumigtaat[7] Agayutem Alerquutii nalqiggluki-llu yuut taringellerkaatgun.

⁹Yuut niitellermegteki Alerquutem picirkiutai umyuamegteggun agtuumiimeng qiallruut. Tua-i Nehemiah-m, nunam atanran, Ezra-m-llu, agayulirtem Alerquutem-llu elisngastiin, Levite-at-llu nalqigtestellrita Alerquutet, yuut qanrutait, “Una erneq tanqilriaruuq ATANERMUN Agayutevcen̄un, taumek angniitenrici, qiavkenaci-llu.

¹⁰Watua uterci kingunerpecen̄un nererpagniartuci. Neqevcen̄ek wine-amek-llu tuvqakniaci nuuqitellriit. Man'a erneq ATANERMUN tanqilriaruuq, taumek angniitenrici. Angnim ATANREM cikiutiin elpecen̄un piniriciqaaci.”

¹¹Tua-i Levite-at qarutaarait yuut qanrulluki, “Nepliavkenaci, erneq man'a tanqilriaruan; angniitevkenaci-llu.”

¹²Tua-i yuut uterrluteng nunaniryugluteng ner'ut merluteng-llu, ilateng-llu tuvqakluki taringellruamegteki naaqumallret ellmeggnun.

¹³Unuaquan ilakutaqellriit ciuliqagtaita, agayulirtet, Levite-at-llu ullagaat Ezra elicungcaryugluki qanruyutai Alerquutem.

¹⁴Taringaat-llu Alerquutem, ATANREM cikiutekellran Moses-aakun, picirkiutii Israel-aam yuinun nani uqisviggarni uitalaasqelluki Festival of Shelters-aam atullran nalliini.

¹⁵Cali-llu mat'umek alerquutmek ayagceciut Jerusalem-aamun allanun-llu nunanun, “Qeminun ayagluci aqvaci avayaitnek napat: pine-at, olive-aat, myrtle-aat, palm-at, allanek-llu napanek uqisviliniartuci igausngaciatun Alerquutni.”

¹⁶Tua-i yuut avayanek aqvalluteng uqisvilillruut enemeng qaingitni, ilait-llu enemeng elataitni, Agayuvigpiim-llu elatiini, ilait-llu carr'ilngurmi elatiigni Water Gate-am Ephraim Gate-am-llu.

¹⁷Tamarmeng-llu utertellret teguarullermeggnek uqisviliut uitavikluki-llu. Nunaniryugluteng tamana atuqsaitellruamegteggu Joshua-m unguvallran nalliinirnek tauna engelkarrluku.

¹⁸Erenret-llu tamaita, ayagniqarraallermeggnek taqvimeggnun Ezra naaqilartuq kalikainek Agayutem Alerquutiin. Nerevkariyaraq-llu aturaat ernerni malrunlegni; pingayunelgatni-llu nangniurluteng quyurtut umyugailkartevkenateng, Alerquutem pisquciatun.