Read Yupik Nehemiah 9 Bible Online

Nehemiah 9 - Yupik bible

Nehemiah 9

¹Tuani iralum erenrani yuinaq cetamanek cipluku (24), Israel-aam yui quyurtellruut yagluteng missuullernek all'uteng, qamiquteng-llu urr'amek kanevlerrluki.

²Israelite-at-llu allakarluteng, ilakumanrilngurnun ilagautevkenateng, assiilnguteng ciuliameng-llu assiilnguit apervikuatekellruit.

³Tayima sass'ani pingayuni naaqicimallruut Alerquutiinek ATANREM Agayutem, kinguakun cali sass'ani pingayuni assiilnguteng apervikuatekait, agayuluteng-llu ATANERMUN Agayutmeggnun.

⁴Inguqertangqellruuq quyigluni Levite-at nangengqaviatnek, tuani-llu nangerngaut: Jeshua, Bani, Chenani-llu. Qastuluteng-llu piicagtut ATANERMUN Agayutmeggnun.

⁵Ukut-llu Levite-at agayuvkariluteng: Jeshua, Kadmiel, Bani, Hashabneiah, Sherebiah, Pethahiah-llu. Qanerluteng: “Nangerrluci nanrarciu ATANEQ Agayutsi; nanrarciu akwarpak akwanun! Yuut tamarmeng nanrarlitgu ucurnarqelria atra, tau͡gken yuum nanrautii nuringaluni.”

⁶Israel-aam-llu yui uumek piicautmek piicagtut: “ATANEQ, elpet kiivet ATANRUUTEN; qiliit piliaqellruaten agyat-llu qilagmelnguut. Nuna piliaqellruan imarpik-llu, tamalkuita-llu tamaanelnguut; unguvamek tamalkuita cikillruaten. Amlleqapigtellriit qilagmelnguut cikvikluten nanralaraatgen.

⁷Elpet, ATANEQ Agayun, cucukestellra Abram-aam ayaulluku-llu Ur-amek Babylonia-melngurmek; atra-llu cimirluku Abraham-aamek.

⁸Nallunritellruan elpenun piciuluni yuullrucia, akqut'lillruluten-llu ellii pillgutekluku. Akqellruan elliinun cikiutekciqniluki nunait Canaanite-at, Hittite-at nuniit, Amorite-at, Perizzite-at, Jebusite-at, Girgashite-at-llu nunait, kinguvri tamaani nunami uitaarkaurtelluki. Akqutkellren piciurtellruan, ellualriaruavet.

⁹“Nallunritaten qaillun pitalriamek nangcimallrat ciuliaput Egypt-aami; qayagallrat ikayuusqelluteng niitellruan Red Sea-mi.

¹⁰Irr'inarqelrianek calillruuten inglulirluku Pharaoh, atanerruari, nuniin-llu yui, nallunrilavgu nangcillrat yugpenek. Tuani niitnaullren piksagutellruan ernerpak maa-i cali pikeken.

¹¹Tumyarillruaten yut'en imarpigkun ciuliqaggluki-llu nunakun kinertellriakun. Maligcetait qecuqitellruut mermi et'ulriami, teggalquq kit'elauciatun qairvalriami imarpigmi.

¹²Amirlukun ciuliqagtellruaten erenrani, unugmi-llu tanqigiaqluku tumkaat kenerkun.

¹³Qilagmek atrallruuten Mount Sinai-ami; qalarulluki-llu yut'en cikirluki assilrianek alerquutnek atuyunarqellrianek-llu picirkiutnek.

¹⁴Elitnaullruaten Sabbath-aaten qigcikluki pillerkaatnek, pistevgun-llu Moses-aakun alerquutevnek cikillruaten.

¹⁵“Kaillratni cikillruaten kelipamek qilagmek, mermek-llu teggalqumek meqsullratni. Qanrutellruaten nuna piksagucesqelluku akqutkellren ellaitnun cikiutekciqniluku.

¹⁶Tau͡gaam ciuliaput ellmeggnek pivakengellruut umyuarteng-llu atungluku qessakluki-llu maligtaqullerkait alerquutvet.

¹⁷Qessayagutellruat niisngallerkarteng; nalluyagutellruit calialten; nalluyagulluki irr'inarqelriit calialten. Ellmeggnek pivakluteng cucuklillruut ciuliqagtekameggnek ut'rutestekameggnek ataam pistepayuaraullerkameggnun Egypt-aami. Tau͡gaam elpet Agayutnguuten au͡g'ariciyunqellriaruluten; naklegtartuten kenkitarluten-llu, qenqerrngianak. Takumcutaucin angelriaruuq; cakaallrunritaten.

¹⁸Kuluvaguamek angucaluruamek agayutngualillruut qanerluteng-llu agayutnguniluku anutestellerteng Egypt-aamek! Angli-lli qacungakellruvagtatgen, ATANEQ!

¹⁹Tau͡gaam elpet unitellrunritaten tamaavet yuilqumun mer'ilngurmun, takumcutaucin angelriaruan. Au͡g'allrunritan amirluq keneq-llu tumkaata apertuastek erenrani unugmi-llu.

²⁰Assilriarucin aturluku ayuqucirtullruaten, pinriteksaunaki-llu manna-mek nerevkarturallruaten meqsugaqata-llu merr'itaqluki.

²¹Allrakuni yuinaagni malrugni yuilqumi mer'ilngurmi cikilallruaten tamalkuitnek aturyugarkaitnek; aturait nangyuunateng, it'gait-llu puveksaunateng nangteqnaqluteng.

²²“Cirlakivkallruaten yugugarnek atanruvignek-llu nunanek-llu avataitni uitalrianek. Piksagutellruat Heshbon-aam nunii, Sihon-aam atanirturivia, Bashan-aam-llu nunii, Og-am angayuqauluni uitavia.

²³Irnialingevkallruaten qiliim agyaitun amllertalrianek, cirlakevkallruan uitavikevkarluku-llu nuna ciuliaritnun akqutkellren ellaitnun cikiutekciqniluku.

²⁴Piksagutellruat Canaan-aam nunii; cirlakellruaten yuut tamaani uitalriit. Yut'en cikillruaten pinimek piyugtaciicetun pisqelluki yuut, Canaan-aam-llu angayuqri.

²⁵Piksagutellruit asvairqumalriit nunarpiit, nuna naungignarqelria, enet tukuutnek imalget, merviit taqumalriit, olive-aat napat, atsangtulit napat, wine-arkanek-llu naucetaarviit. Nerlartut camirrluteng uquringluteng-llu; nunaniryuutekellruit tamalkuita assilriit cikiutelten ellaitnun.

²⁶“Tau͡gken yut'en inglulitellruut narurrluten-llu; tunutellruit Alerquuteten. Tuqutellruit prophet-aat aarcirturteteng, qanrutesteteng ataam utertesqelluki elpenun. Pulengtaq qacungak'laraatgen,

²⁷taumek inglukestaitnun cirlakevkallrukten atanirturtelluki-llu. Arenqiallugtellermeng nalliini qayagallruut elpenun ikayuusqelluteng, niitellruaten-llu qilagmek. Angelria naklegtaucin aturluku ellaitnun ayagcecillruuten ciuliqagtekaitnek taukut anirtullrukait inglukestaitnek.

²⁸Tau͡gaam elluiluteng uitangucirmegcetun, ataam assiilngurmek atungellruut, ataam-llu inglukestaitnun cirlakevkallruaten. Tau͡gken umyuarnayaguciaqata anirtuusqelluteng-llu elpenun, qilagmek niitelaraten, amllerqunek-llu aviutelaraten naklegtalriaruavet.

²⁹Aarcirtularyaaqaten niisngasqelluki alerquuteten, ellmeggnek tau͡gaam pivakngameng ciuniuryuumiitellruit alerquuteten, alerquutvet atullrat unguvanarqelriarungraan. Asvaunateng ciumuarluteng, maligtaqucuumiitellruut.

³⁰Amllerni allrakuni pinrilqertuaksaunaki aarcirtularaten. Anernerpegun aarcirtularaten prophet-aarpeggun, tau͡gaam niicugniyuumiitelartut, taumek cirlakevkalaqeten allanun yugnun.

³¹Tau͡gken takumcutaucin angelriaruan, cakaallrunritaten piunrillruvkenaki-llu. Naklegtarluten takumcutarluten-llu Agayutnguuten!

³²Agayun, Agayutemtaa, elpet angtatailngurmi! Uluryanarqelriaruuten, pinilriaruuten! Pinricen̄ayuitaten akqutkelten. Assyrian-aat angayuqritnek nangcimarraanemten̄ek, man'a tekilluku, angelriamek nangteqellrulriakut! Angayuqaput, ciuliqagteput, agayulirteput, prophet-aaput, ciuliaput, tamarmeng-llu yup'ut nangteqellruut. Neq'akiu qaillun pitalriamek nangteqlerput!

³³Elluaq aturluku anucimirqecetaallruarpekut; piciurrlainartuten, wangkuta assiilngillrungramta.

³⁴Ciuliamta, angayuqamta, ciuliqagtemta, agayulirtemta-llu atullrunritaat Alerquuten. Niicugnillrunritait alerquuteten aarcirtuuteten-llu.

³⁵Piunarquciliutevgun angayuqat atanirtullruit yut'en uitallratni nunarugarmi naungignarqellriami ellaitnun cikiutellerpeni; tau͡gaam ellaita tuiggluteng assiilngurmek kevgiullrunritaatgen.

³⁶Taumek maa-i pistepayuulriakut nunami wangkutnun cikiuteklerpeni, maani naungignarqelriami nunami cikirtemten̄i neqkamten̄ek.

³⁷Nunam naugillri angayuqanun ayalartut elkartellerpenun atanirtuusqelluta assiilngillruamta. Ungungssiuteput-llu umyugiurutkelarait, wangkuta-wa angelriamek arenqialliqellriakut!”

³⁸Makut tamalkuita pillret pitekluki, wangkuta, Israel-aam yuini, waniwa umyuallguciutukut igakun, takarnarqucilirtelluku atanerruamten̄un, Levite-amten̄un, agayulirtemten̄un-llu.