Read Yupik Esther 2 Bible Online

Esther 2 - Yupik bible

Esther 2

¹Tamakut tuaten pillret kinguatni angayuqam qenertenriami umyuaqengaa Vashti-m niitenritellra, picirkiutellni-llu elliinun.

²Angayuqam pistain qanrutaat, “Yuaruceskuvet tau͡gaam nasaurlurnek angutem agtuqsailkainek.

³Atanerruanek taqulluten nunani tamalkuitni ataniumakevni quyurtesqelluki tamalkuita kenegnarqelriit angutem agtuqsailkai nasaurluut arnautevnun-llu ilaulluki maani Susa-mi, atanirturivigmi nunarpagmi. Aulukevkarluki-llu Hegai-amun arnautvet qaunqestiitnun, tuani kenegnarcarniarait.

⁴Nutaan elpet assikenruken nuliqsagutniaran Vashti enairtelluku.” Angayuqam tamana assikngamiu tuaten piuq.

⁵Tamaani Susa-mi uitalriartangqertuq angutmek aterluni Mordecai-amek Jews-aaruluni, qetunraanek Jair-am, Benjamin-aam yuin ilakluku, kinguvrak Kish-ankuk Shimei-aq-llu.

⁶Nebuchadnezzar-aam angayuqam tegullerminiu Jehoiachin-aaq, Judah-m atanra, ayaulluku-llu Jerusalem-aamek allanek ilaluku, Mordecai-aq taukut ilakellruat.

⁷Anglicallrua Mordecai-am Esther-aaq, Hebrew-tun Hadassah-mek at'lek, anngami pania. Esther-aaq kenegnaqapigtuq tangssunaqluni. Angayuqaak tuqullragni Mordecai-am yuliaqsagutellrua anglicarluku-llu nakmiin irniaqellriacetun pitarrluku.

⁸Angayuqam-llu Ahasuerus-aam man'a qaneryaraq ayagcecaku amlleret neviarcat taitellruit Susa-mun, Esther-aaq-llu ilakluku. Ellii-llu tuani angayuqam eniini uitalriit ilakaat Hegai-amek aulukesterluteng angayuqam arnautain qaunqestiitnek.

⁹Hegai-am umyugaanun Esther-aaq nall'arusngauq, taumek ilaini pinruluku pilaqii. Egmianun-llu kenegnarcautnek pivkaraa pilaucimegcetun neqkai-llu murilkelluki. Arnat-llu uitaviata assinratni uitavkarluku, malrunlegnek-llu pistekainek piluku angayuqam eniini calilrianek.

¹⁰Tau͡gaam Mordecai-am inerqullruani Esther-aam aassaqutekellrua Jews-aarucini.

¹¹Unuaquaqan-llu Mordecai-aq piyualuni angitaalartuq angayuqam arnautain uitaviata elatiini peng'garrluni Esther-aamek.

¹²Kenegnarcariyaraq arnanek allrakumi ataucimi atularaat, tepkegcilriim myrrh-am uquanek mingugaqluki arvinlegni iraluni, balsam-aat-llu cali uquatnek arvinlegni iraluni. Tuaten pimariaqameng agyugngariaqluteng atauciuqaqluteng Angayuqamun Ahasuerus-aamun.

¹³Tamakut-llu neviarcat angayuqamun ag'aqameng cucukellermeggnek aturanek tamaaken all'uteng piyugngaluteng.

¹⁴Atakumi aglartut, unuaquani-llu uterrluteng, tau͡gaam cali allanun angayuqam arnautainun ciuniraqluteng utertaqameng Shaashgaz-amek qaunqestelegnun. Tuani-llu uitaaqluteng angayuqam aterpaggluki taisqeksaitaqateng.

¹⁵Esther-aam angayuqamun agglerkaa tekituq. Esther-aaq-Abihail-am pania Mordecai-am nuliacungaqluku, elliin Mordecai-am nakmiin yuk'ellriatun anglicallrukii; Esther-aaq yuut tamarmeng tangertain ilukegcitketukiit. Agglerkani tekican, Hegai-am at'esqellrinek aturluni ag'uq angayuqamun.

¹⁶Ahasuerus-aam atanrullra allrakungeqerluku malrunlegnek qulngurutiitni iralut Tebeth-aam iraluani, Esther-aaq agutellruat angayuqamun.

¹⁷Angayuqam Ahasuerus-aam Esther-aaq ilaini assikenruamiu kenkenruluku-llu nasqerrutmek ac'etaa nuliqsagulluku-llu Vashti enairtelluku.

¹⁸Ahasuerus-aaq-llu nerevkariuq Esther-aaq pitekluku kelegluki atanerruani tamalkuita, nunani-llu tamaani calinermek arulairtelluki, cikirturiluni-llu angayuqam cikiuteksugngakainek.

¹⁹Mordecai-aq-llu caliarkitellrua quyilriamek angayuqam.

²⁰Esther-aam-llu Jews-aarucini nallunriqsaicetellrua inerqullruani Mordecai-am, niisngauralaamiu mikelnguurranerminek ayagluni.

²¹Mordecai-aq-llu tamaani caliinanrani, Bigthana-nkuk Teresh-aaq-llu, angayuqam pistain ilakek amiiget angayuqam enainun qaunqelluki, angayuqaq ingluk'ngengamegnegu picirkiurtuk tuqutnaluku.

²²Tau͡gaam Mordecai-am nallunriamikek Esther-aaq qanrucani Esther-aam qanrutaa Ahasuerus-aaq Mordecai-am qanellranek.

²³Tamana pillrak yuvriamegteggu piciullinian taukuk tuqutagket agarrlukek. Tamana-llu pillrak kalikarnun igaulluku angayuqam ciuqerrani.