Read Yupik Esther 3 Bible Online

Esther 3 - Yupik bible

Esther 3

¹Tamakut kinguatgun Angayuqam Ahasuerus-aam Haman-aaq, Hammedeth-aam qetunraa Agag-am kinguvran, atanrurcetaa atanerruaminun tamalkuitnun.

²Alerqurluki-llu atanerruat pisten̄i Haman-aamek takaqiciat nasvagluku ciisqumiggluki ciktaarvik'laasqelluku. Tuaten-llu tamarmeng pilangraata Mordecai-aq tuaten piksaitelartuq ciktaarviksuumiinaku Haman-aaq.

³Calillgutain-llu atanerruat aptelaraat ciin cakaarilaucianek angayuqam alerquutiinek.

⁴Unuaquaqan-llu qanruquralangraatni niicuitelarai. Nalqigulluki qanrutai, “Wiinga-wa Jews-aaruama ciktaarvikesciigalkeka Haman-aaq.”

⁵Haman-aam nallunriamiu Mordecai-amun ciktaarviksuumiilucini eq'uqertuq,

⁶nallunriamiu Mordecai-am Jews-aarucia kiingan anucimirqecetaaqainaryuumiitaa. Picirkiurluni-llu tuqutnaluki Jews-aat uitalriit Ahasuerus-aam angayuqauviani.

⁷Ahasuerus-aam atanirturillra qula malrugnek cipluku (12) allrakungeqerluku iralut ciuqliatni, Nisan-aam iraluani, Haman-aaq picirkiriuq nall'arcetaaresqelluki (purim-aamek at'legmek) nallunriryugluku erenret iralut-llu naliatni assirarkaucianek pillerkiurami atullerkaa. Iraluq Adar-aamek at'lek cucukaa.

⁸Taumek Haman-aam angayuqaq qanrutaa, “Yugtangqertuq cekavcimalrianek nunani ataniumakevni piciryararluteng allat yuut piciryaraicetun ayuqenrilngurnek. Alerquutevnek-llu atulriarunrilameng elpenun catnguvkenateng.

⁹Elpeni canrilkan piyunarqucimek igaqina tuqucesqelluki tamakut. Tuaten pikuvet, wiinga akinek amllernek elliiyugngaciqua angayuqam akivianun atuugarkanek angayuqauvigmun.”

¹⁰Angayuqam tua-i kulutni yuuluku takarnarqucirissuutni tunaa Haman-aamun Agagite-amun, Hammedatha-m qetunraanun, Jews-aat inglukestiita.

¹¹Qanrutaa angayuqam, “Yuut akiutait-llu tapeqluki piyugtacirpetun umyuan aturluku pikiki.”

¹²Iralut-llu ciuqliat ernengqerluku qula pingayunek cipluku, Haman-aam angayuqam igartai igarcetai tamaani ayuqenrilngurteggun qaneryaraitgun mumigtelluki, atanruvigmi-llu tamaani igaryarait aturluku ayagcecimaarkanek atanirturten̄un nunam atanrinun, atanerruanun-llu. Tamakut-llu ayagcecimaluteng Ahasuerus-aam atrakun, takarnarquciumaluteng-llu kulutekun.

¹³Aqvaqurluteng-llu ayagacistet tamakut igat ayagatait nunanun tamalkuitnun. Tamakut igat alerquutnek imangqertut tuani ernermi ataucimi Adar-aaq qula pingayunek cipluku ernengkan Jews-aat ak'allaungraata, ayagyuangraata, arnaungraata, mikelnguungraata-llu tuqurqesqelluki takumcukevkenaki uayarluki-llu.

¹⁴Igam-llu taum imaa nallunrircecesqelluku yugnun nunami tamalkuitni, upingasqelluki-llu tauna erneq tekiskan.

¹⁵Ahasuerus-aam angayuqam alerquutii aturluku igat taukut nallunrircetait Susa-mi, ayagalluku tuaten kevgatgun allanun nunanun. Tuani-llu angayuqaq Haman-aaq-llu aqumlutek merauk nunarpiim Susa-m ayuquciirutellran nalliini.