Read Yupik Esther 4 Bible Online

Esther 4 - Yupik bible

Esther 4

¹Mordecai-am nallunriamiu man'a Haman-aam pillra nanikuangami aturani allgurai. Missuullernek all'uni qamiquni-llu aramek kanevlerrluku nunatgun tarratuq neplirluni cakneq,

²agluni-llu angayuqam eniin ikirtuqain elatiitnun. Iterpek'nani tau͡gaam, kina missuullermek atulria iterciigalan.

³Tamaani nunani angayuqam ataniumak'ngaini igallra nallunriamegteggu Jews-aat angniiterpagtut. Yaggluteng aluviliurluteng neplirtut amlleret-llu missuullernek all'uteng taklaluteng qamllermi.

⁴Esther-aam pistain qanrucatni nanikuaguq cakneq; Mordecai-aq-llu at'arkainek payugcetengraani missuullret aturai yuusqelluki ciuniurpek'naki.

⁵Esther-aam Hathach-aaq taisqaa, angayuqam Ahasuerus-aam pistain iliit, ellimerrumalleq kevgiuresqelluku. Tauna ayagcetaa Mordecai-amun nallunriryugluni qaillun pillratnek ciin-llu tuaten picianek.

⁶Hathach-aam ullagaa Mordecai-aq angayuqam Ahasuerus-aam iteryaraan elatiini carr'ilngurmi uitallrani.

⁷Mordecai-am-llu tauna qanemcitaa tamalkuitnek ellminun tut'ellernek, Haman-aam-llu akqillranek tuaten pitalrianek akinek elliiciqniluni angayuqam akivianun Jews-aat tuqurqumakata.

⁸Mordecai-am tauna cali cikiraa kalikarmek igaumalriim ayuqiinek Susa-mi taqumallermek alerquutnguluni Jews-aat piunriumallerkaatnek. Mordecai-am tauna kalikaq tunesqaa Esther-aamun, nalqigucesqelluku-llu tamatum qaillun ayuqucianek, qanrucesqelluku-llu angayuqaq ullagluku kaigavikesqelluku yui takumcukesqelluki.

⁹Hathach-aaq-llu pisqumacirmitun piuq.

¹⁰Esther-aam-llu Mordecai-aq waten qanrucartuusqaa,

¹¹“Tamarmeng angayuqam pistain yuut-llu ataniuqengain nallunritaat kina imna angun wall'u arnaq iluqlirmun angayuqam uitavianun qayagaurumavkenani itellria ataucimek alerquutengqerrucianek; tamarmeng ayuqluteng tuqucimaarkauluteng. Kina tau͡gaam itellria angayuqam scepter-aaminek yaggvikekii unguvaarkauluni. Wani-wa-llu wiinga angayuqam iralurrluni taisqeksaunii.”

¹²Mordecai-am Esther-aam kiutii niicamiu waten qanrucesqaa, “Umyuarteqsaqunak angayuqam eniini uitiivet anagnayukluten Jews-arullguteten piunriumakata.

¹⁴Wani-wa nepaunak uitakuvet mat'um nalliini qilagmek Jews-aat ikayuumaciqut, tau͡gaam elpet tuquciquten atavet-llu yui nang'arkauluteng. Aipaagni-llu tayima man'a pitekluku angayuqam eniini uitavkaumauten.”

¹⁵Esther-aam Mordecai-aq waten qanrucarturcetaa,

¹⁶“Ayagluten Susa-rmiut Jews-aat quyurceski yagniartuci piicaullua nereksaunaci ernerni unugni-llu pingayuni. Wiinga-llu pistetuumarma tuaten piciqua. Nutaan taum kinguani angayuqamun ayagniartua alerquun navengramku. Tuquarkaukuma tua-i tuquniartua.”

¹⁷Mordecai-aq ayagluni Esther-aam alerquuciatun piuq.