Read Yupik Esther 5 Bible Online

Esther 5 - Yupik bible

Esther 5

¹Erenret yallmi pingayuatni Esther-aaq takarnarqelrianek aturanek all'uni ag'uq nangerrluni-llu angayuqam eniin iluqlianun, atanruviim aqumllertaan uitavia cauluku. Angayuqaq-llu aqumgaluni atanruvigmi aqumllermi, iteryaraq caumaluku.

²Tangrramiu angayuqam Esther-aaq nangengqallrani ciuniuraa scepter-aaq-llu tegumiani tungiinun yagulluku. Tua-i Esther-aam ullagluku scepter-aam nuuga agturaa.

³Angayuqam aptaa, “Camek pisit, Queen Esther? Qanrusnga piyullerpenek, tua-i piksaguciiqan, angayuqauvima avkengraaku.”

⁴Esther-aam kiugaa, “Canganarqenrilkan elpeni, neryartuusqumayaaqamtek Haman-aaq-llu ataku neqkiurarkamnek elpetegnun.”

⁵Tua-i-llu angayuqaq qanertuq, “Haman-aaq aqvaciu cukamek, Esther-aam pisqellratun piniartukuk.” Tua-i angayuqaq Haman-aaq-llu ag'uk Esther-aam neqkiuraanek neryarturlutek.

⁶Wine-amek mer'inanermeggni angayuqam Esther-aaq qanrutaa, “Camek piyullerpenek qanrusnga, tua-i piksaguciiqan. Piyullerpenek cikirciqamken, angayuqauvima avkengraaku.”

⁷Esther-aam kiugaa,

⁸“Canrilkan elpeni, cali unuaqu neryartuusqumayaaqamtek Haman-aaq-llu uptarkamek. Tuani qanruciiqamken camek piyullemnek.”

⁹Haman-aaq nererraarluni anllermini angnirtuq umyuaqegciluni. Tau͡gaam Mordecai-aq tangllermini iteryarami, tauna-llu nangertenrilan uluryakevkenani-llu kitungraani, Haman-aam cakneq qenqerrutaa.

¹⁰Tau͡gaam canrilvaguarluni kingunerminun utertuq. Yugnikek'ngani kellgaarluki nuliani Zeresh-aaq taisqaa ilaliisqelluteng.

¹¹Ucuryagutai-llu tukuutminek, qetunrani-llu qavciuciitnek, angayuqamun-llu caliarkitellruniluni quyinrurrluni tamalkuitni atanerruarini angayuqam.

¹²Cali-llu qanerluni Haman-aaq-llu, “Esther-aam-llu neqkiurraarluni keleglunuk wiinga angayuqaq-llu kiimegnuk, unuaqu-llu cali keleglunuk neryartuusqellunuk.

¹³Tau͡gaam makut caunrilngurtun wangni ayuqelartut Mordecai-aq Jews-aaq tangrraqamku angayuqam eniinun iteryarami.”

¹⁴Nulirran yugnikestain-llu qanrutaat, “Pilivkaqina kitak yuum uyaqurrikun agarrvigkaanek yuinarnek pingayunek akimiarmek cipluku (75) it'ganernek qertutalriamek. Unuaqu unuakumi angayuqaq apelcirniaran Mordecai-aq tuani agarcugluku, nutaan angnirluten neryarturniartuten.” Haman-aam umyuani nall'arcan yuum uyaqurrikun agarrvigkaanek pilivkarai.