Read Yupik Esther 6 Bible Online

Esther 6 - Yupik bible

Esther 6

¹Tuani unugmi angayuqaq qavarciigatuq, tua-i atanruvimini cat piurallret igausngaviit aqvavkarluki naaqitevkartuq taukunek.

²Naaqellermeggni-llu naaqaat Mordecai-am qanrutkellra Bigthan-aankuk Teresh-aaq-llu, angayuqam enainek qaunqistek, picirkiuryaaqellragnek angayuqaq tuqutnaluku.

³Angayuqaq aptuq, “Qaillun quyavikellruceta camek-llu nunulillrucetaa Mordecai-aq tamana pitekluku?” Pistain kiugaat, “Camek pimaksaituq.”

⁴Angayuqaq-llu aptuq, “Atanerruat-qaa iliit maantenrituq?” Taum nalliini Haman-aaq itertuq angayuqam eniin elaqlianun, tuani taillruuq angayuqaq pinaluku, Mordecai-aq agarcugluku yuum uyaqurrikun agarcessuutiikun waniwa-llu ak'a piliaqluku upingarilriakun.

⁵Pistain angayuqaq qanrutaat, “Haman-aaq kegga'antuq enem elaqliani.” Angayuqaq qanertuq, “Kitak iterceciu.”

⁶Haman-aaq itran angayuqam qanrutaa, “Yugtangqertuq cakneq quyaviksuumiq'ngamnek. Qaillun pilua taumun quyalqa nasvagciqsia?” Haman-aaq umyuartequq, “Allamek-wa yugmek angayuqam quyaviksuumirarkaanek pitailnguq wangnek tau͡gaam.”

⁷Haman-aam angayuqaq qanrutaa, “Quyaviksuumiq'ngangqerquvet yugmek,

⁸taitessgu aturaqegtaarnek atulallerpenek, horse-aamek-llu ekumgavikelallerpenek, horse-aam-llu qamiqurra takarnarqellriamek tangnircautmek[1] nasqerrutmek ellivikluku.

⁹Nutaan-llu aturat nasqerrun-llu atanerruarpet piuranratnun tunluki taum aturirniaraa quyaviksuumiqen, horse-aamun-llu ekevkarluku ayagatelluku nunat akuliitgun qayagpagaluni waten: ‘Waten pimaarkauguq angayuqam quyaviksuumiq'ngaa.’”

¹⁰Haman-aaq angayuqam qanrutaa, “Kitaki cukamek, aturat horse-aaq-llu piluku, qanllerpetun pikiu Mordecai-aq Jews-aaq, aqumgalria angayuqam iteryaraani. Qanrutkellerpetun ilakuivkenaki piniaran.”

¹¹Haman-aam tua-i aturat horse-aaq-llu tegui, aturat-llu ac'etai Mordecai-amun. Horse-aamun-llu ekngan nunat akuliitgun ayagalluku qayagpagaluni, “Waten pimaarkauguq angayuqam quyaviksuumiq'ngaa.”

¹²Mordecai-aq utertuq angayuqam iteryaraanun, Haman-aaq-llu eneminun cukangnaqluni uterrluni, angniinani qamiquni patuluku.

¹³Haman-aam-llu nuliani Zeresh-aaq yugnikek'ngani-llu qanrutai tamakunek ellminun pillernek. Tua-i umyuartulriit yugnikek'ngain, nulirran-llu Zeresh-aam qanrutaat, “Mordecai-aq pininrurrngiinartuq elpeni. Jews-aaruuq, cirlakesciigatan-llu. Elliin tau͡gaam nallunailngurmek cirlakarkaugaaten.”

¹⁴Qanrinanratni angayuqam pistain aqvaat Haman-aaq neryartuusqelluku Esther-aam neqkiuraanek.